GSHS Kòrsou 2015

Riba e pagina aki bo ta haña mas informashon tokante GSHS-Kòrsou: e investigashon nashonal tokante komportashon di salubridat (i faktornan di protekshon), ku por influenshá salú di nos hubentut riba término kòrtiku i largu. Den e último kuartal di aña 2015 a ehekutá e promé investigashon na Kòrsou.

E raport ku resultadonan ta inkluì akì.

 

Kiko ta GSHS?

E investigashon di salubridat bou di studiantenan di 12 pa 17 aña ta forma parti di e estudio internashonal ‘Global school-based student Health Survey’ (GSHS) di e organisashon mundial di salubridat ‘Wereldgezondheidsorganisatie (WHO)’. WHO a desaroyá GSHS den koperashon ku UNICEF, UNESCO i UNAIDS ku asistensia tékniko di e sentro pa kòntròl di enfermedat i prevenshon na Merka ‘U.S. Centers for Disease Control and Prevention (CDC)’.

E organisashon di salubridat, ‘Pan American Health Organization (PAHO)’, e establesimentu Merikano di WHO, ta kordiná e investigashon na Kòrsou pasombra pa nan ta di sumo importansia haña un bon bista di e situashon di salubridat i bienestar di nos studiantenan. Di e islanan Karibense 17 isla a partisipá kaba na e investigashon aki. Mas informashon di investigashon i resultadonan di e otro islanan/paisnan por haña riba e website di WHO: http://www.who.int/chp/gshs/en/. Den e último kuartal di aña 2015 a ehekutá e promé investigashon na Kòrsou.

 

Kua ta e aspektonan ku lo atendé durante e investigashon?

Lo hasi pregunta tokante e siguiente tópikonan: 

1. Uso di alkohòl
2. Uso di tabako
3. Alimentashon
4. Higiena
5. Uso di droga
6. Salubridat Mental
7. Aktividat físiko
8. Faktornan di protekshon
9. Komportashon seksual
10. Konosementu relatá na HIV
11. Violensia i leshon imprevisto


 

Dikon e investigashon aki ta importante?

Na 2012/2013 diferente skol na Kòrsou a partisipá na e proyekto Biba Amor di Ministerio di Salubridat, Medio Ambiente i Naturalesa. E resultadonan a kontribuí na un mihó bista di e aktitut i konosementu di salubridat seksual bou di studiantenan. Relashoná ku esaki e nesesidat a lanta pa sa mas tokante komportashon di salubridat (i e faktornan di protekshon), ku por influensiá salú di nos hubentut riba término kòrtiku i largu.

E GSHS-Kòrsou ta importante pa 3 motibu. Na promé lugá e resultadonan di e investigashon ta duna un bista di e komportashon di salubridat di nos studiantenan. Ku esaki ta haña e informashonnan nesesario pa stipulá den ki direkshon mester dirigí e programa di prevenshon. E ta ofresé tambe e oportunidat pa traha programa di prevenshon mas riba midí. Na di dos lugá e investigashon ta suministrá informashonnan importante pa stipulá maneho di hubentut i di salubridat. E resultadonan di e investigashon ta forma un base pa medidanan di maneho i rapòrtnan ku ta duna un impreshon di e hubentut di Kòrsou. Na di tres lugá por kompará e resultadonan di Kòrsou dirèkt ku otro islanan den Karibe i pafó di e área aki. Di e forma aki nos por kompará nos studiantenan ku studiantenan di otro pais i mira unda nos hóbennan ta hala mas atenshon.
 

Kon e investigashon na skol ta tuma lugá?

Nos ta na altura ku skolnan ta haña hopi petishon pa investigashon, p’esei nos ta perkurá pa esnan ku partisipá tin ménos trabou posibel. Pa e motibu aki semper lo tin un asistente di investigashon di Centraal Bureau voor de Statistiek (CBS) presente, ku lo atendé e parti logístiko na momentu ku ta atendé e listanan di pregunta.

Kontestashon di e lista di pregunta ta tuma 30 pa 45 minüt di tempu.
A base di un aserkamentu sientífiko a selektá di e skolnan sekundario públiko i SBO, 28 skol pa partisipá na e investigashon. Di e skolnan SBO solamente klas 1 i 2 lo partisipá na e investigashon.
 

Kon ta atendé privasidat di e studiantenan?

