Artrósis

Mas o ménos 5.900 hende ta sufri di artrósis

Na 2017, segun kálkulo tabatin 5.901 adulto ku ta sufri di artrósis: 2.033 hende hòmber i 3.868 hende muhé. Na tur, esei ta 5% di poblashon adulto. Artrósis ta mas frekuente serka hende muhé (6%) ku serka hende hòmber (4%). E porsentahe di hende ku artrósis ta subi basta ku edat, i ta mas haltu den e grupo di 65+.

Gráfiko: Porsentahe di adulto ku artrósis, pa kada sekso i grupo di edat, na 2017

Fuente: Enkuesta Nashonal di Salú 2017

Artrósis ta mas frekuente serka esnan ku e nivel di enseñansa di mas abou 

Na 2017, 5% di adulto na Kòrsou a kontestá ku nan ta sufri di artrósis. Artrósis ta mas frekuente den e grupo di persona ku e nivel di enseñansa di mas abou i serka esnan ku tin hopi difikultat pa kubri nan gastunan ku e entrada di famia.

Gráfiko: Porsentahe di adulto ku artrósis, pa kada nivel di enseñansa i kapasidat pa kubri gastu, na 2017

Fuente: Enkuesta Nashonal di Salú 2017

Downloads

Refrences

Definishon

Artrósis (artrítis di wesu), esta, gastamentu di skarnir ta un di e enfermedatnan di skarnir mas komun ku ta afektá hende su órganonan di moveshon. E ta afektá prinsipalmente hende di edat. E karakterístikanan ophetivo di mas importante ku por ser opservá den kaso di artrósis ta deformashon, pèrdida di kartílago (‘kraakbeen’) i kresementu reaktivo di wesu di mas (osteofito) na skarnir. Esei ta pone ku e skarnir ta pèrdè su forma normal, loke ta okashoná keho (doló), kurpa steif mainta i despues di un periodo di inaktividat, i limitashon di e persona su abilidat di move (Volksgezondheidenzorg.info, 2017).

Método

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Fuente

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Konsultá via https://www.volksgezondheidenzorg.info/onderwerp/artrose/cijfers-context/huidige-situatie#definities, RIVM: Bilthoven, 7 januari 2018.