Seguro di kuido médiko

Kasi tur adulto na Kòrsou ta sigurá pa gastu médiko

Kasi tur adulto na Kòrsou ta sigurá pa gastu médiko (99%). E porsentahe a subi na komparashon ku 2013, ora ku 97% di adulto a bisa ku nan tin un seguro di gastu médiko.

Mayoria di adulto di Kòrsou ta sigurá via SVB

Mayoria di adulto di Kòrsou (86%) ku tin un seguro di gastu médiko (BVZ) ta sigurá via Banko di Seguro Sosial (SVB), siguí pa seguro privá (8%) òf seguro di trabou (6%). E distribushon akí no ta masha diferente for di esun di 2013, tempu ku 84% di e adultonan sigurá pa gastu médiko a bisa ku nan ta sigurá via un di e seguronan públiko ku tabatin. (E tempu ei, ainda tabatin diferente fondo ta hasi esaki.) (ENS, 2013) Esnan ku un nivel di enseñansa abou i hende ku tin hopi difikultat pa kubri nan gastunan ta sigurá mas frekuentemente via SVB. Di otro banda, hende hòmber, esnan ku un nivel haltu di enseñansa i hende ku no tin niun difikultat pa kubri nan gastunan tin un seguro privá ku mas frekuensia. 

Gráfiko: Porsentahe di adulto pa kada tipo di seguro di kuido médiko na 2017

Fuente: Enkuesta Nashonal di Salú 2017

Mas di 950 adulto no tin seguro di gastu médiko

Segun kálkulo, tin 965 adulto na Kòrsou ku no tin seguro di gastu médiko. E kálkulo akí ta basá riba resultado di Enkuesta Nashonal di Salú. E grupo di persona no sigurá ta konsistí prinsipalmente di hende hòmber (72%) di 24 te ku 64 aña (84%), nasé na Kòrsou (52%), ku tin un sédula (79%) i ku no tin ningun problema pa kubri nan gastunan (69%). A opservá algun diferensia chikitu entre e diferente gruponan di nivel di enseñansa.

Gráfiko: Adulto no sigurá, partí a base di diferente karakterístika na 2017

Fuente: Enkuesta Nashonal di Salú 2017

E porsentahe di adulto no sigurá a baha di 1993 pa awor

Na 1993, 9% di adulto na Kòrsou a bisa ku nan no ta sigurá pa gastu médiko. Den e siguiente enkuestanan di poblashon, e porsentahe akí a keda baha konsistentemente te na 1% na 2017.

Gráfiko: Tendensia den porsentahe di adulto no sigurá pa gastu médiko, 1993-2017

Fuente: Enkuesta Nashonal di Salú 2017 & 2013; Senso 2011 i 2001, Curaçao Health Study 1993/1994

Downloads

Refrences

Método

CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú, i komportashon relashoná ku salú, di poblashon di Kòrsou. 

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Senso: Un senso ta duna un bista di e sirkunstansianan di bida di poblashon na un momento spesífiko. Bo por kompará e resultadonan ku resultado di otro konteo anterior pa haña un bista kon sierto asuntu a desaroyá den pasado, i pa asina por antisipá desaroyo den futuro. A yega di tene sinku senso na Kòrsou: na 1972, 1992, 2001 i 2011.

Fuente

Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.

Centraal Bureau voor de Statistiek (2001). Fourth Population and housing census Netherlands Antilles 2001 (Volume 1). Willemstad, Centraal Bureau voor de Statistiek.

Centraal Bureau voor de Statistiek (2011). Gezondheid en beperkingen in Curaçao. Willemstad, Centraal Bureau voor de Statistiek.

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.