Kánser na tripa diki ta e di dos tipo di kánser mas frekuente serka tantu hende hòmber komo hende muhé na Kòrsou 

Despues di kánser na prostat (serka hende hòmber) i kanser na pechu (serka hende muhé), kánser na tripa diki ta e tipo di kánser mas komun serka tantu hende hòmber komo hende muhé. Den e periodo di 2009 pa 2011, a diagnostiká kánser na tripa diki serka 94 hende hòmber (un promedio di 31 pa aña) i 84 hende muhé (un promedio di 28 pa aña). Hende hòmber tin mas chèns di haña kánser na tripa diki kompará ku hende muhé: den e periodo menshoná, e kantidat di diagnóstiko nobo tabata 45,3 pa kada 100.000 hende hòmber i 26,1 pa kada 100.000 hende muhé. Serka hende hòmber bou di 45 di edat, práktikamente bo no ta topa kánser na tripa diki.

Gráfiko: insidensia anual di kánser na tripa diki pa kada 100.000 persona, pa kada grupo di edat i sekso, 2009–2011

Fuente: Registro di kánser, Analytisch Diagnostisch Centrum N.V., ICD10-code C18

Por parti e faktornan ku tin efekto riba desaroyo di kánser na tripa diki den faktor personal i faktor relashoná ku estilo di bida. E faktornan personal mas importante ta sobrepeso i faktor genétiko. Por ehèmpel, 10-20% di tur tumor na tripa ta hereditario. E faktornan prinsipal relashoná ku estilo di bida ta nutrishon, aktividat físiko i uso di alkohòl. Ta kalkulá ku faktor relashoná ku estilo di bida ta splika 20-45% di tur kaso di kánser na tripa na mundu (WCRF, AICR, 2009-2011; Volksgezondheidenzorg.info, 2019).

A tèst un kuart di tur adulto na Kòrsou pa sa si tin sanger den nan sushi

Na 2017, 25% di tur adulto na Kòrsou a yega di hasi un tèst den e dos añanan promé ku e entrevista pa sa si tabatin sanger den nan sushi. E kantidat di adulto ku a tèst pa sa si tin sanger den nan sushi ta oumentá drástikamente ku edat. Den e grupo di edat di 18-24 aña, a tèst 12% pa sa si tin sanger den nan sushi; den e grupo di edat di 65 aña òf mas, e porsentahe ta 30%.

Sanger den sushi por ta un indikashon di kánser na tripa diki. Ora topa sanger den sushi, mester hasi un tèst mas. E tèst adishonal ta konsistí di un kolonoskopia (pasa slan), pa saminá parti paden di e tripa diki. Ta usa un kámara chikitu pa mira si tin polip den e tripa. Den polip por tin sèl problemátiko ku por krese bira tumor maligno, esta, kánser na tripa diki.

Gráfiko: porsentahe di adulto ku a tèst den e último dos añanan pa sa si tabatin sanger den nan sushi, pa kada sekso i grupo di edat, 2017

Fuente: Enkuesta Nashonal di Salú 2017

Tres kuart di e adultonan ku a tèst pa sa si tabatin sanger den nan sushi a hasi un kolonoskopia

Un 74% di e adultonan ku a tèst den e último dos añanan pa sa si tabatin sanger den nan sushi a hasi un kolonoskopia den e último aña ku a pasa. E kantidat di adulto ku a hasi kolonoskopia tambe ta oumentá ku edat.

Komo promedio, 23 persona pa aña ta muri di kánser na tripa diki

Den e periodo di 2005 pa 2007, 117 persona a muri di kánser na tripa diki; esei ta un promedio di 39 kaso pa aña. Esaki ta representá 21 pa kada 100.000 persona. Den e periodo ei, hende hòmber a kore un riesgo mas haltu di muri di kánser na tripa diki (24 pa kada 100,000 hende hòmber) kompará ku hende muhé (18 pa kada 100.000 hende muhé). For di añanan 80, e sifra di morto komo konsekuensia di kánser na tripa diki pa kada 100.000 persona a keda práktikamente meskos.

Gráfiko: morto komo konsekuensia di kánser na tripa diki pa kada 100.000 persona (periodo 1980–2007)

Fuente: Base di dato di mortalidat di PAHO i WHO, ICD10-code C18-21