Alkohòl

Kasi 4% di adulto ta bebe alkohòl di mas

Na 2017, 4% di e poblashon di 18 aña p’ariba a bebe alkohòl di mas: 7% di hende hòmber i 2% di hende muhé. Bebe di mas ta nifiká ku e persona ta bebe mas ku 21 glas di alkohòl pa siman den kaso di hende hòmber òf mas ku 14 glas pa siman si ta trata di hende muhé. E grupo den kua bebementu di mas ta ménos frekuente ta e grupo di hóben adulto di 18 te ku 24 aña.

Kasi 42% di adulto no ta bebe alkohòl

Di henter e poblashon di 18 aña p’ariba, 42% no ta bebe alkohòl: 31% di hende hòmber i 51% di hende muhé. Di nan, 9% tabata bebe alkohòl antes sí, pero den e 12 lunanan promé ku e entrevista no mas. Gezondheidsraad ta rekomendá hende pa no bebe alkohòl òf en todo kaso no bebe mas ku un glas pa dia. E konseho akí ta pa evitá enfermedat króniko. (Gezondheidsraad, 2015)

Gráfiko: bebedó di mas, di 18 aña p’ariba, na 2017

Fuente: Enkuesta Nashonal di Salú 2017

Tin mas tantu hende hòmber ta bebe di mas, kompará ku hende muhé

Bou di tur e gruponan di edat adulto, e porsentahe di hende hòmber ku ta bebe di mas ta mas haltu ku di hende muhé. Bebe di mas ta nifiká ku e persona ta bebe mas ku 21 glas di alkohòl pa siman den kaso di hende hòmber òf mas ku 14 glas pa siman si ta trata di hende muhé. E diferensia entre hende hòmber i hende muhé ta mas grandi den e grupo di 45 te ku 64 aña di edat. Serka hende hòmber, bebementu di mas ta mas frekuente den e grupo di 45 te ku 64 aña, i serka hende muhé, den e grupo di 25 pa 44 aña.

Gráfiko: bebedó di mas, di 18 aña p’ariba, na 2017

Fuente: Enkuesta Nashonal di Salú 2017

E grupo ku e nivel di enseñansa mas abou ta kaminda tin ménos bebedó di mas i bebedó pisá

E grupo kaminda bebementu di mas ta ménos frekuente ta di esnan ku e nivel di enseñansa mas abou, i e grupo kaminda e ta mas frekuente ta esnan ku e nivel di enseñansa mas haltu. Bebe di mas ta nifiká ku e persona ta bebe mas ku 21 glas di alkohòl pa siman den kaso di hende hòmber òf mas ku 14 glas pa siman si ta trata di hende muhé. Bebementu pisá tambe ta ménos frekuente den e grupo ku e nivel di enseñansa mas abou. Bebe pisá ta nifiká ku un biaha pa siman òf mas, e persona ta konsumí kuater (den kaso di hende muhé) òf seis (hende hòmber) glas di alkohòl tras di otro. Pa loke ta trata e resultadonan akí, no a tene kuenta ku diferensia di edat i sekso den e gruponan di nivel di enseñansa.

Gráfiko: bebedó di mas, pa kada nivel di enseñansa, na 2017

Fuente: Enkuesta Nashonal di Salú 2017

Poko diferensia den uso di alkohòl entre e nivelnan di difikultat pa kubri gastu

Ora parti e kontestanan a base di kon bon e famia por kubri su gastunan ku e entrada di famia, e diferensianan den uso di alkohòl entre e gruponan akí ta mas chikitu, kompará ku e diferensianan a base di nivel di enseñansa. Bebementu di mas i bebementu pisá ta mas frekuente den e grupo ku tin djis un tiki difikultat pa kubri gastu. (ENS 2017)

Uso di alkohòl bou di adulto ta bahando

Di 1993 pa 2017, e kantidat di adulto di 18 aña p’ariba ku a bebe alkohòl den e último 12 lunanan a baha di 67 pa 58%. Tantu na 1993 komo na 2013, e porsentahe di hende hòmber ku ta bebe alkohòl tabata mas haltu ku e porsentahe di hende muhé (2013: 71% vs. 55% i 1993: 81% vs. 61%. (ENS 2013, 2017, Alberts et al., 1996)

Gráfiko: tendensia den uso di alkohòl bou di adulto 1993 - 2017

Fuente: Enkuesta Nashonal di Salú 2017 & 2013; Curaçao Health Study 1993/1994

Mas tantu mucha hòmber a yega di bebe alkohòl, kompará ku mucha muhé 

Di tur mucha di skol di 12 te ku 17 aña den enseñansa avansá i e promé dos klasnan di SBO, 41% a bebe alkohòl den e luna promé ku e enkuesta a tuma lugá. No tin mashá diferensia entre mucha hòmber i mucha muhé pa loke ta trata uso di alkohòl den e luna anterior (44 i 38%). Un di kada sinku mucha di skol (22%) a yega di bebe asina tantu alkohòl ku el a bira burachi; mas o ménos mes tantu mucha hòmber (23%) ku mucha muhé (20%). Kasi un tersera parti di e muchanan di skol ku a bebe alkohòl den e luna anterior a haña e alkohòl serka famia (30%), un kuart den tienda (24%) i 14% serka amigu.

