search
close
Na 2017, segun kálkulo, tabatin 23.065 adulto ku alergia: 7.499 hende hòmber i 15.566 hende muhé. Na tur, esei ta 19% di poblashon adulto. Ta trata aki di alergia manera nanishi ku ta kore, ‘hooikoorts’, alergia di kuminda, rebultashon di kueru òf iritashon di wowo, pero no asma alérgiko. Alergia ta mas frekuente serka hende muhé (23%) ku serka hende hòmber (14%). E porsentahe di hende ku alergia ta mas haltu serka e gruponan di edat mas yòn, i ta baha segun ku edat ta subi.
Gráfiko: porsentahe di adulto ku alergia pa kada sekso i grupo di edat na 2017
Fuente: Enkuesta Nashonal di Salú 2017
Na 2013, e pregunta tabata formulá na otro manera, esta, si dòkter a diagnostiká un alergia serka e persona. Na 2017, e pregunta na e adultonan tabata si nan tabata sinti molèster di un alergia, sin importá si dòkter a diagnostiká esei òf nò. Esei ta pone ku no por kompará e sifranan di ENS 2013 i ENS 2017 ku otro sin mas. Na 2013, 10% di adulto na Kòrsou a bisa ku nan dòkter a diagnostiká ku nan tin alergia, i na e aña ei tambe alergia tabata mas frekuente serka hende muhé ku serka hende hòmber (14% vs. 6%).
Na 2017, 19% di adulto na Kòrsou a indiká ku nan tin un alergia. Na Kòrsou, alergia ta mas frekuente serka adulto ku tin un nivel di enseñansa haltu i esnan ku tin hopi difikultat pa kubri gastu ku e entrada di famia.
Gráfiko: porsentahe di adulto ku alergia pa kada nivel di enseñansa i kapasidat pa kubri gastu na 2017
Fuente: Enkuesta Nashonal di Salú 2017
Un alergia ta un tipo di hipersensitividat di bo kurpa. Esei ta enserá ku bo sistema di inmunidat ta reakshoná riba supstansia (alergeno) ku riba nan mes no ta dañino. Hipersensitividat pa sierto supstansia por hiba na un enfermedat alérgiko. E tiponan di alergia menshoná den e preguntanan di ENS 2013 i 2017 ta por ehèmpel nanishi ku ta kore, ‘hooikoorts’, alergia di kuminda, rebultamentu di kueru i iritashon di wowo, pero no asma alérgiko.
ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.
Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.
Verstraeten S., Griffith, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.