Kolèsteròl

Mas ku 12.000 hende ku kolèsteròl haltu

Na 2017, segun kálkulo tabatin 12.414 adulto ku kolèsteròl muchu haltu (hiperkolèsteròlemia): 4.455 hende hòmber i 7.959 hende muhé. Na tur, esei ta 10% di poblashon adulto. Kolèsteròl haltu ta mas frekuente serka hende muhé (12%) ku serka hende hòmber (8%). E porsentahe di hende ku kolèsteròl haltu ta oumentá ku edat i e grupo di 65+ tin e porsentahe di mas haltu.

Na 2013, 10% di adulto tabatin kolèsteròl haltu. Esei ta meskos ku na 2017. Na 2013 tambe kolèsteròl haltu tabata mas frekuente serka hende muhé (12%) ku serka hende hòmber (8%) (ENS 2013).

Gráfiko: Porsentahe di adulto ku kolèsteròl haltu, pa kada sekso i nivel di enseñansa, na 2017

Fuente: Enkuesta Nashonal di Salú 2017

Kolèsteròl haltu ta mas frekuente serka adulto ku un státus sosioekonómiko mas abou 

Na 2017, 10% di poblashon adulto na Kòrsou a kontestá ku nan tin kolèsteròl haltu. Na Kòrsou, kolèsteròl haltu ta mas frekuente serka hende ku un nivel di enseñansa abou i esnan ku tin hopi difikultat pa kubri nan gastunan ku e entrada di famia.

Gráfiko: Porsentahe di adulto ku kolèsteròl haltu, pa kada nivel di enseñansa i kapasidat pa kubri gastu, na 2017

Fuente: Enkuesta Nashonal di Salú 2017

Downloads

Refrences

Definishon

Kolèsteròl ta un supstansia paresido na vèt, ku kurpa di hende tin mester komo material pa traha sèl di kurpa i hormona. Kolèsteròl ta ser trahá mas parti den higra. Un parti chikitu di e kolèsteròl ku tin den kuminda ta drenta den sanger. Konsumo di vèt saturá tin mas tantu influensia riba e nivel di kolèsteròl den sanger, kompará ku e kolèsteròl ku tin den kuminda. Den nos kurpa, e lipoproteinanan HDL, LDL i VLDL ta transportá kolèsteròl i triglisérido (vèt di den sanger). E kantidat di triglisérido i proteina den e diferente lipoproteinanan akí ta varia. Mas tantu triglisérido i kolèsteròl tin den un partíkula, ménos pisá e ta. Pues, LDL ta kontené mas tantu triglisérido i kolèsteròl, kompará ku HDL (Volksgezondheidenzorg.info, 2017). 

Método

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Fuente

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017): Konsultá via https://www.volksgezondheidenzorg.info/onderwerp/cholesterol/cijfers-context/huidige-situatie#definities, RIVM: Bilthoven, 7 januari 2018.