Gráfiko: uso di alkohòl bou di mucha di skol na 2015

Fuente: Global School-based Student Health Survey Curaçao 2015

Kasi mitar di tur mucha di skol a yega di bebe alkohòl

Di tur mucha di skol di 12 te ku 17 aña den enseñansa avansá i e promé dos klasnan di SBO, 41% a bebe alkohòl e luna promé ku e enkuesta a tuma lugá. Manera ta di spera, konsumo di alkohòl ta subi ku edat. Di e muchanan di skol ku a yega di bebe alkohòl, un poko mas ku mitar (52%) a bebe nan promé glas di alkohòl promé ku nan a kumpli 14 aña. No tin mashá diferensia entre mucha hòmber i mucha muhé (55 i 49%) pa loke ta trata uso di alkohòl for di edat yòn (promé ku nan kumpli 14 aña).

Gráfiko: uso di alkohòl bou di mucha di skol pa kada grupo di edat na 2015


Fuente: Global School-based Student Health Survey Curaçao 2015

Nivel di enseñansa i uso di alkohòl 

Un di kada tres (34%) mucha di skol na e skolnan AGO a yega di bebe asina tantu alkohòl ku el a bira burachi, kompará ku un di kada seis (17%) mucha di skol HAVO/VWO. Na e skolnan VSBO, e porsentahe akí ta 19%. Ademas, mas tantu hóben den enseñansa AGO a bebe alkohòl e luna promé ku e entrevista, kompará ku e hóbennan na skol HAVO/VWO (48% i 36% respektivamente). Tambe, mas tantu mucha di skol AGO a yega di tin problema ku famia òf amigu, falta skol òf haña nan den pleitu pa kousa di uso di alkohòl, kompará ku mucha di skol HAVO/VWO (15% i 4% respektivamente). Bou di e hóbennan na skol VSBO, 38% a bebe alkohòl e luna promé i 7% a yega di haña nan den problema debí ku nan a usa alkohòl. Uso di alkohòl ta mas frekuente bou di mucha di skol den e promé 2 klasnan di skol SBO: 54% di e alumnonan di SBO a bebe alkohòl e luna promé i 33% a yega di bira burachi. Den e resultadonan akí, no a tene kuenta ku diferensia di edat i sekso den e gruponan di nivel di enseñansa.

Gráfiko: uso di alkohòl bou di mucha di skol pa kada nivel di enseñansa na 2015

Fuente: Global School-based Student Health Survey Curaçao 2015

Komo promedio, 6 persona a muri pa aña komo konsekuensia di uso di alkohòl

Den e periodo di 2001 te ku 2007, 40 persona a fayesé komo konsekuensia di uso di alkohòl (sin konta kousa eksterno manera aksidente di tráfiko). Esaki ta un promedio di 6 persona pa aña. Mas hende hòmber a muri komo konsekuensia di uso di alkohòl kompará ku hende muhé di 2001 pa 2007.  

Tabèl: morto komo resultado di uso di alkohòl*

Period0
Hòmber
Muhé
Total
2001-2004
20
8
28
2005-2007
10
2
12
Total
30
10
40

* kódigo ICD-10: F10, G31.2, G62.1, I42.6, K29.2, K70, K73, K74 (excl. K74.3-K74.5), K86.0

Downloads


Refrences

Bebe di mas: bebe mas ku 21 (pa hende hòmber) òf 14 (pa hende muhé) glas di alkohòl pa siman.

Bebe pisá: bebe mínimo seis (pa hende hòmber) òf kuater (pa hende muhé) glas di alkohòl riba un solo dia, por lo ménos un biaha pa siman.

Binge: bebe 5 glas di alkohòl òf mas na un okashon.

Kuminsá usa alkohòl na edat yòn: promé ku kumpli 14 aña

CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú i komportashon relashoná ku salú di poblashon di Kòrsou.

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

GSHS Curaçao 2015: Global School-based Student Health Survey (GSHS) ta un enkuesta di salú bou di mucha di skol di 12 te ku 17 aña. E ta forma parti di e investigashon GSHS internashonal, di Organisashon Internashonal di Salú (WHO). Meta di GSHS ta di haña un bista aktualisá di komportashon di mucha di skol na Kòrsou ku por afektá nan salú, i tambe tokante nan bienestar. Na Kòrsou, a tene e enkuesta pa di promé bes na 2015.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.

De Looze M, Van Dorsselaer S, De Roos S, Verdurmen J, Stevens G, Gommans R, et al. HBSC 2013. 
Gezondheid, welzijn en opvoeding van jongeren in Nederland. [Internet]. 2014. Geraadpleegd via 
http://www.hbsc-nederland.nl/uploads/publicaties/openbaar/HBSC_Rapport_2013.pdf

Gezondheidsmonitor (2012). Konsultá via https://www.cbs.nl/nl-nl/maatwerk/2013/37/uitkomsten-gezondheidsmonitor-2012.

Gezondheidsraad. Richtlijnen goede voeding 2015. Den Haag: Gezondheidsraad; 2015. https://www.gezondheidsraad.nl/sites/default/files/201524_richtlijnen_goede_voeding_2015.pdf

PAHO (2018). Sterftecijfers Curaçao 2001-2007. Dataset disponibel via PAHO mortality database: https://hiss.paho.org/pahosys/grp.php

Verstraeten S. (2016). The Curaçao Global School-based Student Health survey (GSHS) Study 2015. Volksgezondheid Instituut Curaçao, Willemstad.

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith - Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

World Health Organization (2017). Konsultá via http://www.who.int/gho/en/