Ta un minoria di e adultonan na Kòrsou ta kumpli ku e normanan pa konsumo di fruta i di bèrdura 

Na Kòrsou, ta 16% di adulto ta kumpli ku e norma di konsumo di 2 òf mas porshon di fruta pa dia i 14% ta kumpli ku e norma di 2 òf mas porshon di bèrdura pa dia. Hende muhé ta kumpli un poko mas frekuente ku e norma pa konsumo di fruta, kompará ku hende hòmber (17% vs. 15%). Konsumo di bèrdura ta práktikamente meskos pa hende hòmber i hende muhé (15% vs. 14%). E grupo ku ta kumpli ménos ku e normanan pa konsumo di fruta i di bèrdura ta esun di 18 te ku 24 aña.

Konsumo di sufisiente bèrdura i fruta ta redusí riesgo di enfermedat kardiovaskular i algun tipo di kanser (Volksgezondheid, 2017). Fast food i hopi tipo di kuminda di riba kaya, pero tambe limonada zut, tin un balor nutrishonal hopi abou i ta kontené muchu hopi suku (di diferente tipo), salu i vèt insaludabel ku por hiba na diferente problema di salú manera obesidat, diabétis i preshon haltu.

Gráfiko: porsentahe di adulto ku ta kumpli ku e norma di konsumo di 2 òf mas porshon di fruta i bèrdura pa dia, pa kada sekso i grupo di edat, na 2017

Fuente: Enkuesta Nashonal di Salú 2017

Mas ku 40% di adulto na Kòrsou ta kome fast food tur siman 

Den e 30 dianan promé ku e entrevista, 29% di e adultonan a bebe limonada ku gas tur dia, manera Cola, Sprite, Fria, Busta, Monster, Coco Rico i Malta. Ademas, den e 7 dianan promé ku e entrevista, 41% di e adultonan a kome na un restorant di fast food manera McDonalds, KFC, Burger King, Pizza Hut òf Wendy's  riba 1 dia òf mas. Serka hende hòmber, bebementu di limonada tur dia ta mas frekuente ku serka hende muhé (33% vs. 25%). Pa fast food, e porsentahe di hende hòmber i hende muhé ta práktikamente meskos (40% vs. 41%).

Gráfiko: porsentahe di adulto ku ta bebe limonada tur dia i ku ta kome fast food tur siman, pa kada sekso i grupo di edat, na 2017

Fuente: Enkuesta Nashonal di Salú 2017

Mitar di adulto di 18 te ku 24 aña ta bebe limonada tur dia

Serka hende di 18 te ku 24 aña, kustumber insaludabel di kome ta hopi mas frekuente kompará ku e gruponan di mas edat. Ocho porshento di hende di 18 te ku 24 aña ta kumpli ku e norma di konsumo di fruta i 10% di e grupo di edat akí ta kumpli ku e norma di konsumo di bèrdura. Ademas, 65% di nan ta kome fast food tur siman i 48% ta bebe limonada tur dia.

Konsumo di fruta i bèrdura ta mas abou serka adulto ku tin un státus sosioekonómiko abou 

Mas abou e grupo su nivel di enseñansa ta i mas difikultat nan tin pa kubri gastu ku e entrada di famia, ménos nan ta kumpli ku e normanan pa konsumo di fruta i bèrdura.

Gráfiko: porsentahe di adulto ku ta kumpli ku e norma di 2 òf mas pida fruta i bèrdura pa dia, pa kada nivel di enseñansa i kapasidat pa kubri gastu, na 2017

Fuente: Enkuesta Nashonal di Salú 2017

Konsumo di limonada ta mas haltu serka adulto ku tin un státus sosioekonómiko abou. 

Konsumo diario di limonada ta mas frekuente serka hende ku tin un nivel di enseñansa abou i hende ku tin un poko òf hopi difikultat pa kubri nan gastunan.

Gráfiko: porsentahe di adulto ku den e último 30 dianan a bebe limonada ku gas tur dia, manera Cola, Sprite, Fria, Busta, Monster, Coco Rico i Malta, na 2017

Fuente: Enkuesta Nashonal di Salú 2017

Konsumo di fast food ta mas haltu serka adulto ku no tin niun difikultat pa kubri nan gastunan

Konsumo di fast food tur siman ta mas frekuente serka hende ku tin un nivel di enseñansa HAVO/VWO/SBO i esnan ku no tin niun difikultat pa kubri nan gastunan.

Gráfiko: porsentahe di adulto ku den e último 7 dianan a kome 1 dia òf mas na un restorant di fast food, manera McDonalds, KFC, Burger King, Pizza Hut òf Wendy's, na 2017

Fuente: Enkuesta Nashonal di Salú 2017

Kuater porshento di mucha di skol tin hamber frekuentemente

Kuater porshento di mucha di skol a bisa ku ‘mayoria bes òf tur ora’ nan tabatin hamber den e 30 dianan promé ku e entrevista pasobra no tabatin sufisiente kuminda den kas.

