Preshon haltu

Un di kada sinku adulto na Kòrsou tin preshon haltu

Na 2017, 21% di adulto na Kòrsou a kontestá ku nan tin preshon haltu (hipertenshon). Esei ta algu ménos ku 26.000 adulto na Kòrsou. E porsentahe di hende muhé ku preshon haltu tabata mas haltu (23%) ku e porsentahe di hende hòmber (19%). Segun edat ta subi, e kantidat di adulto ku preshon haltu ta oumentá konsiderablemente. 

Gráfiko: Porsentahe di adulto ku preshon haltu pa kada sekso i grupo di edat, na 2017

Fuente: Enkuesta Nashonal di Salú 2017

Adulto ku státus sosioekonómiko abou ta sufri mas di preshon haltu

Preshon haltu ta mas frekuente serka adulto ku státus sosioekonómiko abou, kompará ku adulto ku státus sosioekonómiko mas haltu. Esei ta nifiká ku hende ku nivel di enseñansa abou i hende ku tin hopi difikultat pa kubri nan gastunan ku e entrada di famia ta sufri mas frekuentemente di preshon haltu.

Gráfiko: Porsentahe di adulto ku preshon haltu pa kada nivel di enseñansa i kapasidat pa kubri gastu, na 2017

Fuente: Enkuesta Nashonal di Salú 2017

Preshon haltu ta oumentá atraves di añanan

Di 1993 pa 2017, e porsentahe di adulto ku preshon haltu a subi di 15% te 21%. Na kada un di e momentonan ku a midi e aspekto akí bou di poblashon, preshon haltu tabata mas frekuente serka hende muhé ku serka hende hòmber: 17% vs. 11% na 1993, i 23% vs. 19% na 2017 (ENS 2013, 2017, Senso 2011, Alberts et al., 1996).

Gráfiko: Tendensia den preshon haltu serka adulto na Kòrsou, 1993 - 2017

Fuente: Enkuesta Nashonal di Salú 2017 i 2013; Senso 2011; Curaçao Health Study 1993/1994

Data disponibel

Hustifikashon

Definishon

Ki ora por bisa ku un hende tin hipertenshon? Pa adulto, ta papia di hipertenshon òf preshon haltu ora e persona:

  • tin un preshon máksimo (preshon sistóliko, PS) di 140 mmHg òf mas, i/òf
  • tin un preshon mínimo (preshon diastóliko, PD) di 90 mmHg òf mas, i/òf
  • ta usa remedi pa baha preshon (antihipertensivo).

Di akuerdo ku e definishon internashonal akí, hende ku tin un preshon di sanger normal pasobra nan ta usa remedi pa baha preshon tambe ta kai den e grupo di pashènt di hipertenshon, tantu for di punto di bista médiko komo pa investigashon na gran eskala (Volksgezondheidenzorg.info, 2017).

Método

CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú, i komportashon relashoná ku salú, di poblashon di Kòrsou.

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Senso: Un senso ta duna un bista di e sirkunstansianan di bida di poblashon na un momento spesífiko. Bo por kompará e resultadonan ku resultado di otro konteo anterior pa haña un bista kon sierto asuntu a desaroyá den pasado, i pa asina por antisipá desaroyo den futuro. A yega di tene sinku senso na Kòrsou: na 1972, 1992, 2001 i 2011. 

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

Fuente

Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.

Centraal Bureau voor de Statistiek (2011). Gezondheid en beperkingen in Curaçao. Willemstad, Centraal Bureau voor de Statistiek.

PAHO (2018). Sterftecijfers Curaçao 2001-2007. Dataset optenibel via PAHO mortality database: https://hiss.paho.org/pahosys/grp.php

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Konsultá via   https://www.volksgezondheidenzorg.info/onderwerp/bloeddruk/cijfers-context/huidige-situatie#definitie--node-wanneer-er-sprake-van-hypertensie  RIVM: Bilthoven, 7 januari 2018.