Migrèn

Kasi 9.000 adulto ku migrèn

Na 2017, segun kálkulo, tabatin kasi 9.000 adulto ku migrèn: 1.681 hende hòmber i 7.278 hende muhé. Na tur, esei ta 7% di poblashon adulto. Migrèn ta mas frekuente den e edatnan di 25 i 44 aña i ta muchu mas frekuente serka hende muhé.

Gráfiko: Porsentahe di adulto ku migrèn, pa kada sekso i grupo di edat, na 2017

Fuente: Enkuesta Nashonal di Salú 2017

Serka adulto ku tin hopi difikultat pa kubri gastu, e porsentahe ku migrèn ta mas haltu

Na Kòrsou, migrèn ta mas frekuente serka esnan ku tin hopi difikultat pa kubri nan gastunan (10%) i ménos frekuente serka esnan ku no tin niun difikultat pa kubri nan gastunan (6%). Tin algun diferensia chikitu pa loke ta trata migrèn entre e diferente nivelnan di enseñansa.

Gráfiko: Porsentahe di adulto ku migrèn, pa kada nivel di enseñansa i kapasidat pa kubri gastu, 2017

Fuente: Enkuesta Nashonal di Salú 2017

E porsentahe di adulto ku migrèn a oumentá di 2013 pa 2017

Di 2013 pa 2017, e porsentahe di adulto di 18 aña p’ariba ku migrèn a oumentá di 5% pa 7%. Na 1993, e porsentahe di adulto ku migrèn tabata 7%, meskos ku na 2017.

Gráfiko: Tendensia di migrèn serka adulto 1993 - 2017

Fuente: Enkuesta Nashonal di Salú 2017 i 2013; Curaçao Health Study 1993/1994

Downloads

Refrences

Definishon

Migrèn ta un enfermedat króniko ku ta manifestá komo doló di kabes. Migrèn ta un enfermedat neurobaskular ku ta produsí atake di batimentu di kabes. E ta un doló ku ta presentá frekuentemente na un banda so di kabes (unilateral). E doló por ta moderá te pisá, ta dura di 4 te 72 ora i ta bira pió ora e persona hasi esfuerso físiko. Hopi bes, e doló ta bin kompañá pa walmentu di stoma i/òf hipersensibilidat pa lus i zonido (Dekker et al., 2014). Promé ku e atake, tin hende ta haña un asina yamá ‘oura’ (konosí tambe komo migrèn di den wowo) ku ta enserá sierto pèrdida di funshon. Por ehèmpel, e persona ta kuminsá mira flèsh di lus, mancha òf strea, ta pèrdè bista den parti di su kampo visual òf ta sinti ku su man, pia òf kara ta prek òf pèrdè heful. Tin hende ku ta haña migrèn sin oura tambe, i tin hende ku algun biaha ta haña un ‘oura’ promé i tin ora nò (Haan et al., 2007). Tin diferente remedi pa kombatí atake di migrèn (parsialmente) i remedi pa prevení nan (asina yamá remedi profiláktiko) (Volksgezondheidenzorg.info, 2017).

Método

CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú, i komportashon relashoná ku salú, di poblashon di Kòrsou.

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Fuente

Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Konsultá via https://www.volksgezondheidenzorg.info/onderwerp/migraine/cijfers-context/huidige-situatie#definitie--node-migraine-chronische-aandoening-uitend-hoofdpijn , RIVM: Bilthoven, 7 januari 2018.