Kasi 4.500 hende ku enfermedat kardiobaskular

Na 2017 tabatin aproksimadamente 4.486 adulto ku enfermedat kardiobaskular: 1.934 hende hòmber i 2.552 hende muhé. E kálkulo akí ta basá riba dato di Enkuesta Nashonal di Salú. Hende ku tabata kedando den un institushon di kuido no ta kontá den e kálkulo akí.

E porsentahe di adulto ku a duna di konosé ku nan tin un enfermedat kardiobaskular ta igual pa hende muhé (3,7%) i hende hòmber (3,7%), i e porsentahe akí ta subi ku edat. E grupo ku e porsentahe di mas haltu ta e grupo di 65+ (9%). Lo siguiente ta kai bou di enfermedat kardiobaskular: enfermedat koronario, atake serebral i atake di kurason. Di nan tur, esun mas frekuente ta enfermedat koronario.

Gráfiko: porsentahe di adulto ku enfermedat kardiobaskular pa kada sekso i grupo di edat, 2017

Fuente: Nationale Gezondheidsenquête 2017

Diferente faktor ta determiná e riesgo di enfermedat kardiobaskular

Tin diferente faktor interkonektá ku ta determiná e riesgo di enfermedat kardiobaskular. Faktor relashoná ku estilo di bida, manera alimentashon, humamentu i ehersisio, tin efekto riba desaroyo di enfermedat kardiobaskular. Tin bes e efekto ta direkto, pero hopi bes e ta indirekto. Den kaso asina, e efekto por tin di aber ku sierto faktor di riesgo spesífiko di e persona, manera un nivel di kolèsteròl muchu haltu den sanger, preshon haltu, sobrepeso i diabétis melítus (Volkgezondheidenzorg.info, 2020).

Enfermedat kardiobaskular ta mas frekuente serka adulto ku státus sosioekonómiko abou

Na Kòrsou, e gruponan ku a raportá enfermedat kardiobaskular ku mas frekuensia ta esnan ku un nivel di enseñansa mas abou i esnan ku tin hopi difikultat pa kubri nan gastunan ku e entrada di famia.

Gráfiko: porsentahe di adulto ku enfermedat kardiobaskular pa kada nivel di enseñansa i kapasidat pa kubri gastu, 2017

Fuente: Nationale Gezondheidsenquête 2017

Enfermedat kardiobaskular ta e kousa prinsipal di morto na Kòrsou

Di 2005 pa 2007, enfermedat kardiobaskular tabata e kousa prinsipal di morto na Kòrsou (39% di tur morto). Den e periodo akí, na tur, 1.228 persona a muri komo konsekuensia di enfermedat kardiobaskular; esei ta un promedio di 409 kaso pa aña. Esaki ta representá 206,0 pa kada 100.000 persona. Mortalidat komo konsekuensia di enfermedat kardiobaskular pa kada 100.000 persona ta oumentá drástikamente ku edat. Den tur grupo di edat bou di 75 aña, morto komo konsekuensia di enfermedat kardiobaskular ta mas frekuente serka hende hòmber ku serka hende muhé. For di edat di 75 aña p'ariba, morto komo konsekuensia di enfermedat kardiobaskular pa kada 100.000 persona ta mas frekuente serka hende muhé ku serka hende hòmber.

Gráfiko: morto komo konsekuensia di enfermedat kardiobaskular pa kada 100.000 persona, 2005-2007

Fuente: PAHO mortality database, ICD10-code I00-I99

Morto komo konsekuensia di enfermedat kardiobaskular: tendensia di 1980-2007

Den e periodo di 1980-2007, e sifra di mortalidat komo konsekuensia di enfermedat kardiobaskular a baha: di 286 pa kada 100.000 persona den e periodo di 1980-1984 te na 206 pa kada 100.000 persona den e periodo di 2005-2007.

Gráfiko: morto komo konsekuensia di enfermedat kardiobaskular, 1980-2007

Fuente: PAHO mortality database, ICD10-code I00-I99