search
close
Di 2009 pa 2011, tabatin 21.6 kaso nobo di kanser na boka di matris pa kada 100.000 hende muhé. Esei ta 51 kaso nobo, esta, un promedio di 17 kaso nobo pa aña. Kanser na boka di matris ta pará na e di kuater lugá riba lista di e tiponan di kanser ku ta mas frekuente serka hende muhé. Serka hende muhé bou di 25 aña, kasi no tin niun kaso di kanser na boka di matris. Di 25 aña p’ariba, e kantidat di kaso nobo ta kuminsá oumentá. Relativamente mirá, mayoria di kaso nobo di kanser na boka di matris ta serka hende muhé di 85 aña p’ariba.
Gráfiko: Kantidat di kaso nobo di kanser na boka di matris pa aña, pa kada 100.000 hende muhé i pa kada grupo di edat na 2009-2011
Fuente: Registro di Kanser di Analytisch Diagnostisch Centrum N.V., ICD10-code C53
Na 2017, 66% di e hende muhénan di 30 te ku 60 aña a hasi un tèst di kanser na boka di matris (‘Pap test’) den e tres añanan promé ku e entrevista. Na 2013, e porsentahe tabata paresido, esta, 65% di e hende muhénan di 30 te ku 60 aña.
Hende muhé ku un státus sosioekonómiko abou ta hasi tèst di kanser na boka di matris ku ménos frekuensia kompará ku hende muhé ku un státus sosioekonómiko mas haltu. Hende muhé ku un nivel di enseñansa mas abou i ku tin hopi difikultat pa kubri nan gastunan ku e entrada di famia ta hasi tèst di kanser na boka di matris ku ménos frekuensia.
Gráfiko: Porsentahe di hende muhé ku a hasi un tèst di kanser na boka di matris den e último 3 añanan, pa kada nivel di enseñansa i kapasidat pa kubri gastu, na 2017
Fuente: Enkuesta Nashonal di Salú 2017
Di 2005 pa 2007, 18 hende muhé a muri komo konsekuensia di kanser na boka di matris; un promedio di 6 kaso pa aña. Esei ta 8.0 pa kada 100.000 hende muhé. No tin un relashon kla entre un persona su edat i su chèns di muri komo konsekuensia di kanser na matris.
Gráfiko: Kaso di morto pa kada 100.000 hende muhé, 2005-2007
Fuente: Statistik di kousa di morto, ICD10-code C53
Kanser na boka di matris ta un tumor maligno na entrada di matris. E tipo di kanser akí ta desaroyá masha poko poko. E tèst bou di poblashon ta detektá prinsipalmente e fasenan inisial. Tratando esakinan, bo ta evitá ku nan ta desaroyá bira kanser na boka di matris.
Infekshon di Human Papillomavirus (HPV) ta kousante di 95% di kaso di kanser na boka di matris. Mayoria di biaha, un infekshon di e vírùs akí ta inofensivo. Ta mira kanser na boka di matris komo un komplikashon poko frekuente di un infekshon di HPV, ku sí ta masha frekuente.
Tèst di kanser na boka di matris: Pa hasi e tèst di kanser na boka di matris, ta raspa e entrada di matris levemente pa rekolektá sèl, i ta tèst esakinan pa wak si e persona tin (un fase inisial di) kanser na boka di matris. Na Hulanda, gobièrnu a fiha ku hende muhé di 30 te ku 60 aña mester hasi un tèst di kanser na boka di matris kada 3 aña (RIVM, 2018).
ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.
Registro di kanser: Departamento di patologia di Analytisch Diagnostisch Centrum tin un base di dato tokante insidensia (kantidat di kaso nobo) i prevalensia (kantidat di kaso eksistente) di kanser na Kòrsou. E base di dato ta kontené informashon di tur kaso di tumor maligno diagnostiká na Kòrsou.
Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).
Cancer Incidence in Five Continents, Vol. XI (electronic version). Lyon: International Agency for Research on Cancer. Konsultá via: http://ci5.iarc.fr. 13 april 2018.
PAHO (2018). Sterftecijfers Curaçao 2001-2007. Dataset optenibel via PAHO mortality database: https://hiss.paho.org/pahosys/grp.php
RIVM (2018). Baarmoederhalskanker. Konsultá via https://www.rivm.nl/Onderwerpen/B/Bevolkingsonderzoek_baarmoederhalskanker/Baarmoederhalskanker
Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.
Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.