Kanser na prostat

Kánser na prostat ta e tipo di kánser mas komun serka hende hòmber

Di 2009 pa 2011, tabatin 163 kaso nobo di kánser na prostat pa kada 100.000 hende hòmber. Esei ta nifiká 493 kaso nobo i un promedio di 164 kaso pa aña.

Kánser na prostat ta e tipo di kánser mas komun serka hende hòmber. Serka hende hòmber bou di 40 aña, kasi no tin kaso di kánser na prostat. E kantidat di kaso nobo ta oumentá ku edat te na 74 aña i despues di esei e ta kuminsá baha.

Gráfiko: insidensia anual di kánser na prostat pa kada 100.000 hende hòmber, pa kada grupo di edat, 2009–2011

Fuente: IARC cancer incidence database; registro di Kanser di Analytisch Diagnostisch Centrum N.V., ICD10-code C61

Ademas di edat, dos otro faktor di riesgo importante pa kánser na prostat ta antesedente étniko i antesedente di famia. Na Merka por ehèmpel, serka hende hòmber afroamerikano e riesgo di haña kánser na prostat ta te 1,6 biaha mas haltu ku serka merikano blanku. Ademas, hende hòmber afroamerikano tin te 2,4 biaha mas tantu chèns di muri di kánser na prostat kompará ku hende hòmber blanku di e mesun edat. E diferensianan akí tin di aber prinsipalmente ku diferensia den alimentashon i estilo di bida.  

Preshon haltu, kolèsteròl haltu, defisiensia di vitamina D, inflamashon di prostat i sterilisashon (vasektomia) tambe ta yuda subi un hende su riesgo di haña kánser na prostat. Tin ku bisa ku aparentemente sobrepeso, uso di alkohòl i humamentu no ta hunga un ròl den desaroyo di kánser na prostat (Alqahtani, 2015).

Pa aña, 46 hende hòmber ta muri komo konsekuensia di kánser na prostat

Den e periodo di 2005 pa 2007, 138 hende hòmber a muri komo konsekuensia di kánser na prostat; esei ta un promedio di 46 kaso pa aña. Esaki ta representá 56 morto pa kada 100.000 hende hòmber. Den e periodo di 1980–2004, tabatin un oumento den e kantidat di hende hòmber ku a muri di kánser na prostat na Antia Hulandes, di 19 kaso pa kada 100.000 hende hòmber den e periodo di 1980-1984 te na 70,2 kaso pa kada 100.000 hende hòmber den e periodo di 2000-2004.

Gráfiko: morto komo konsekuensia di kánser na prostat, 1980-2007

Fuente: Paho/ WHO mortality database, ICD10-code C61

Data disponibel

Hustifikashon

Definishon

Kánser na prostat ta un tumor maligno na prostat. Mayoria di tumor maligno na prostat ta adenokarsinoma ku ta forma den sèl glandular di prostat. Ta un porsentahe chikitu so (aproksimadamente 5%) di tumor maligno na prostat ta forma otro kaminda den prostat (den e tehido di apoyo, konektivo òf baskular) (Volksgezondheidenzorg.info, 2020).

Método

Registro di kanser: Departamento di patologia di Analytisch Diagnostisch Centrum tin un base di dato tokante insidensia (kantidat di kaso nobo) i prevalensia (kantidat di kaso eksistente) di kanser na Kòrsou. E base di dato ta kontené informashon di tur kaso di tumor maligno diagnostiká na Kòrsou.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

Fuente

Alqahtani, K.S., Srinivasan, S., Mital, D.P. and Haque, S. (2015) ‘Analysis of risk factors for prostate cancer patients’, Int. J. Medical Engineering and Informatics, Vol. 7, No. 4, pp.365–380.

IARC cancer incidence database (2019). Dataset verkrijgbaar via https://gco.iarc.fr/databases.php

PAHO mortality database. Dataset verkrijgbaar via https://hiss.paho.org/pahosys/grp.php.

Volksgezondheidenzorg.info (2020). Geraadpleegd via https://www.volksgezondheidenzorg.info/onderwerp/prostaatkanker/cijfers-context/huidige-situatie#definities . RIVM: Bilthoven, 2 februari 2020.

WHO mortality database. Dataset verkrijgbaar via https://www.who.int/healthinfo/mortality_data/en/.