Klamidia

Klamidia ta e enfermedat (bakterial) mas frekuente transmití seksualmente 

Na 2016, Analytisch Diagnostisch Centrum (ADC) a diagnostiká 612 hende na Kòrsou ku klamidia. Esei ta 13% di e hendenan ku a tèst via ADC. Esaki ta nifiká ku klamidia ta e enfermedat (bakterial) mas frekuente transmití seksualmente, segun e datonan registrá na ADC.

Klamidia ta relativamente frekuente na edat yòn

Klamidia ta relativamente frekuente serka hende di 15 te ku 34 aña di edat. Na 2016, 84% di hende muhé i 75% di hende hòmber ku klamidia tabata den e grupo di 15 te ku 35 aña di edat. Pa tur dos sekso, e porsentahe di tèst positivo tabata mas haltu serka e grupo di 15 te ku 20 aña.

Gráfiko: tèst PCR positivo di klamidia pa kada grupo di edat na 2016

Fuente: ADC


Ménos tèst positivo serka hende hòmber

Di 2011 padilanti, e porsentahe di tèst ku resultado positivo serka hende hòmber a bin ta baha. Serka hende muhé, e porsentahe di tèst positivo di klamidia a keda stabil di 2011 padilanti, fluktuando entre 12,5 i 13,7%.

Gráfiko: tèst PCR di klamidia ku resultado positivo di 2008 te ku 2016

Fuente: ADC

Kantidat di tèst di klamidia a oumentá entre 2008 i 2015

Mas hende muhé ku hende hòmber ta hasi tèst di klamidia. E kantidat di tèst di klamidia na ADC a oumentá entre 2008 i 2015, tantu pa hende muhé komo hende hòmber. E kantidat di tèst di klamidia serka hende muhé i hende hòmber na 2016 a baha kompará ku 2015.

Gráfiko: kantidat di tèst PCR di klamidia na 2008 - 2016

Fuente: ADC

Klamidia ta relativamente frekuente na febrüari, yüli i òktober 

A konstatá klamidia ku relativamente hopi frekuensia na febrüari, yüli/ougùstùs i òktober: 32% di e personanan ku klamidia ku a tèst positivo na 2016 a tèst den un di e lunanan ei.

Gráfiko: tèst PCR positivo di klamidia pa kada luna na 2016

Fuente: ADC

Downloads

Refrences

Definishon

Ta un bakteria ta kousante di klamidia. Klamidia ta un enfermedat transmití seksualmente (ETS) kousá pa e bakteria chlamydia trachomatis. Klamidia ta pega via kontakto seksual sin protekshon (klamidia urogenital, anorektal i oral), pero tambe di mama pa yu na momento di parto (klamidia perinatal) (Volksgezondheidenzorg.info, 2017).

E kantidat di hende ku a tèst positivo na ADC no nesesariamente ta un bon representashon di e kantidat di kaso nobo di ETS den e poblashon general, pasobra infekshon di klamidia por sosodé sin ku e persona infektá tin keho i algun di esnan ku no tin keho no ta bai dòkter. Tambe por tin hende ku tin keho i ku apesar di esei no ta bai tèst. Mayoria di hende ku hasi un tèst di ETS ta hasi esei pa un motibu spesífiko, por ehèmpel pasobra nan ta preokupá, pasobra nan ta bai drenta un relashon nobo òf pasobra nan ke stòp di usa kondon.

Método

ADC-NV. E resultadonan di tèst di klamidia na laboratorio nashonal Analytisch Diagnostisch Centrum  N.V. (ADC-N.V.) ta tumá di e sistema di registrashon di ADC. E resultadonan ta basá riba e asina yamá tèst PCR di klamidia. E tèst akí ta detektá DNA di klamidia den muestra di e pashènt. Pa kalkulá e sifranan presentá, VIC a usa e resultadonan di tèst di ADC i a konsultá ku e dòkter-mikrobiólogo. E sifranan ta basá riba e kantidat i porsentahe di tèst positivo di klamidia.

Fuente

Volksgezondheidenzorg.info (2017). Geraadpleegd via https://www.volksgezondheidenzorg.info/onderwerp/soa/cijfers-context/totaal#definities    RIVM: Bilthoven, 7 januari 2018.