Síntoma di dengue, chikungunya i/òf zika ta loke e poblashon aktivo a raportá ku mas frekuensia, siguí pa alergia i preshon haltu

Den e 12 lunanan promé ku e entrevista, loke e poblashon aktivo (18 aña p’ariba) a raportá mas tantu ta síntoma di dengue, chikungunya i/òf zika (23%), siguí pa alergia (20%), preshon haltu (17%) i problema ku lomba (15%).

Gráfiko: porsentahe di poblashon aktivo (18 p’ariba) ku un enfermedat/problema di salú den e 12 lunanan promé ku e entrevista, 2017

 Fuente: Enkuesta Nashonal di Salú 2017

Un 43% di adulto ku ta hasi trabou kontra pago a yega di ta ousente debí na problema di salú

Na Kòrsou, 43% di adulto ku ta hasi trabou kontra pago ta bisa ku, den e 12 lunanan promé ku e entrevista, nan a yega di ta ousente di trabou debí na problema di salú. E pregunta akí no tabata den e Enkuesta Nashonal di Salú di 2013.

Gráfiko: porsentahe di adulto (ku ta hasi trabou kontra pago) ku a yega di ta ousente di trabou debí na problema di salú, pa kada sekso i grupo di edat, 2017

 Fuente: Enkuesta Nashonal di Salú 2017

Mas ousensia di trabou debí na problema di salú serka esnan ku un nivel di enseñansa haltu

Ousensia di trabou debí na problema di salú ta sosodé ku mas frekuensia serka hende ku un nivel di enseñansa haltu i esnan ku tin sierto difikultat pa kubri nan gastunan.

Gráfiko: porsentahe di adulto (ku ta hasi trabou kontra pago) ku a yega di ta ousente di trabou debí na problema di salú, pa kada státus sosioekonómiko, 2017

Fuente: Enkuesta Nashonal di Salú 2017

Komo promedio, hende na Kòrsou tabata ousente shete dia debí na problema di salú

Den e 12 lunanan promé ku e entrevista, komo promedio, hende ku ta hasi trabou kontra pago na Kòrsou tabata ousente di trabou durante shete dia debí na problema di salú. Un kuart (26%) di e adultonan ku ta hasi trabou kontra pago tabata ousente di trabou un siman òf mas i 4% tabata ousente mas ku un luna.

Gráfiko: porsentahe di adulto (ku ta hasi trabou kontra pago) pa kada durashon di ousensia debí na enfermedat, 2017

Fuente: Enkuesta Nashonal di Salú 2017

Un 11% di adulto ta presta ménos debí na strès òf problema emoshonal

Den e kuater simannan promé ku e entrevista, 11% di adulto na Kòrsou a presta ménos ku nan a deseá na trabou òf durante otro aktividat diario debí na strès òf problema emoshonal. Hende muhé ta indiká mas frekuentemente ku nan a presta ménos na trabou òf durante otro aktividat diario debí na strès òf problema emoshonal, kompará ku hende hòmber (NGE, 2013).

Gráfiko: porsentahe di adulto ku a presta ménos ku nan a deseá na trabou òf durante otro aktividat diario den e último kuater simannan debí na strès òf problema emoshonal, pa kada sekso i grupo di edat, 2013

Fuente: Enkuesta Nashonal di Salú 2013

Na 2019, e porsentahe di desempleo na Kòrsou a subi te na 21%

Na aprel di 2019, e porsentahe di desempleo na Kòrsou a subi te na 21%. Na sèptèmber di 2018, ainda e porsentahe di desempleo tabata 13%. Den e periodo akí, e kantidat di persona desempleá a subi di 9.424 (desèmber 2018) te na 15.464 (aprel 2019); un oumento di 64%. Apesar ku tamaño di e poblashon a baha den e periodo akí (2018-2019), e kantidat di persona desempleá a oumentá ku mas di 6000 persona.

Gráfiko: porsentahe di desempleo na Kòrsou 2005-2019

Fuente: CBS (labour)

Na Kòrsou, desempleo hubenil a subi ku ocho punto porsentual entre 2010 i 2017

Na 2017, e porsentahe di desempleo hubenil na Kòrsou tabata 33%. Esei ta un bahada na komparashon ku 2016. Na e aña ei, e porsentahe di desempleo hubenil tabata 37%. E porsentahe di desempleo hubenil ta indiká ki porsentahe di hóben di 15 pa 24 aña ta forma parti di forsa laboral i ta buskando trabou.

Gráfiko: porsentahe di desempleo hubenil na Kòrsou (2010–2017)

Fuente: CBS (labour)