search
close
Tres di kada kuater (75%) adulto na Kòrsou ta sinti ku nan ta (hopi) bon di salú. Hende hòmber ta sinti nan un poko mas salú na komparashon ku hende muhé (79% di hende hòmber, kompará ku 73% di hende muhé). Esei tin di aber entre otro ku diferensia den estilo di bida i partisipashon den merkado laboral, i tambe debí na e manera ku hende hòmber i hende muhé ta forma un opinion di nan propio salú (Rohlfsen & Jacobs-Kronenfeld, 2014; Idler & Benyamini, 1997). Kompará ku hende muhé, hende hòmber ta evaluá nan propio salú mas lihé a base di te kon leu nan por funshoná (Simon et al., 2005; Peersman et al., 2012).
Den e grupo di adulto mas yòn (18 te ku 24 aña), 86% ta sinti ku nan tin (hopi) bon salú. Den e grupo di 65+, ta 60% so ta sinti asina ainda. Serka hende di edat mas haltu, kon nan ta sinti tokante nan salú no ta kambia muchu mas segun nan edat sigui subi (Kempen & Ormel, 1996; Hoeymans et al., 1997). Esei ta debí ku hopi hende grandi ta haña ku un salú ménos bon ta normal pa nan edat. Ademas, hopi bes hende grandi ta kompará nan mes ku hende di nan mes edat i ku tin ménos bon salú (Cheng et al., 2007; Henchoz et al., 2008) òf, kompará ku hende di edat pero ku ta mas yòn, ta konsentrá riba otro aspekto di salú ora di forma nan opinion al respekto (Simon et al., 2005; Peersman et al., 2012). Asina, tòg nan por tin un opinion positivo di nan salú.
Sinku porshento (5%) di adulto ta sinti ku nan salú ta (hopi) malu. Hende muhé i hende den e gruponan di edat mas haltu ta esnan ku mas tantu ta sinti ku nan salú ta (hopi) malu. Na 2013, 2% di hende na Kòrsou a bisa di ta sinti ku nan salú ta (hopi) malu.
Gráfiko: Porsentahe di adulto ku generalmente ta sinti ku nan tin (hopi) bon salú, pa kada sekso i grupo di edat, 2017
Fuente: Enkuesta Nashonal di Salú 2017
E adultonan ku tin un státus sosioekonómiko haltu ta sinti mas frekuentemente ku nan salú ta (hopi) bon. Ku otro palabra, mas haltu e personanan akí su nivel di enseñansa ta i mas mihó nan por kubri nan gastunan ku e entrada di famia, mas frekuentemente nan ta sinti ku nan tin (hopi) bon salú. Den e grupo di adulto ku no tin niun problema pa kubri nan gastunan, 82% ta sinti ku nan tin (hopi) bon salú. Den e grupo di adulto ku tin hopi difikultat pa kubri nan gastunan, e porsentahe ei ta 53%.
Den e grupo ku nivel di enseñansa abou i ku tin difikultat pa kubri nan gastunan, ta mas frekuente pa hende sinti ku nan salú ta (hopi) malu.
Gráfiko: Porsentahe di adulto ku generalmente ta sinti ku nan tin (hopi) bon salú, pa kada státus sosioekonómiko, na 2017
Fuente: Enkuesta Nashonal di Salú 2017
E porsentahe di poblashon ku ta sinti ku nan tin (hopi) bon salú a baha kompará ku 2011. Di 2013 pa 2017, e kantidat di persona ku ta sinti ku nan tin bon salú a keda stabil.
Gráfiko: Tendensia di persepshon di salú serka adulto na Kòrsou, 2011-2017
Fuente: Enkuesta Nashonal di Salú 2013 i 2017; Senso 2011
Persepshon di salú ta loke un persona mes ta opiná tokante su salú. Persepshon di salú, tambe yamá salú suphetivo, ta un refleho di kon un hende ta sinti tokante su propio salú. Kon un hende ta sinti tokante su salú ta un manera di midi, en resúmen, tur aspekto relevante di e persona en kuestion su salú.
E aspektonan di salú ku ta hunga un papel den kon e hende ta sinti por ta otro pa kada ken, pero hopi bes nan tin di aber tantu ku e persona su salú físiko komo su salú mental i emoshonal, por ehèmpel un enfermedat, limitashon físiko òf hèndikèp, kon fet e ta, kon kansá e ta, i si e ta sinti depreshon. Aspekto ku tin di aber ku su estilo di bida, manera alimentashon, humamentu i ehersisio físiko, tambe por yuda determiná kon e persona ta sinti tokante su salú. Por ehèmpel, tin hende por pensa: 'Mi ta sali kana tur dia, ke men, mi ta salú' (Volksgezondheidinfo, 2017.)
