Enkuesta Nashonal di salú 2017

E pagina akí ta ofresé informashon riba e Enkuesta Nashonal di Salú ku Instituto di Salubridat Públiko Kòrsou (VIC) i Ofisina Sentral di Statistik (CBS) lo tene di 14 di yanüari pa 25 di febrüari próksimo.

E raport ku resultadonan di Enkuesta Nashonal di Salú 2013 ta inkluì akì.

Meta di enkuesta

Kuantu hende na Kòrsou tin diabétis i sobrepeso? Kuantu nos ta move i kuantu di nos ta usa un òf mas fasilidat di kuidi di salú? Kada kuater aña, Enkuesta Nashonal di Salú ta duna un bista di esaki.

Gobièrnu ta usa e resultadonan di e enkuesta akí den su maneho di salubridat. Ademas, gobièrnu por organisá aktividat, ku meta spesífiko na bista, pa mehorá salubridat i bienestar di poblashon. Di e manera ei nos por identifiká e problemanan di salú ku ta mas relevante tantu pa awor komo pa futuro.

Pregunta

E enkuesta akí tin pregunta tokante salú, estilo di bida i uso di servisionan di salubridat. E enkuesta no ta trata solamente salú físiko, sino tambe kon e persona ta sinti i kon ta bai kuné tantu den sentido mental/emoshonal komo sosial.

E kuestionario ta kuminsá ku algun pregunta general tokante sekso, edat, nivel di enseñansa, estado sivil i tokante e hendenan ku ta biba na e kas en kuestion. Tambe e enkuesta ta trata, entre otro, enfermedat króniko, leshon, limitashon físiko, problema mental/emoshonal, alimentashon, moveshon, humamentu, alkohòl, bishita hasí na diferente dunadó di kuido di salú, i kon satisfecho e persona ta ku e kuido risibí.

Entrevistadó

Tur entrevistadó tin un badge ku nan dato personal/potrèt/logo di CBS i firma di e direktor di CBS. E entrevistadó ta obligá di legitimá su mes na momentu di e bishita.

Por bèl CBS semper pa verifiká si na e momentu akí tin un enkuesta ta tumando lugá i pa kontrolá nòmber di e entrevistadó. E number di telefòn di CBS pa hasi esaki ta 462-6226 òf 462-6227.

Anonimidat

CBS lo prosesá tur informashon risibí di e enkuesta di un forma anónimo. No tin manera pa konektá e informashon pidí den e kuestionario ku un persona individual. 

CBS ta tene su mes estriktamente na e lei di sekresia. Artíkulo 5, insiso 2 di e lei di statistik (Statistiekwet) ta obligá CBS pa atendé tur informashon ku a kompilá estriktamente konfidensial. E mesun lei akí ta konta tambe pa e entrevistadónan. Tur entrevistadó ta obligá pa legitimá su mes na momentu di e bishita.

Bo ke sa mas?

Bo ke mas informashon tokante e investigashon? Tuma kontakto ku di lider di proyekto akí:

Drs. Soraya Verstraeten
E-mail: S.verstraeten@vic.cw
Telefòn: 839-2173