search
close
Ekspektativa di bida na Kòrsou ta mas abou ku na Hulanda (hende hòmber: 79,9 aña i hende muhé: 83,5 aña) i un poko mihó ku na Aruba (hende hòmber: 73,2 aña i hende muhé: 78,1 aña). No tin sifra komparativo disponibel (ainda) pa St. Maarten i e islanan BES.
Gráfiko: ekspektativa di bida na momento di nasementu, Aruba, Kòrsou i Hulanda, 2019
Fuente: United Nations Department of Social and Economic Affairs. World Population Prospects
Pa hende muhé, e tendensianan den ekspektativa di bida ta kana pareu ku di Hulanda. Na 2019, e diferensia den ekspektativa di bida entre Hulanda i Kòrsou a baha un poko, di 2,7 aña na 1988 te 2,3 aña na 2019. Na komparashon ku hende muhé na Hulanda, situashon di hende muhé na Aruba a bai atras. E diferensia entre Aruba i Hulanda a oumentá di 4,2 aña na 1988 te 5,3 aña na 2019.
Gráfiko: ekspektativa di bida di hende muhé na momento di nasementu, Aruba, Kòrsou i Hulanda, periodo 1985-2019
Fuente: United Nations Department of Social and Economic Affairs. World Population Prospects
Na 1988, ekspektativa di bida di hende hòmber na Kòrsou i Aruba tabata dos aña mas abou ku na Hulanda i ta te na fin di añanan '00 esaki a kuminsá mehorá. Na 2019, esei a pone e diferensia ku Hulanda oumentá te 4,8 aña pa Kòrsou i te 6,8 aña pa Aruba.
Gráfiko: ekspektativa di bida di hende hòmber na momento di nasementu, Aruba, Kòrsou i Hulanda, periodo 1985-2019
Fuente: United Nations Department of Social and Economic Affairs. World Population Prospects
Ora kompará e diferente tendensianan den ekspektativa di bida pa region di Karibe, ta sali na kla ku di añanan ‘50 te añanan ‘90, ekspektativa di bida na Kòrsou tabata un di esunnan di mas haltu den Karibe. Den e periodo ei, ekspektativa di bida promedio na Kòrsou na momento di nasementu a subi di 58,8 aña te 74,6 aña. For di meimei di añanan ‘90, ekspektativa di bida na Kòrsou (i Aruba) a bin ta subi ménos na komparashon ku e otro paisnan den Karibe. Komo resultado, Kòrsou su posishon den Karibe pa loke ta ekspektativa di bida a baha di 4o lugá na 1960 te na 7o lugá na 2019 (den e 21 paisnan karibense). Den e mesun periodo akí, Aruba a kai di 3o te na 9o lugá. Komo resultado, na 2019, ekspektativa di bida na Kòrsou tabata mas abou ku na algun otro pais karibense manera Martinique, Guadeloupe, US Virgin Islands i Cuba, pero un poko mas haltu ku na Aruba.
Gráfiko: ekspektativa di bida na momento di nasementu, Karibe, 1985-2019
Fuente: United Nations Department of Social and Economic Affairs. World Population Prospects
Ekspektativa di bida ta un manera ophetivo di midi kuantu tempu mas ta premirá ku un persona den un sierto grupo lo sigui biba. Ekspektativa di bida ta varia di un pais pa otro, pero tambe di un grupo pa otro den e poblashon di un pais (por ehèmpel riku/pober). Ora ta papia di ekspektativa di bida, generalmente esaki ta referí na ekspektativa di bida (na aña) na momento di nasementu (Volksgezondheidenzorg.info, 2020).
VIC ta kalkulá ekspektativa di bida na Kòrsou a base di statistik di kousa di morto, un fuente di dato ku ta duna informashon tokante kousa di morto tambe. Ademas, VIC ta usa otro fuente di dato nashonal (por ehèmpel, CBS) i internashonal (manera Nashonnan Uní). E datonan di CBS no ta mustra e tendensia di ekspektativa di bida i e datonan di statistik di kousa di morto na Kòrsou di mas resien ta di 2007. Debí na esaki, a usa dato mas resien di Nashonnan Uní pa trata e tema akí.
United Nations Department of Social and Economic Affairs. World Population Prospects: The 2019. Revision, DVD edition. [Internet]. 2019 [cited 2019 Apr 8]. Geraadpleegd via
http://esa.un.org/wpp/index.htm, 23 december 2019.
Volksgezondheidenzorg.info (2019). Levensverwachting. Geraadpleegd via https://www.volksgezondheidenzorg.info/onderwerp/levensverwachting/cijfers-context/huidige-situatie#definitie--node-met-levensverwachting-wordt-levensverwachting-bij-geboorte-bedoeld
RIVM: Bilthoven, 20 februari 2020.