Alkohòl

Mas tantu usadó di alkohòl na Bándariba

Na Kòrsou, 58% di poblashon adulto ta usa alkohòl. E porsentahe ku ta usa alkohòl ta mas haltu den e region di Bándariba (63%), Bándabou (61%) i e parti ost di Willemstad (59%), i mas abou na e parti wèst di Willemstad (53%).  

Gráfiko: usadó di alkohòl den kada region (2017)

Fuente: Enkuesta Nashonal di Salú 2017

* Basá riba ménos ku 100 opservashon i p’esei no inkluí den e relato

Ménos uso di alkohòl na Kòrsou kompará ku Hulanda

Na Kòrsou, uso di alkohòl ta ménos frekuente ku na Hulanda. Uso problemátiko di alkohòl, esta, bebementu pisá i eksesivo, tambe ta ménos frekuente na Kòrsou kompará ku Hulanda. Bebe pisá ta nifiká ku un biaha pa siman òf mas, e persona ta konsumí kuater (den kaso di hende muhé) òf seis (hende hòmber) glas di alkohòl tras di otro. Bebe di mas ta nifiká ku e persona ta bebe mas ku 21 glas di alkohòl pa siman den kaso di hende hòmber òf mas ku 14 glas pa siman si ta trata di hende muhé.

Gráfiko: uso di alkohòl bou di adulto na Kòrsou i Hulanda

Fuente: Enkuesta Nashonal di Salú 2017 (Kòrsou) i Gezondheidsmonitor 2012 (Hulanda)

Binging na Kòrsou ta mas haltu ku e promedio di Karibe

Binging ta mas frekuente na Kòrsou, kompará ku e otro isla- i paisnan den region. Binging ta nifiká ku e persona a bebe 6 glas di alkohòl òf mas riba e mesun dia, den e último 30 dianan promé ku e enkuesta.

Gráfiko: binging bou di adulto na Kòrsou i otro isla i pais di Karibe

Fuente: Enkuesta Nashonal di Salú 2017 (Curaçao), PAHO i WHO

Mucha di skol na Kòrsou ta bira burachi ménos frekuente ku mucha di skol di otro pais karibense

E porsentahe di mucha di skol na Kòrsou ku a yega di bebe alkohòl i a yega di bira burachi ta mas abou ku e porsentahe di hopi otro pais di Karibe. Bou di e muchanan di skol na Kòrsou ku a yega di bebe alkohòl,  konsumo di alkohòl promé ku e mucha a kumpli 14 aña tabata ménos frekuente ku na otro pais di Karibe (PAHO 2017).

Gráfiko: porsentahe di mucha di skol ku a yega di bira burachi (1 biaha òf mas den nan bida); Kòrsou vs. Karibe

Fuente: Global School-based Student Health Survey Curaçao 2015, PAHO 2017

Bebementu di alkohòl bou di mucha di skol ta mas frekuente na Kòrsou kompará ku Hulanda

Kompará ku mucha di skol na Hulanda, e muchanan di skol na Kòrsou a bebe alkohòl ku mas frekuensia den e 30 dianan promé ku e entrevista (27% vs. 35%). Pa loke ta trata mucha di skol ku a yega di bira burachi, e diferensianan entre Hulanda i Kòrsou ta chikitu (15% vs. 17%) (GSHS Curaçao 2015 en de Looze et al., 2013).

Data disponibel

Hustifikashon

Definishon

Bebe di mas: bebe mas ku 21 (pa hende hòmber) òf 14 (pa hende muhé) glas di alkohòl pa siman.

Bebe pisá: bebe mínimo seis (pa hende hòmber) òf kuater (pa hende muhé) glas di alkohòl riba un solo dia, por lo ménos un biaha pa siman.

Binge: bebe 5 glas di alkohòl òf mas na un okashon.

Kuminsá usa alkohòl na edat yòn: promé ku kumpli 14 aña

Método

CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú i komportashon relashoná ku salú di poblashon di Kòrsou.

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

GSHS Curaçao 2015: Global School-based Student Health Survey (GSHS) ta un enkuesta di salú bou di mucha di skol di 12 te ku 17 aña. E ta forma parti di e investigashon GSHS internashonal, di Organisashon Internashonal di Salú (WHO). Meta di GSHS ta di haña un bista aktualisá di komportashon di mucha di skol na Kòrsou ku por afektá nan salú, i tambe tokante nan bienestar. Na Kòrsou, a tene e enkuesta pa di promé bes na 2015.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

Fuente

Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.

De Looze M, Van Dorsselaer S, De Roos S, Verdurmen J, Stevens G, Gommans R, et al. HBSC 2013. 
Gezondheid, welzijn en opvoeding van jongeren in Nederland. [Internet]. 2014. Geraadpleegd via 
http://www.hbsc-nederland.nl/uploads/publicaties/openbaar/HBSC_Rapport_2013.pdf

Gezondheidsmonitor (2012). Konsultá via https://www.cbs.nl/nl-nl/maatwerk/2013/37/uitkomsten-gezondheidsmonitor-2012.

Gezondheidsraad. Richtlijnen goede voeding 2015. Den Haag: Gezondheidsraad; 2015. https://www.gezondheidsraad.nl/sites/default/files/201524_richtlijnen_goede_voeding_2015.pdf

PAHO (2018). Sterftecijfers Curaçao 2001-2007. Dataset disponibel via PAHO mortality database: https://hiss.paho.org/pahosys/grp.php

Verstraeten S. (2016). The Curaçao Global School-based Student Health survey (GSHS) Study 2015. Volksgezondheid Instituut Curaçao, Willemstad.

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith - Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

World Health Organization (2017). Konsultá via http://www.who.int/gho/en/