Enfermedat koronario di kurason

Enfermedat koronario di kurason ta mas frekuente serka adulto na Bándariba 

Enfermedat koronario di kurason ta mas frekuente serka e adultonan bibá na Bándariba (4%), siguí pa Bándabou (3%), parti ost di Willemstad i parti wèst di Willemstad (2%).

Gráfiko: Porsentahe di adulto ku enfermedat koronario di kurason pa kada region na 2017

* Basá riba ménos ku 100 opservashon i p’esei no inkluí den e relato

Fuente: Enkuesta Nashonal di Salú 2017


Data disponibel


Hustifikashon

Enfermedat koronario di kurason. Enfermedat koronario di kurason, òf enfermedat iskémiko di kurason, ta enfermedat di kurason ku ta presentá debí ku arteria ta bira smal (aterosklerósis) òf debí na defekto den arteria koronario. Ora un arteria bira smal òf ferstòp, esei ta okashoná un falta di oksígeno (iskemia) den e múskulo di kurason (Volksgezondheidenzorg.info, 2017).

Tipo agudo i króniko. Por parti enfermedat koronario di kurason den dos grupo: enfermedat/tipo agudo (infarto di kurason òf infarto di miokardio) i króniko (angina pectoris). Un hende ku haña un infarto (atake) di kurason ta sinti un doló fuerte den su pechu diripiente i e doló ta keda pa basta ratu. Un hende ku angina pectoris tambe tin doló den pechu, pero generalmente su kehonan ta muchu ménos fuerte i, esaki ta importante, nan ta di korto durashon. Algun otro síntoma di enfermedat koronario di kurason por ta ku e kurason no ta kumpli mes bon mas ku su funshon (insufisiensia kardiako) òf e ritmo di kurason ta iregular (Volksgezondheidenzorg.info, 2017).

Angina pectoris. Angina pectoris ta nifiká literalmente ‘doló den pechu.’ E ta bin debí ku temporalmente no tin sufisiente sanger ta bai den e múskulo di kurason. Kasi semper esei ta pasobra na un òf mas kaminda, un arteria koronario a bira smal i p’esei parti di e múskulo di kurason no ta haña sufisiente oksígeno. Den mayoria di kaso, e falta di oksígeno ta presentá na momento ku e persona hasi un esfuerso físiko òf bira emoshoná, esta, ora e kurason tin di traha mas duru i e múskulo di kurason tin mester di mas oksígeno ku loke e baso di sanger ku a bira smal por suministrá. Un diferensia entre angina pectoris i un atake di kurason ta ku serka angina pectoris, e síntomanan ta disparsé asina ku e esfuerso físiko terminá òf e estímulo emoshonal a pasa. Angina pectoris ta okashoná un preshon doloroso típiko, manera un pèrtá, tras di e wesu di pechu, ku ta dura un ratu (algun minüt) so (Volksgezondheidenzorg.info, 2017).

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

PAHO (2018). Sterftecijfers Curaçao 2001-2007. Dataset optenibel via  PAHO mortality database:   https://hiss.paho.org/pahosys/grp.php

Verstraeten S., Griffith-Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Konsultá via   https://www.volksgezondheidenzorg.info/onderwerp/coronaire-hartziekten/cijfers-context/huidige-situatie#definities   RIVM: Bilthoven, 7 januari 2018.