Gráfiko: porsentahe di mucha di skol ku tabatin hamber mayoria bes òf tur ora pasobra no tabatin sufisiente kuminda den kas, na 2015

Fuente: Curaçao Global School-based Student Health survey (GSHS) Study, 2015

Un di kada 8 mucha di skol AGO tin hamber regularmente

Un di kada 8 mucha di skol AGO (12%) a bisa ku nan tabatin hamber ‘mayoria bes òf tur ora’ den e 30 dianan promé ku e entrevista pasobra no tabatin sufisiente kuminda den kas. Serka e alumnonan di VSBO, e porsentahe ta 4%, i na HAVO/VWO i SBO ta 2% di e muchanan. No tin diferensia entre mucha hòmber i mucha muhé, ni entre e diferente gruponan di edat.

Gráfiko: porsentahe di mucha di skol ku tabatin hamber mayoria bes òf tur ora pasobra no tabatin sufisiente kuminda den kas, pa kada nivel di enseñansa, na 2015

Fuente: Curaçao Global School-based Student Health survey (GSHS) Study, 2015

Dos di kada tres mucha di skol ta keda sin desayuná mayoria bes òf semper

Mas o ménos dos di kada tres (65%) mucha di skol ta keda sin desayuná mayoria di bes òf semper. Na tur, 15% di e muchanan di skol a bisa ku nunka òf kasi nunka nan no ta desayuná. No tin diferensia entre e diferente gruponan di edat.

Gráfiko: porsentahe di mucha di skol ku kustumber di desayuná, na 2015

Fuente: Curaçao Global School-based Student Health survey (GSHS) Study, 2015

Kompará ku mucha muhé, mucha hòmber ta bisa ku mas frekuensia ku nan no ta desayuná

Na 2015, mucha hòmber a bisa ku mas frekuensia ku nan no ta desayuná nunka, kompará ku mucha muhé (9% vs. 6%).

Mucha di skol ta kome bèrdura ku mas frekuensia, kompará ku fruta 

Sesenta porshento (60%) di mucha di skol ta kome fruta 1 òf mas bes pa dia i 72% di mucha di skol ta kome bèrdura 1 òf mas bes pa dia. Tin diferensia chikitu entre mucha hòmber i mucha muhé i entre e diferente gruponan di edat pa loke ta trata konsumo di fruta i bèrdura.

Gráfiko: porsentahe di mucha di skol ku ta kome 1 òf mas porshon di fruta/bèrdura tur dia, na 2015

Fuente: Curaçao Global School-based Student Health survey (GSHS) Study, 2015

Segun ku e mucha di skol ta pasa den su adolesensia, e ta haña mas kontrol pa skohe kiko e ta kome. Hopi bes, e eskohonan ku un hóben hasi den e temporada akí ta keda te den su bida adulto (Lien et al.,2001). Un dieta balansá den adolesensia ta importante pa un bon salú i desaroyo, i por yuda prevení problema di salú manera obesidat, enfermedat di kurason, diabétis i algun tipo di kanser. Pa un dieta ta salú, e mester inkluí un desayuno tur dia (pasobra estudio ta mustra ku esei ta kontribuí na un peso saludabel, mihó prestashon na skol, i pa bo sinti bon en general (Rampersaud et al, 2005). Un alimentashon defisiente, por ehèmpel desnutrishon debí na falta di proteina-energia, heru, vitamina A i yodo, tin un efekto direkto riba e mucha su kapasidat pa partisipá i siña na skol (Taras, 2005).

Mas o ménos dos di kada tres mucha di skol ta bebe limonada tur dia

Sesentiun porshento di mucha di skol (61%) ta bebe limonada ku gas tur dia (manera coke, fria i malta). Ademas, 23% ta bebe limonada ku gas tres òf mas biaha riba un solo dia. No tin diferensia entre mucha hòmber i mucha muhé ni entre e diferente gruponan di edat pa loke ta konsumo diario di limonada. Konsumo diario di limonada ku gas tabata ménos frekuente serka e muchanan di skol HAVO/VWO, kompará ku e muchanan di skol di e otro nivelnan di enseñansa.

 Gráfiko: porsentahe di mucha di skol ku a bebe limonada ku gas tur dia na 2015

Fuente: Curaçao Global School-based Student Health Survey (GSHS) Study, 2015

Shete di kada dies mucha di skol ta kome fastfood tur siman

Den e siman promé ku e entrevista, shete di kada dies mucha di skol (69,0%) a kome na un restorant di fastfood (manera McDonalds, KFC i Pizza Hut) riba un òf mas dia. Ademas, 21% ta kome fastfood tres òf mas bes pa siman. Mucha muhé ta kome na restorant di fastfood ku un poko mas frekuensia kompará ku mucha hòmber. No tin diferensia entre e diferente gruponan di edat i nivel di enseñansa, pa loke ta trata konsumo semanal di fastfood.

Gráfiko: porsentahe di mucha di skol ku ta kome fast food tur siman, na 2015

Fuente: Curaçao Global School-based Student Health survey (GSHS) Study, 2015