COPD

Mas di 3.000 hende ku COPD

Na 2017, segun kálkulo, tabatin 3.044 adulto ku COPD (bronkítis króniko, enfermedat opstruktivo króniko di pulmon i enfisema). Na tur, esei ta 3% di poblashon adulto. COPD ta mas frekuente serka hende muhé (3%) ku serka hende hòmber (2%). Por opservá algun diferensia chikitu ora kompará e diferente gruponan di edat. Na 2013, e porsentahe di adulto ku COPD tabata 2% (ENS 2013).

Gráfiko: Porsentahe di adulto ku COPD pa kada sekso i grupo di edat

Fuente: Enkuesta Nashonal di Salú 2017

Na Kòrsou, COPD ta mas frekuente serka esnan ku tin hopi difikultat pa kubri nan gastunan

Na Kòrsou, COPD ta mas frekuente serka esnan ku tin hopi difikultat pa kubri nan gastunan. Por opservá algun diferensia chikitu ora kompará e diferente nivelnan di enseñansa.

Gráfiko: Porsentahe di adulto ku COPD pa kada nivel di enseñansa i kapasidat pa kubri gastu, 2017

Fuente: Enkuesta Nashonal di Salú 2017

Tur aña, 13 persona a fayesé komo konsekuensia di COPD

Di 2005 pa 2007, 39 persona a fayesé komo konsekuensia di COPD. Esei ta un promedio di 13 kaso pa aña. Tabata trata aki di 26 hende hòmber (13,7 pa kada 100.000 hende hòmber) i 13 hende muhé (5,9 pa kada 100.000 hende muhé). Morto komo konsekuensia di COPD ta oumentá ku edat.

Gráfiko: Morto pa kada 100.000 persona, pa kada sekso, 2005-2007

Fuente: Statistik di Kousa di Morto, ICD10-code J40-J44

Data disponibel

Hustifikashon

Definishon

Enfermedat di pulmon, manera bronkítis króniko/enfermedat opstruktivo króniko di pulmon (COPD/ enfisema). Ta papia di COPD (Chronic Obstructive Pulmonary Disease, esta, ‘enfermedat opstruktivo króniko di pulmon’) ora e vianan respiratorio bira smal (konstrikshon) na un manera króniko i/òf e tehido elástiko di pulmon sufri daño. E konstrikshon di e vianan respiratorio ta permanente i kasi no por hancha nan bèk. COPD ta inkluí bronkítis króniko, konstrikshon króniko di e vianan respiratorio chikitu i enfisema. Algun di e kehonan prinsipal di hende ku COPD ta tosamentu króniko, tosa saka sleim, i rosea kòrtiku (króniko). E kehonan por bira mas grave ora e persona hañ’é eksponí na, por ehèmpel, huma di tabako, dam i gas, holó di kushinamentu, dam di kloro, airu friu i kambio di temperatura (Volksgezondheidinfo, 2017).

Método

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

Fuente

PAHO (2018). Sterftecijfers Curaçao 2001-2007. Dataset disponibel via PAHO mortality database:  https://hiss.paho.org/pahosys/grp.php

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Konsultá via   https://www.volksgezondheidenzorg.info/onderwerp/copd/cijfers-context/huidige-situatie#definities, RIVM: Bilthoven, 7 januari 2018.