Problema di prostat

Problema di prostat ta mas frekuente serka hende hòmber di 65 aña òf mas 

Na Kòrsou, 3% di hende hòmber tabatin problema di prostat na 2017. Serka hende hòmber bou di 44 di edat, práktikamente bo no ta topa problema di prostat. For di 44 aña p’ariba, e kantidat di hende hòmber ku problema di prostat ta kuminsá oumentá. Diestres porshento (13%) di hende hòmber di 65 aña òf mas tabatin problema di prostat.

Gráfiko: porsentahe di hende hòmber ku problema di prostat na 2017

Fuente: Enkuesta Nashonal di Salú 2017

Na 2013, e porsentahenan akí tabata basta paresido: 3% di tur hende hòmber i 12% di hende hòmber den e grupo di 65 aña òf mas. Na 1992 tambe 3% di hende hòmber a bisa ku nan tin problema di prostat (Alberts et al., 1996).

Hende hòmber ku un státus sosioekonómiko abou tin mas problema di prostat

Hende hòmber ku un státus sosioekonómiko abou tin mas problema di prostat, kompará ku hende hòmber ku státus sosioekonómiko mas haltu. Hende hòmber ku un nivel di enseñansa abou i ku tin hopi difikultat pa kubri nan gastunan ku e entrada di famia ta esnan ku tin mas tantu problema di prostat.  

Gráfiko: porsentahe di hende hòmber ku problema di prostat, pa kada nivel di enseñansa i kapasidat pa kubri gastu, na 2017

Fuente: Enkuesta Nashonal di Salú 2017

Downloads

Refrences

Definishon

Kiko ta problema di prostat? Prostat ta un glándula chikitu bou di hende su blas. Un hende hòmber su tubu di orina ta sali na su blas, pasa via e prostat i pénis bai pafó. Prostat ta produsí e líkido ku e sèlnan di spèrma ta landa den dje. Na momento ku un hende hòmber eyakulá, e líkido akí ta sali via e tubu di orina. Tin mes prostat ta hincha, prinsipalmente serka hende hòmber di mas edat. Den mayoria di kaso e hinchamentu akí ta benigno (hipertrofia benigno di prostat), pero e por ta debí na un tumor maligno tambe (karsinoma di prostat). Tin bes prostat por inflamá tambe (prostatítis).

Kua ta e kehonan ora un hende tin problema di prostat? Ora un prostat hincha, esei ta afektá e hende su orinamentu. E kehonan ku esei ta trese kuné ta entre otro ku ta bira difísil pa kuminsá oriná, e stral ta bira mas suak, ta bira mas difísil pa wanta orina, bo ta sinti ku no ta tur e orina ta kaba di sali i bo tin ku oriná ku mas tantu frekuensia, di dia i anochi. Den kaso di prostatítis, e kehonan ta difikultat pa oriná (ku ta presentá diripiente) i doló rònt di ano (Centrum voor consultatie en expertise, 2018).

Método

CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú i komportashon relashoná ku salú di poblashon di Kòrsou.

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Fuente

Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Centrum voor consultatie en expertise, 2018. Prostaataandoening. Geraadpleegd via https://www.cce.nl/somatiek/model-voor-analyse-van-probleemgedrag/analyse-van-factoren-die-verband-kunnen-houden-met-probleemgedrag/medische-factoren/somatische-aandoening/ziekten-van-urogenitale-stelsel/prostaataandoening?fromSearchType=abc