Enkuesta nashonal di salú 2013

Un enkuesta di populashon ta e método mas preferí den hopi pais pa hasi un estudio di salú di poblashon. Enkuesta bou di poblashon ta duna informashon tokante di eksperensha di salú, keho di salú, uso di kuido médiko, faktor di rísiko den komunidat i e ta duna nos e oportunidat pa analisá e data di status demográfiko, sosio-ekonómiko i edat.

E nesesidat pa hasi un enkuesta di poblashon periódikamente tambe ta indiká den e plan di maneho di prevenshon integral 2011-2015, ku ta indiká ku e implementashon di enkuesta di salu ta un aktividat krusial ku ta kondusí na realisashon di e ophetivonan den e plan di prevenshon. E ta suministrá informashon balioso pa e desaroyo di aktividat di prevenshon nobo nos por hus'é tambe komo un indikadó di monitor pa aktividat eksistente.

Pa motibu di esaki, VIC ta prepará un enkuesta bou di e poblashon, ta ehekut’é i ta reportá e datonan. E koperashon entre VIC proyekto tim, CBS i RIVM, ku a kuminsá den 2011 ta haña atenshon.

E resultadonan di e enkuesta akì ta duna nos informashon balioso den e aria di eksperensha de salú di e poblashon i e uso di fasilidat di kuido médiko. A base di e resultadonan, Kòrsou salu, parti di VIC, lo desaroyá programa realístiko pa promové un patronchi di alimentashon mas salú i pa enkurashá e poblashon di Kòrsou pa move mas.