Diabétis

Mas di 10.000 hende ku malu di suku 

Na 2017, segun kálkulo, tabatin 10.126 adulto ku malu di suku (‘diabetes mellitus’): 4.290 hende hòmber i 5.926 hende muhé. Esei ta 8% di poblashon adulto. E kantidat di hende ku malu di suku ta subi ku edat. Na 2013, 9% di hende na Kòrsou a bisa ku nan a sufri di malu di suku den e 12 lunanan promé ku e entrevista.

Gráfiko: Porsentahe di adulto ku malu di suku, pa kada sekso i grupo di edat, na 2017

Fuente: Enkuesta Nashonal di Salú 2017

Malu di suku ta mas frekuente serka adulto ku státus sosioekonómiko mas abou

Na 2017, 8% di adulto na Kòrsou a bisa ku nan tin malu di suku. Na Kòrsou, malu di suku ta mas frekuente serka esnan ku nivel di enseñansa mas abou i esnan ku tin hopi difikultat pa kubri nan gastunan ku nan entrada di famia.

Gráfiko: Porsentahe di adulto ku malu di suku, pa kada nivel di enseñansa i kapasidat pa kubri gastu na 2017

Fuente: Enkuesta Nashonal di Salú 2017

Porsentahe di adulto ku malu di suku a oumentá

E porsentahe di adulto ku ta bisa ku nan tin malu di suku (6% na 1993) a oumentá un poko, te 9% na 2013 i 8% na 2017.

Gráfiko: Tendensia di malu di suku serka adulto, 1993-2017

Fuente: Enkuesta Nashonal di Salú 2013 & 2017; Senso 2011; Curaçao Health Study 1993/1994

Tur aña, komo promedio, 28 persona ta muri komo konsekuensia di malu di suku

Di 2005 pa 2007, 85 persona a muri komo konsekuensia di malu di suku; un promedio di 82 kaso pa aña. Esei ta 20,7 pa kada 100.000 persona. Tabata trata aki di 36 hende hòmber (19,1 pa kada 100.000 hende hòmber) i 49 hende muhé (22,2 pa kada 100.000 hende muhé). Morto komo konsekuensia di malu di suku ta oumentá ku edat.

Gráfiko: Morto komo konsekuensia di malu di suku pa kada 100.000 persona, 2005-2007

Fuente: Statistik di kousa di morto, ICD10-code I60-I69

Sifra di morto komo konsekuensia di malu di suku ta inkompleto

Hopi kaso di morto ta bini komo konsekuensia di komplikashon serka hende ku tin malu di suku, ya ku malu di suku ta hunga un papel importante den otro enfermedat, manera enfermedat kardiobaskular, i tambe den morto komo konsekuensia di e enfermedatnan akí. Den kaso asina, no ta pone malu di suku mes komo e kousa di morto (Mackenbach et al., 1991). Probablemente, semper lo tin algun morto komo konsekuensia di malu di suku ku no ta keda registrá komo tal, debí ku no ta semper e dòkter ku ta yena e deklarashon di morto sa ku e pashènt tabata sufri di suku (van der Meulen, 2005).

Data disponibel

Hustifikashon

Definishon

Diabétis tipo 1 i tipo 2 ta e tiponan mas frekuente di malu di suku. E dos tiponan di malu di suku mas frekuente, kada un ku su propio kousa, ta diabétis tipo 1 i tipo 2. Por mira diabétis di embaraso komo un kategoria riba su mes. Ta konsiderá e kategoria akí komo un faktor di riesgo tambe pa diabétis tipo 2. Debí ku kada bes tin mas tantu kaso nobo di e tipo di diabétis akí ta presentá rònt mundu, VZinfo ta dediká atenshon na diabétis di embaraso tambe (Volksgezondheidenzorg.info, 2017).

Método

CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú, i komportashon relashoná ku salú, di poblashon di Kòrsou.

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Senso: Un senso ta duna un bista di e sirkunstansianan di bida di poblashon na un momento spesífiko. Bo por kompará e resultadonan ku resultado di otro konteo anterior pa haña un bista kon sierto asuntu a desaroyá den pasado, i pa asina por antisipá desaroyo den futuro. A yega di tene sinku senso na Kòrsou: na 1972, 1992, 2001 i 2011.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

Fuente

Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.

Centraal Bureau voor de Statistiek (2011). Gezondheid en beperkingen in Curaçao. Willemstad, Centraal Bureau voor de Statistiek.

Mackenbach JP, Snels IAK, Friden-Kill LM (1991). Diabetes mellitus als doodsoorzaak. Nederlands Tijdschrift voor de Geneeskunde. 1991;135:1492-1496.

van der Meulen A. (2005). Sterfte aan diabetes. Den Haag: Centraal Bureau voor de Statistiek (CBS).

PAHO (2018). Sterftecijfers Curaçao 2001-2007. Dataset optenibel via  PAHO mortality database:  https://hiss.paho.org/pahosys/grp.php

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Konsultá via   https://www.volksgezondheidenzorg.info/onderwerp/diabetes-mellitus/cijfers-context/huidige-situatie#definitie--node-diabetes-type-1-en-type-2-meest-voorkomende-vormen-van-diabetes RIVM: Bilthoven, 7 april 2018.