Nos ta konsiente ku e informashonnan ku nos ta kolekshoná ta sensitivo na privasidat. E asistente di investigashon a kustumbrá di atendé informashonnan privá, a firma un deklarashon di sekresia i lo atendé esaki ku e diskreshon nesesario. Ta pidi tur studiante eksplísitamente pa no skibi nan nòmber riba e lista di pregunta. E asistente ta bai ku e listanan di pregunta yená den un ènvelòp será. Pues e kontestanan no ta bisto pa otro studiante òf dosente. Prosesamentu di e listanan di pregunta anónimo ta na enkargo di CDC. No por derivá for di e resultadonan ta di kua studiante, klas, skol òf direktiva di skol nan ta. Di e forma ei ta garantisá privasidat di tur partisipante.

Kiko ta e planifikashon?

Na ougùstùs 2015 a aserká e direktivanan di skol i a invitá e skolnan pa partisipá na e investigashon. A pidi tur direktiva di skol ku ta partisipá pa apuntá, pa kada skol, un persona di kontakto. E persona di kontakto ta risibí un formulario ku e petishon pa yena riba dje tur e klasnan (nòmber di e klas) di e skol. E investigadónan ta selekshoná for di e lista algun klas di un forma arbitrario. Dependé grandura di e skol ta bai pa entre tres i seis klas di kada skol. Dor di skohe un kantidat limitá di klas ta evitá e impakto di e investigashon riba e programa regular di e skol.

Na òktober i novèmber 2015 lo aserká e personanan di kontakto di un skol i traha un afsprak pa atendé e listanan di pregunta. Nos ta ofresé skolnan tambe un karta modelo ku skol por usa pa informá mayornan di e studiantenan tokante e investigashon. Un par di dia promé ku atendé e lista di pregunta por entregá e karta aki na e studiantenan pa nan bai kas kuné..

Riba e dia ku ta atendé e lista di pregunta un asistente di investigashon ta pasa pa guia e proseso. Ta atendé e lista di pregunta den klas i e kontestamentu ta tuma 30 pa 45 minüt di tempu.
 

Preguntanan mas frekuente di GSHS-Kòrsou

Dikon boso ta hasi e investigashon aki realmente?
Na 2013 Volksgezondheid Instituut Curaçao a ehekutá un enkuesta di salubridat bou di personanan di 18 aña i mas grandi. Di esaki tin informashonnan resien disponibel di e.o. e situashon di salubridat i e komportashon serka adultonan. Di e komportashon di salubridat (i e faktornan protektor) di nos hóbennan no tin informashonnan representativo ainda. Esaki ta netamente importante pasombra e komportashon den e fase di bida aki por resultá, riba término largu, den malesa i enfermedatnan na un edat mas avansá. Esaki ta e motibu ku aworakí nos ta inventarisá tambe salubridat di hóbennan entre 12 i 17 aña.

Dikon a selektá nos skol pa partisipá na e GSHS-Kòrsou?
Pa selekshon di e skolnan a hasi uso di un aserkamentu sientífiko, un asina yamá tèst pa un grupo a-selekto (steekproef). Pa implementá e aserkamentu aki a hasi uso di un lista di tur skol na Kòrsou. Pues a skohe un skol kompletamente arbitrario for di e lista aki. E selekshon ta importante tambe komo ku e ta representativo pa e resultadonan di e investigashon.

Dikon partisipashon di nos skol ta importante?
Pa haña un bon bista di e komportashon di salubridat (i e faktornan protektor) di nos studiantenan ta importante pa mas tantu skol posibel partisipá. Mas skol partisipá, mas mihó e resultadonan di e investigashon ta representativo pa tur studiante. Pa esaki no solamente e nivel di skol ta importante, pero por ehèmpel e lokalidat i grandura di e skol tambe.

Mi ke pa mi skol tambe partisipá na e investigashon. Kon nos por bini na remarke?
Pa selekshoná e skolnan a hasi uso di un aserkamentu sientífiko, un asina yamá tèst pa un grupo a-selekto (steekproef). E skolnan ku a invitá pa partisipá ta skohé di un forma arbitrario. Di e forma aki e resultadonan di e investigashon ta representativo pa tur studiante na Kòrsou. Den kaso ku bo skol no a haña invitashon pa partisipá no ta nifiká ku e resultadonan di e investigashon no ta konta pa e studiantenan di bo skol. Basá riba e aserkamentu sientífiko no ta nesesario pa interogá studiantenan di tur skol.

