Grip

Tasa di bakunashon kontra grip ta abou ainda: 6% di persona den e grupo di 60+

Curaçaosche Huisartsen Vereniging (CHV) ta rekomendá un bakunashon kontra grip tur aña, entre otro pa hende di 60 aña òf mas i hende ku problema di salú adishonal manera enfermedat di kurason, enfermedat di pulmon, enfermedat di nir, kánser òf diabétis melítus (CHV, 2019). Debí ku vírùs di grip ta kambia regularmente i ta presentá den un otro forma kada wenter, tur aña e bakuna di grip tin un komposishon diferente. Mester tuma e bakuna entre sèptèmber i òktober. E protekshon ku e ta duna ta solamente pa e tiponan di grip ku ta komun e temporada ei. Organisashon Mundial di Salú (WHO) tin komo ophetivo pa 75% di hende di mas edat risibí bakuna kontra grip.

Na 2017, 3% di poblashon total i 6% di e grupo di 60+ a tuma un bakuna kontra grip den e temporada di grip anterior. Na 2013, e tasa di bakunashon di poblashon total tabata 4% i di e grupo di 60+ tabata 10%.

Komo promedio, bakuna kontra grip ta redusí un hende su chèns di haña grip ku 67%. Asta si un hende ku a tuma e bakuna haña grip tòg, den mayoria di kaso e ta hañ'é ménos pisá. Asina, e chèns di komplikashon, hospitalisashon òf morto ta keda redusí bastante (volksgezondheidenzorg.info, 2019).

 Gráfiko: porsentahe di adulto ku a tuma un bakuna kontra grip den e último temporada di grip, pa kada sekso i grupo di edat, 2017

Fuente: Enkuesta Nashonal di Salú 2017

Mayoria di bakunashon kontra grip ta serka persona ku un nivel di enseñansa mas abou

Na 2017, e porsentahe di adulto ku a risibí un bakuna kontra grip den e temporada di grip anterior tabata un poko mas haltu serka hende ku tin un nivel di enseñansa mas abou (5%) i adulto ku tin sierto difikultat pa kubri nan gastunan (4%). Sin embargo, no ta eksistí un relashon bisto entre un persona su státus sosioekonómiko i e echo ku el a tuma un bakuna kontra grip òf nò.

Gráfiko: porsentahe di adulto ku a risibí un bakuna kontra grip den e temporada anterior, pa kada státus sosioekonómiko, 2017

Fuente: Enkuesta Nashonal di Salú 2017

Morto komo konsekuensia di grip

Na tur, di 2005 pa 2007, a registrá tres morto komo konsekuensia di grip, den e kategoria di edat di 85+.

Data disponibel

Hustifikashon

Definishon

Grip (ICD-9-code 487; ICD-10-code J10-11) ta ser kousá pa e vírùs di grip tipo A òf B. Un karakterístika di e vírùsnan tipo A ta ku tin un variashon grandi den e proteinanan ku ta kubri nan: hemaglutinina (H) i neuraminidasa (N). Ta eksistí diferente suptipo, por ehèmpel, H1N1, H1N2 i H3N2. No ta tur e suptiponan akí ta den sirkulashon pareu. Nan ta presentá den diferente temporada. Tipo A ta mas importante ku tipo B pa loke ta trata gravedat i peliger di morto. E vírùsnan di grip tipo B no tin suptipo, pero ta parti nan den diferente ‘liña’ sí (liña Yamagata, liña Victoria). Kasi tur aña, vírùs di grip por okashoná un epidemia grandi òf chikitu ku e mesun kuadro klíniko serka tur grupo di edat. Esei ta prinsipalmente debí ku variante nobo di e vírùs ta keda presentá kada tantu tempu segun ku e proteinanan (antigèn) den kaska di e vírùs ta kambia (antigen drift). Komo ku un persona su defensa ta dirigí kontra e antigènnan ku tin den e kaska, e inmunidat ku e poblashon a desaroyá anteriormente via infekshon natural òf bakunashon no ta stòp e vírùs. Ademas, tin bes e struktura di antigen di un suptipo por kambia bastante repentinamente (antigen shift). Ora esei sosodé, e vírùs (parsialmente) nobo di grip por plama na gran eskala debí ku hende (kasi) no tin inmunidat kontra dje. Den un kaso asina, por bin un epidemia na nivel mundial (pandemia).

Grip ta un enfermedat respiratorio agudo ku ta presentá prinsipalmente den e temporadanan mas friu di aña. Su periodo di inkubashon ta un pa tres dia. Den e promé siman di e enfermedat, e persona por infektá otro hende i opheto den su ambiente. E infekshon por plama via tosamentu, nistermentu òf kontakto direkto ku e persona ku ta malu. Hopi bes, e kuadro klíniko mes ta kuminsá ku un oumento di temperatura di kurpa te 40 grado Celsius òf mas, i huntu ku esei kalafriu. Un pashènt di grip ta sinti su kurpa bastante malu. E tin doló di kabes i di múskulo, ta tosa i/òf tin doló tras di su wesu (tabla) di pechu. Generalmente, si no tin komplikashon, e keintura ta dura dos pa sinku dia. Ora e keintura pasa, e pashènt ta keda sinti suak durante un par di dia òf siman. Hende salú ta superá grip denter di un òf dos siman sin keda ku konsekuensia.

Klínikamente, ta difísil pa distinguí pa kada kaso individual si un infekshon respiratorio ta debí na vírùs di grip òf un otro vírùs. P'esei, den práktika, hopi bes e diagnóstiko duná ta ‘kuadro klíniko paresido na grip’ (na hulandes, IAZ). Dijkstra et al., 2009, ta deskribí e kuadro klíniko di e siguiente manera:

  • Komienso agudo: algun molèster no muchu kla ta kuminsá no mas ku 3-4 dia promé.
  • Keintura: temperatura di kurpa mínimo di 38,0 grado Celsius rektal.
  • Presensia di a lo ménos un di e siguiente síntomanan: tosamentu, nanishi ta kore, doló di garganta, doló di kabes, doló na altura di wesu (tabla) di pechu i doló di múskulo.

(Volksgezondheidsenzorg, 2019)

Bakunashon kontra grip: Organisashon Mundial di Salú (WHO) tin komo ophetivo pa 75% di hende di mas edat risibí bakuna kontra grip.

Método

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

Fuente

Curaçao Huisartsen Vereniging (CHV). Geraadpleegd via https://www.chv-site.org/

Dijkstra, F., Brandsema, P.S., van Gageldonk-Lafeber, A.B., van der Hoek, W. (2009). Jaarrapportage surveillance respiratoire infectieziekten 2008. Bilthoven: Rijksinstituut voor Volksgezondheid en Milieu RIVM.

Pan American Health Organisation (2017). Geraadpleegd via http://www.paho.org/data/index.php/en/indicators.html

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith - Lendering, M., & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2019). Influenza. Geraadpleegd via https://www.volksgezondheidenzorg.info/onderwerp/levensverwachting/cijfers-context/huidige-situatie#definitie--node-met-levensverwachting-wordt-levensverwachting-bij-geboorte-bedoeld

RIVM: Bilthoven, 2 december 2019