Kon un hende ta sinti tokante su salú ta un indikashon fuerte di su chèns di muri. Mas malu un hende ta sinti tokante su salú, mas tantu chèns e tin di muri. Esei por parse opvio, pero ta poko kriterio tin ku ta indiká ku tantu siguridat kuantu chèns un hende tin di muri. Esei ta e kaso asta si tene kuenta ku kantidat di otro faktor ku ta konosí komo indikashon di e persona su chèns di muri, manera su edat, kriterio ophetivo di salú (manera enfermedat, preshon di sanger) i otro faktor relevante di karakter médiko, di estilo di bida, i sikososial (Idler & Benyamini, 1997, Benyamini & Idler, 1999, DeSalvo et al., 2006; lesá den volksgezondheidinfo, 2017).
Persepshon di salú ta un kriterio suphetivo. E splikashon prinsipal pa e relashon fuerte ku ta eksistí entre un hende su persepshon di salú i su chèns di muri ta ku, kompará ku e kriterionan ophetivo di salú, persepshon di salú ta un kriterio mas amplio. Por ehèmpel, si un hende ta sinti ku su salú no ta bon, esei por mustra tambe riba un enfermedat ku no a manifestá ainda, kon grave su enfermedatnan eksistente ta, òf ku esakinan ta birando mas grave (Jylhä, 2009, Benyamini, 2011; zoals gelezen in volksgezondheidinfo, 2017).
ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.
Senso: Un senso ta duna un bista di e sirkunstansianan di bida di poblashon na un momento spesífiko. Bo por kompará e resultadonan ku resultado di otro konteo anterior pa haña un bista kon sierto asuntu a desaroyá den pasado, i pa asina por antisipá desaroyo den futuro. A yega di tene sinku senso na Kòrsou: na 1972, 1992, 2001 i 2011.
Centraal Bureau voor de Statistiek (2011). Gezondheid en beperkingen in Curaçao. Willemstad, Centraal Bureau voor de Statistiek.
Cheng ST, Fung H, Chan A. Maintaining self-rated health through social comparison in old age. J Gerontol B Psychol Sci Soc Sci. 2007;62(5):P277-85.
Gezondheidsmonitor (2012). Konsultá via https://www.cbs.nl/nl-nl/maatwerk/2013/37/uitkomsten-gezondheidsmonitor-2012.
Henchoz K, Cavalli S, Girardin M. Health perception and health status in advanced old age: A paradox of association. Journal of Aging Studies. 2008;22(3):282-290.
Hoeymans N, Feskens EJ, van den Bos GA, Kromhout D. Age, time, and cohort effects on functional status and self-rated health in elderly men. Am J Public Health. 1997;87(10):1620-5.
Idler EL, Benyamini Y. Self-rated health and mortality: a review of twenty-seven community studies. J Health Soc Behav. 1997;38(1):21-37.
Kempen GIJM, Ormel JJ. Dagelijks functioneren van ouderen. Assen: Van Gorcum & Comp; 1996.
Peersman W, Cambier D, de Maeseneer J, Willems S. Gender, educational and age differences in meanings that underlie global self-rated health. International Journal of Public Health. 2012;57(3):513-523.
Rohlfsen LS, Jacobs-Kronenfeld J. Gender Differences in Trajectories of Self-Rated Health in Middle and Old Age: An Examination of Differential Exposure and Differential Vulnerability. J Aging Health. 2014;26(4):637-662.
Simon JG, De Boer JB, Joung IMA, Bosma H, Mackenbach JP. How is your health in general? A qualitative study on self-assessed health. Eur J Public Health. 2005;15(2):200-8.
Simon SR, Majumdar SR, Prosser LA, Salem-Schatz S, Warner C, Kleinman K, et al. Group versus individual academic detailing to improve the use of antihypertensive medications in primary care: a cluster-randomized controlled trial. Am J Med. 2005;118(5):521-8.
Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.
Verstraeten S., Griffith-Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.
Volksgezondheidenzorg.info (2017). Konsultá via https://www.volksgezondheidenzorg.info/onderwerp/ervaren-gezondheid/cijfers-context/huidige-situatie#definities RIVM: Bilthoven, 7 januari 2018.