Kanser na pechu

Kanser na pechu ta e tipo di kanser mas frekuente serka hende muhé

Di 2009 pa 2011, tabatin 81 kaso nobo di kanser na pechu pa kada 100.000 hende muhé. Esei ta 307 kaso nobo na tur i un promedio di 102 kaso pa aña. Kanser na pechu ta e tipo di kanser mas frekuente serka hende muhé. Serka hende muhé bou di 25 aña, kasi no tin niun kaso di kanser na pechu. Di 25 aña p’ariba, e kantidat di kaso nobo ta kuminsá oumentá. Den e grupo di edat di 75-79 aña, e kantidat di kaso nobo registrá ta mas abou ku serka e gruponan di edat mas yòn ku ta bin nèt promé. Esei probablemente ta debí ku 75 aña ta e edat ora ku no ta manda yama hende muhé mas pa bai hasi tèst preventivo di kanser na pechu.

Gráfiko: Insidensia anual di kanser na pechu pa kada 100.000 hende muhé, pa kada grupo di edat, 2009-2011

Fuente: Registro di kanser di Analytisch Diagnostisch Centrum N.V., ICD10-code C50

Dos tersera parti di e grupo meta a hasi un tèst di kanser na pechu 

Na 2017, 67% di e hende muhénan di 50 te 75 aña a hasi un tèst di kanser na pechu (mamografia) den e dos añanan promé ku e entrevista. Na 2013, e porsentahenan akí tabata basta paresido: 44% di tur hende muhé i 63% di e hende muhénan di 50 te 75 aña.

Mamografia ta ménos frekuente serka hende muhé ku un státus sosioekonómiko abou

Hende muhé ku un státus sosioekonómiko abou ta hasi tèst di kanser na pechu ku ménos frekuensia kompará ku hende muhé ku un státus sosioekonómiko mas haltu. Hende muhé ku un nivel di enseñansa mas abou i ku tin hopi difikultat pa kubri nan gastunan ku e entrada di famia ta hasi tèst di kanser na pechu ku ménos frekuensia.

Gráfiko: Porsentahe di hende muhé, pa kada nivel di enseñansa i kapasidat pa kubri gastu, ku a hasi un mamografia den e último 2 añanan, na 2017

* Basá riba ménos ku 100 opservashon i p’esei no inkluí den e relato

Fuente: Enkuesta Nashonal di Salú 2017

Pa aña, kasi 30 hende muhé a muri komo konsekuensia di kanser na pechu

Di 2015 pa 2017, 85 hende muhé a muri komo konsekuensia di kanser na pechu; un promedio di 28 kaso pa aña. Esei ta 40,2 pa kada 100.000 hende muhé. Morto komo konsekuensia di kanser na pechu ta oumentá ku edat i ta un di e kousanan prinsipal di morto serka hende muhé den e kategoria di edat di 35 pa 54 aña. Den e mesun periodo ei, 1 hòmber a muri komo konsekuensia di kanser na pechu.

Gráfiko: Morto pa kada 100.000 hende muhé, 2005-2007

Fuente: Statistik di kousa di morto, ICD10-code C50

Downloads

Refrences

Definishon

Kanser na pechu: un hende ku kanser na pechu tin tumor (maligno) den su pechu. Kanser na pechu ta presentá prinsipalmente serka hende muhé, aunke hende hòmber tambe por haña kanser na pechu. E karakterístikanan i desaroyo di e enfermedat deskribí aki ta tokante kanser na pechu serka hende muhé so (Volksgezondheidenzorg.info, 2017).

Pa tèst kanser na pechu, ta hasi radiografia (saka potrèt) di e persona su pechunan i studia esaki pa wak si tin algu ku no ta normal. Na Hulanda, gobièrnu a fiha ku hende muhé di 50 te 75 aña mester hasi tèst di kanser na pechu (mamografia) kada 2 aña (RIVM, 2018).

Método

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Registro di kanser: Departamento di patologia di Analytisch Diagnostisch Centrum tin un base di dato tokante insidensia (kantidat di kaso nobo) i prevalensia (kantidat di kaso eksistente) di kanser na Kòrsou. E base di dato ta kontené informashon di tur kaso di tumor maligno diagnostiká na Kòrsou.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

Fuente

Cancer Incidence in Five Continents, Vol. XI (electronic version). Lyon: International Agency for Research on Cancer. Konsultá via: http://ci5.iarc.fr. 13 april 2018.

PAHO (2018). Sterftecijfers Curaçao 2001-2007. Dataset disponibel via PAHO mortality database: https://hiss.paho.org/pahosys/grp.php

RIVM (2018). Konsultá via http://www.rivm.nl/Onderwerpen/B/Bevolkingsonderzoek_borstkanker

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.