Enfermedat króniko i multimorbides

Kasi 45.000 adulto na Kòrsou tin un òf mas enfermedat króniko

Na 2017, segun kálkulo, tabatin 45.007 adulto ku un òf mas enfermedat króniko. Na tur, esei ta 37% di poblashon adulto. Enfermedat króniko ta mas frekuente serka hende muhé (41%) ku serka hende hòmber (32%). Den e grupo di 65 aña òf mas, 50% tin un òf mas enfermedat króniko. E porsentahenan akí ta basá riba loke e personanan en kuestion mes a kontestá ora a puntra nan si nan ta sufri di sierto enfermedat. A selektá 12 enfermedat króniko spesífiko pa puntra tokante dje (wak e sekshon di Definishon). Un enfermedat frekuente ku a laga afó ta hipertenshon (preshon haltu).

Un di kada 8 adulto tin 2 òf mas enfermedat króniko 

Un di kada ocho (13%) adulto tin dos òf mas enfermedat króniko (multimorbides). Den e grupo di 65 aña òf mas, 20% tin dos òf mas enfermedat króniko.

Un enfermedat króniko ta un enfermedat di durashon largu i di kua e pashènt no tin perspektiva di rekuperá kompletamente un dia. Tratamentu di enfermedat króniko ta rekerí uso kontinuo di servisionan di salubridat. Hende ku enfermedat króniko tin ménos kalidat di bida kompará ku adulto salú. Tambe, enfermedat króniko tin efekto riba kon un hende ta sinti tokante su salú i riba su funshonamentu diario (RIVM). Debí ku hende ku enfermedat króniko tin ku hasi uso mas frekuentemente di servisio di salubridat i riba base kontinuo, nan gastunan di salubridat ta relativamente haltu (Hoffman et al., 1996).

Gráfiko: Porsentahe di adulto ku un enfermedat króniko i multimorbides, pa kada sekso i grupo di edat, na 2017

Fuente: Enkuesta Nashonal di Salú 2017

Adulto ku un státus sosioekonómiko mas abou ta sufri mas frekuentemente di un òf mas enfermedat króniko

Na 2017, 37% di e adultonan na Kòrsou tabatin un òf mas enfermedat króniko. Na Kòrsou, enfermedat króniko i multimorbides (dos òf mas enfermedat króniko) ta mas frekuente serka esnan ku tin un nivel di enseñansa mas abou i esnan ku tin hopi difikultat pa kubri nan gastunan ku e entrada di famia. 

Gráfiko: Porsentahe di adulto ku enfermedat króniko i multimorbides, pa kada nivel di enseñansa i kapasidat pa kubri gastu, na 2017

Fuente: Enkuesta Nashonal di Salú 2017

Downloads

Refrences

Definishon

Kiko ta enfermedat króniko? Ta definí enfermedat króniko komo un enfermedat pa kua generalmente no tin perspektiva di rekuperashon kompleto. Generalmente, enfermedat króniko ta bai kompañá pa doló, sufrimentu mental, limitashon di e persona su kapasidat pa funshoná òf otro kehonan. Kuantu molèster e persona ta eksperensiá ta varia di un hende pa otro i di un enfermedat pa otro (Volksgezondheidinfo, 2017).

Kiko ta multimorbides? Multimorbides ta e nòmber ku generalmente ta usa ora un persona tin mas ku un enfermedat (króniko) den e mesun periodo (Volksgezondheidinfo, 2017).

Lista di enfermedat króniko

  • Asma (inkluso asma alérgiko)
  • Enfermedat na nèk òf otro problema króniko di nèk
  • Enfermedat na parti abou di lomba òf otro problema króniko di parti abou di lomba
  • Gastamentu di skarnir (artrósis), ku eksepshon di artrítis (inflamashon di skarnir)
  • Atake serebral (sangramentu òf infarto di serebro) òf konsekuensia króniko di atake serebral
  • Enfermedat koronario (baso di sanger ku a bira smal) òf angina pectoris (doló den pechu)
  • Diabétis (suku)
  • Atake di kurason (infarto di miokardio) òf konsekuensia króniko di atake di kurason
  • Kanser, inkluso leukemia i linfoma (kanser na glándula linfátiko)
  • Enfermedat di pulmon, manera bronkítis króniko, enfermedat opstruktivo króniko di pulmon (COPD) i enfisema
  • Migrèn
  • Orinamentu inboluntario (inkontinensia)

Método

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Fuente

Hoffman, C., Rice, D. & Sung, H.Y. (1996). Persons with chronic conditions. Their prevalence and costs. Journal of American Medical Association, 18 (276), 1473-1479.

RIVM (2013). Aantal chronische zieken neemt toe. Konsultá via http://www.rivm.nl/Documenten_en_publicaties/Algemeen_Actueel/Nieuwsberichten/2013/Aantal_chronisch_zieken_neemt_toe

Verstraeten S., Griffith-Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Konsultá via  https://www.volksgezondheidenzorg.info/onderwerp/chronische-ziekten-en-multimorbiditeit/cijfers-context/prevalentie#definities