Salú, Estilo di Bida i Uso di Servisio di Kuido den e Barionan Pober di Kòrsou

Den e ‘barionan pober’, esta, e áreanan kaminda relativamente hopi hende ta biba den pobresa, salú, estilo di bida i uso di servisio di kuido di e habitantenan ta un poko ménos faborabel kompará ku poblashon di Kòrsou den su totalidat. Sinembargo, ora parti e barionan pober den kuater área geográfiko i kompará esakinan ku otro, por mira diferensia grandi entre e áreanan akí i pa kada un tin sierto punto ku ta rekerí atenshon. Por ehèmpel, e habitantenan di e áreanan mas pober ‘leu for di sentro’ tin mas problema ku sangura, djaka i raton kaminda nan ta biba, i ta mas difísil pa nan yega hospital i poli denter di 30 minüt. Den e barionan mas pober di Willemstad p’ariba di brùg, e habitantenan ta huma mas, ta usa mas soft drugs, ta bisa mas frekuentemente ku nan tin (síntoma di) enfermedat transmití pa sangura i ta sinti ku nan tin ménos apoyo sosial. Den e barionan mas pober di Willemstad p’abou di brùg, e habitantenan tin mas molèster di holó malu i kontaminashon di aire ku ta bini di e área industrial di Schottegat i ta bisa mas frekuentemente tambe ku nan tabatin asma i alergia den e 12 lunanan promé ku e entrevista. Den e ‘barionan di pueblo’, ta mas frekuente pa e habitantenan inhalá huma di tabako ora otro hende ta huma den kas, nan tin mas limitashon di moveshon, tin mas molèster di zonido kaminda nan ta biba i ta sinti mas tantu ku, pa motibu finansiero, ta difísil pa nan optené kuido dental. 

Por haña e resultadonan akí i hopi mas den e di dos publikashon di Enkuesta Nashonal di Salú 2017, e informe temátiko SALÚ, ESTILO DI BIDA I USO DI SERVISIO DI KUIDO DEN E BARIONAN POBER. Den e informe akí, Volksgezondheid Instituut Curaçao (VIC) ta duna un bista aktualisá di algun diferensia di estado di salú ku ligá ku faktor sosioekonómiko ora kompará poblashon di Kòrsou den su totalidat ku e habitantenan di e barionan mas pober (kaminda mas ku 30% di e kasnan di famia ta biba bou di nivel di pobresa). Di e manera akí, e informe akí ta ofresé punto ku por sirbi komo referensia pa formulá i evaluá maneho ku ta basá riba evidensia ('evidence-based') i dirigí riba bario.

E informe temátiko SALÚ, ESTILO DI BIDA I USO DI SERVISIO DI KUIDO DEN E BARIONAN POBER a keda presentá na Minister di Salubridat Medio Ambiente i Naturalesa, Sra. Suzanne Camelia-Römer, dia 24 di ougùstùs último. E informe i e publikashonnan anterior di VIC ta optenibel den formato digital aki.