Problema di lomba

Mas di 20.000 hende ku problema di lomba

Na 2017, segun kálkulo, tabatin 20.281 adulto ku un problema na parti abou di lomba òf otro problema króniko di lomba: 7.971 hende hòmber i 12.310 hende muhé. Na tur, esei ta 17% di poblashon adulto. Problema di lomba ta mas frekuente serka hende muhé (18%) kompará ku serka hende hòmber (15%). E porsentahe di hende ku problema di lomba ta oumentá ku edat i ta mas haltu den e grupo di 65+. Na 1993, 10% di adulto na Kòrsou a bisa ku nan tin problema di lomba. Na 1993 tambe problema di lomba tabata mas frekuente serka hende muhé kompará ku serka hende hòmber (11% vs. 9%) (Alberts, 1996). 

Gráfiko: Porsentahe di adulto ku problema di lomba pa kada sekso i grupo di edat na 2017

Fuente: Enkuesta Nashonal di Salú 2017

Problema di lomba ta mas frekuente serka adulto ku státus sosioekonómiko abou 

Na 2017, 17% di adulto na Kòrsou a bisa ku nan tin un problema di parti abou di lomba òf otro problema króniko di lomba. Na Kòrsou, problema di lomba ta mas frekuente serka esnan ku un nivel di enseñansa abou i esnan ku tin hopi difikultat pa kubri nan gastunan ku e entrada di famia.

Gráfiko: Porsentahe di adulto ku problema di lomba pa kada nivel di enseñansa i kapasidat pa kubri gastu na 2017

Fuente: Enkuesta Nashonal di Salú 2017

Downloads


Refrences

Huntu ku problema di nèk, problema di lomba ta e kategoria di enfermedat mas komun ku ta afektá hende su órganonan di moveshon. Problema di lomba por tin un variedat di diferente kousa, i tin biaha e kousa no ta konosí. Generalmente ta distinguí problema di lomba spesífiko i problema di lomba aspesífiko.

- Problema di lomba spesífiko ta problema di lomba kaminda tin un kousa físiko ku por señalá. Algun ehèmpel di esei ta hernia nuclei pulposi (HNP), infekshon, inflamashon, fraktura òf tumor.

- Problema di lomba aspesífiko ta problema di lomba kaminda no tin un kousa físiko ku por señalá. Serka mayoria di hende ku problema di lomba, e problema ta aspesífiko (Van Tulder & Koes, 2013).

(Volksgezondheidenzorg.info, 2017)

CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú, i komportashon relashoná ku salú, di poblashon di Kòrsou.

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Konsultá via   https://www.volksgezondheidenzorg.info/onderwerp/nek-en-rugklachten/regionaal-internationaal/regionaal#definitie--node-nek-en-rugklachten RIVM: Bilthoven, 7 januari 2018.