Kuido urgente

Yudansa di emergensia na Hospital St. Elisabeth i di FKA

Na Kòrsou, departamento di emergensia di Hospital St. Elisabeth i Fundashon Kuido di Ambulans (FKA) ta ofresé kuido urgente. Departamento di emergensia na Hospital St. Elisabeth ta habrí 24 ora pa dia pa tur hende ku tin mester di kuido urgente, basta tuma kontakto promé ku e dòkter di kas (na warda).
E ambulansnan i profeshonalnan di FKA ta intervení den diferente kaso di urgensia, por ehèmpel ora tin bida den peliger i ora mester trasladá un pashènt i no tin otro manera pa transport’é. FKA tin tres pòst di ambulans partí riba Kòrsou: na Piscaderaweg (tereno di G&Gz, Ministerio di Salubridat, Medio Ambiente i Naturalesa), Barber i Montaña.



Na Bándabou i Bándariba tin ménos akseso rápido na departamento di emergensia

Na 2017, e porsentahe di adulto ku por a yega departamento di emergensia di Hospital St. Elisabeth denter di 30 minüt usando nan medio di transporte di kustumber tabata mas abou pa e adultonan bibá na Bándabou i Bándariba (55%). E porsentahe akí ta konsiderablemente mas faborabel pa e adultonan ku ta biba na parti ost i wèst di distrito di Willemstad: 67% i 85% respektivamente.

Gráfiko: Porsentahe di adulto pa kada region ku por yega departamento di emergensia denter di 30 minüt usando nan medio di transporte di kustumber, na 2017

Nota:* Basá riba ménos ku 100 opservashon i p’esei no inkluí den e rapòrt

Fuente: Enkuesta Nashonal di Salú 2017

Data disponibel

Hustifikashon

Definishon

Kuido urgente ta nifiká: ‘Diagnóstiko i/òf tratamentu ku un persona ku ta pidi kuido i/òf un suministradó di kuido ta sinti nesesidat di dje urgente- i inesperadamente’ (VWS, Ministerio di Salubridat, Bienestar i Deporte, 2008).

Método

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Zorgkaart Curaçao: Zorgkaart ta duna un bista aktualisá di e suministradó- i instansianan di kuido na Kòrsou, ku nan datonan di kontakto. E ta yuda bo mira kua ta e servisionan di kuido ku ta disponibel i kon esakinan ta organisá. E informashon akí ta optenibel via e wèpsait zorgkaartcuracao.cw, pa yuda un persona ku ta pidi kuido haña e servisionan di kuido ku e tin mester.

Fuente

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith - Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheid Instituut Curaçao. De zorgkaart 2016: de verzekerde zorg in beeld. Volksgezondheid Instituut Curaçao, Willemstad.

VWS, Ministerie van Volksgezondheid, Welzijn en Sport (2008). Kamerstuk: Kiezen voor bereikbaarheid en kwaliteit van zorg. Den Haag: VWS, Ministerie van Volksgezondheid, Welzijn en Sport. Konsultá via https://www.rijksoverheid.nl/documenten/kamerstukken/2008/06/27/kiezen-voor-bereikbaarheid-en-kwaliteit-van-zorg