Dikon nos skol mes no por determiná kua klas por partisipá na e investigashon? 
E motibu pa kua e investigadónan ta selektá e klasnan ku ta partisipá tin di haber ku e echo ku resultadonan di e investigashon mester ta representativo. Nos ta hasi esaki na un manera ‘random’, kaminda tur alumno tin e mesun oportunidat pa kai den selekshon. Esaki ta importante pasombra e resultadonan ta representativo pa tur studiante na Kòrsou.

Unda ta publiká e resultadonan di e investigashon?
Ta publiká e resultadonan di GSHS-Kòrsou medio 2016 den media i riba e website di Volksgezondheid Instituut Curaçao. Esaki despues ku direktivanan di skol i skolnan ku a partisipá na e investigashon a risibí e rapòrt.

Bo ta publiká e resultadonan individual di e skol i direktivanan di skol?
Nò, pa garantisá privasidat di tur partisipante nos no ta publiká resultado individual di skol i direktivanan di skol. Ademas e kantidat di studiantenan ku ta partisipá pa kada skol ta muchu tiki pa duna kualke deklarashon konfiabel. Por violá privasidat di e studiantenan si publiká e resultadonan. 

Mi ta prekupá pa e preguntanan di komportashon seksual bou di e hóbennan. 
Na Kòrsou e kantidat di embaraso hubenil ta relativamente haltu. Hopi biaha e embaraso hubenil aki ta indeseá, esaki konforme resultado di e kantidat di abortonan ku ta tuma lugá. For di e resultadonan di e proyekto ‘Biba Amor’, kaminda diferente skol na Kòrsou a partisipá na 2012/2013, a resultá ku serka vários di e hóbennan tin falta di konosementu kon pa evitá konsekuensianan negativo di komportashon seksual. Tambe ta bini relativamente hopi enfermedat kontagioso bou di e hóbennan dilanti. Na 2013 a resultá ku un kuart di e hóbennan di 15 pa 24 aña, ku a laga tèst nan, tabata kontaminá ku chlamydia trachomatis, un bakteria ku ta okashoná infertilidat. Nos ta hasi pregunta riba komportashon seksual netamente pa protehá e hóbennan kontra konsekuensianan negativo. Di e forma aki nos por haña un bista di e aspektonan di komportashon di salubridat aki bou di hóbennan i por traha programanan di prevenshon na midí.

E investigashon ta pone un peso riba e programa di lès i riba e dosentenan?
Nò, ta organisá yenamentu di e lista di pregunta di tal forma ku e peso lo ta mínimo. Ta palabrá un orario ku ta kumbiní tur skol. Un asistente di e investigashon lo pasa na tur skol pa atendé e listanan di pregunta di e klasnan selektá. Dependé e grandura di e skol entre tres ku seis klas lo partisipá.

Nos studiantenan a partisipá (òf a yega di partisipá kaba) na un otro investigashon di salubridat. Dikon nos tin ku partisipá na e investigashon aki aworakí?
E selekshon di e skolnan den otro investigashonnan hopi biaha no ta representativo pa tur alumno. Dor di esei e informashonnan di e investigashon ta bisa algu di e studiantenan ku a yena e lista di pregunta. E otro investigashonnan hopi biaha ta konsentrá tambe riba un tópiko spesífiko, por ehèmpel komportashon seksual òf
salubridat dental. E bentaha di esei ta ku ta haña mas informashon di e tópiko spesífiko. E desbentaha ta ku no tin un bon bista general ainda di e komportashon di salubridat bou di nos hóbennan. Esaki ta loke GSHS-Kòrsou, ku informashonnan di e investigashon representativo pa tur studiante i ku por kompará internashonal, ta premirá.

E mayornan no mester duna pèrmit pa nan yunan partisipá?
E skolnan ta risibí un karta di e investigadónan pa nan por entregá e mayornan kaminda ta informá nan di GSHS-Kòrsou. Mayornan ku tin opheshon pa nan yu partisipá na e investigashon por ekspresá esaki.


 

Bo ke sa mas?

Bo ke mas informashon tokante e investigashon? Tuma kontakto ku di lider di proyekto GSHS-Kòrsou:

Drs. Soraya Verstraeten
E-mail: S.verstraeten@vic.cw
Telefòn: 839-2173