Kanser na pulmon

Un promedio di 26 pashènt nobo di kánser na pulmon pa aña

Den e periodo di 2009 pa 2011, a diagnostiká kánser na pulmon serka 78 persona (un promedio di 26 persona pa aña). Hende hòmber ta kore mas riesgo di haña kánser na pulmon, kompará ku hende muhé. Den e periodo menshoná, serka hende hòmber, e kantidat di pashènt nobo tabata 24 pa kada 100.000 hende hòmber. Despues di kánser na prostat i kánser na tripa, kánser na pulmon ta e tipo di kánser mas komun serka hende hòmber. Serka hende muhé, kánser na pulmon ta bin na di kuater lugá, despues di kánser na pechu, kánser na tripa i kánser na (boka di) matris. Esei ta representá 6 kaso pa kada 100.000 hende muhé.

Serka hende bou di 45 aña, práktikamente bo no ta topa kánser na pulmon.

Gráfiko: insidensia anual di kánser na pulmon pa kada 100.000 persona, pa kada grupo di edat, 2009–2011

Fuente: IARC Cancer Incidence Database; Registro di kánser di Analytisch Diagnostisch Centrum N.V., ICD10-code C33-34

Humamentu ta e kousa mas importante di kánser na pulmon

Tin diferente faktor ku ta hisa e riesgo ku un hende tin di por haña kánser na pulmon, pero humamentu ta sin mas e faktor di riesgo prinsipal. Serka mas di 85% di kaso, kánser na pulmon ta bin debí na uso di tabako, spesífikamente sigaria (Williams & Sandler, 2001). No ta serka humadó so e riesgo di haña kánser na pulmon ta subi. Hende ku no ta humadó pero ku ta pasa hopi tempu den espasio kaminda tin huma di otro humadó (humadó pasivo) tambe tin un riesgo mas haltu. Ademas di humamentu, faktor genétiko i di medio ambiente tambe ta hunga un papel (Volksgezondheidinfo, 2020).

Tur aña, kasi 36 persona ta muri di kánser na pulmon

Den e periodo di 2005 pa 2007, tin 101 persona ku a muri di kánser na pulmon; esei ta un promedio di kasi 36 kaso pa aña. Esaki ta representá 19 morto pa kada 100.000 persona. Den e periodo di 1980–2007, e sifra di mortalidat di kánser na pulmon na Antia Hulandes i Kòrsou a keda práktikamente meskos.

Gráfiko: morto komo konsekuensia di kánser na pulmon, 1980-2007

Fuente: PAHO i WHO Mortality Database, ICD10-code C33-34

Data disponibel


Hustifikashon

Kánser na pulmon ta inkluí tumor na trákea, bronkio i/òf pulmon

Kánser na pulmon ta tumor maligno ku ta forma den tehido di pulmon. Kánser na pulmon ta inkluí tumor na trákea, na bronkio i den pulmon. (Volksgezondheideninfo, 2020).

Registro di kanser: Departamento di patologia di Analytisch Diagnostisch Centrum tin un base di dato tokante insidensia (kantidat di kaso nobo) i prevalensia (kantidat di kaso eksistente) di kanser na Kòrsou. E base di dato ta kontené informashon di tur kaso di tumor maligno diagnostiká na Kòrsou.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

IARC cancer incidence database. Dataset verkrijkbaar via https://gco.iarc.fr/databases.php.

PAHO mortality database. Dataset verkrijgbaar via https://hiss.paho.org/pahosys/grp.php.

Volksgezondheidenzorg.info (2020). Geraadpleegd via https://www.volksgezondheidenzorg.info/onderwerp/longkanker/cijfers-context/huidige-situatie#definitie--node-wat-longkanker RIVM: Bilthoven, 2 mei 2020.

WHO mortality database. Dataset verkrijgbaar via https://www.who.int/healthinfo/mortality_data/en/.

Williams MD, Sandler AB (2001). The epidemiology of lung cancer. Cancer Treat Res, 105, 31-52.