search
close
Na Kòrsou, 2% di adulto tabatin keho di depreshon den e dos simannan promé ku e entrevista. Serka hende muhé, esaki ta mas frekuente ku serka hende hòmber (3% vs. 1%). E porsentahe di adulto ku keho di depreshon ta mas haltu den e grupo di 18 pa 24 aña. A midi e kehonan di depreshon a base di e eskala ‘8-item Patient Health Questionnaire Depression Scale (PHQ-8)’ (Kroenke et al., 2008). E instrumento akí ta konsistí di ocho pregunta tokante kon grave e kehonan di depreshon ta.
Depreshon ta un di e enfermedatnan mas frekuente na mundu. Na Europa, depreshon tabata na e di kuater lugá riba e lista di e enfermedatnan ku a okashoná mas tantu keho na 2012 (Murray et al., 2012). Hende ku ta sufri di depreshon ta kore un riesgo mas haltu di suisidio, pero tambe di kánser i enfermedat di kurason (Batty et al., 2017; Rugulies, 2001).
Gráfiko: porsentahe di adulto ku keho di depreshon pa kada sekso i grupo di edat, 2017
Fuente: Enkuesta Nashonal di Salú 2017
Na Kòrsou, keho di depreshon ta mas frekuente serka hende ku státus sosioekonómiko mas abou. Ku otro palabra, hende na Kòrsou ku tin hopi difikultat pa kubri nan gastunan ku e entrada di famia i hende ku un nivel di enseñansa mas abou ta esnan ku tin mas tantu keho di depreshon (10% i 6% respektivamente). Keho di depreshon ta mas frekuente serka hende ku un nivel di enseñansa mas abou, kompará ku hende ku un nivel di enseñansa mediano òf haltu.
Gráfiko: Porsentahe di adulto ku keho di depreshon, pa kada nivel di enseñansa i kapasidat pa kubri gastu, 2017
Fuente: Enkuesta Nashonal di Salú 2017
Depreshon klíniko E Manual di Trastorno Mental (DSM-5; American Psychiatric Association. DSM-5 Task Force., 2014) mas resien ta bisa ku por papia di depreshon klíniko si un pashènt ta kumpli ku tur e siguiente kriterionan (A te ku E):
Kriterio pa klasifiká depreshon klíniko
| A
|
E persona tabatin sinku òf mas di e siguiente síntomanan kasi tur dia, durante mayor parti di dia, durante dos siman òf mas sin interupshon, i e síntomanan no ta kuadra ku su manera di funshoná di ántes. Ademas, sea e síntoma (1) ‘tristesa’ òf e síntoma (2) ‘ménos interes òf plaser den aktividat’ (òf tur dos) mester ta den e persona su lista di síntoma:
|
| 1. Tristesa
|
|
| 2. Ménos interes òf plaser den (kasi) tur aktividat
|
|
| 3. Baha peso basta sin ku el a tene un dieta, òf a subi peso basta sin ku su apetit a bira klaramente mas tantu
|
|
| 4. Difikultat pa drumi
|
|
| 5. Su moveshonnan sikomotóriko ta slo òf eksitá
|
|
| 6. Ta sinti kansá òf sin energia
|
|
| 7. Ta sinti ku e no bal nada, òf ta sintié eksageradamente kulpabel, òf kulpabel sin niun motibu
|
|
| 8. Difikultat pa pensa, konsentrá òf tuma desishon
|
|
| 9. Ta pensa hopi riba morto, por ehèmpel, pensamentu suisidal
|
|
| B
|
E síntomanan ta pone e persona sufri hopi òf ta strob'é hopi di funshoná
|
| C
|
No por bisa ku e síntomanan ta debí na un remedi òf un enfermedat físiko
|
| D
|
No por bisa ku e síntomanan tin di aber ku un enfermedat sikótiko
|
| E
|
Nunka e persona no a yega di tin un episodio di mania (síndrome maniako) ni di hipomania
|
Banda di e kriterionan menshoná, tin ku indiká si e persona tin otro síntoma spesífiko manera miedu òf karakterístika sikótiko, kon grave e trastorno ta i kon e ta desaroyá. (Volksgezondheidenzorg.info, 2020).
ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.
American Psychiatric Association (2014). DSM-5 Task Force. Diagnostic and statistical manual of mental disorders: DSM-5. Washington, D.C.: American Psychiatric Publishing.
Batty, G.D., Russ, T.C., Stamatakis, E.,Kivimäki, M. (2017). Psychological distress in relation to site specific cancer mortality: pooling of unpublished data from 16 prospective cohort studies. BMJ, 356 :j108.
Kroenke, K., Strine, T.W., Spitzer, R.L., Williams, J.B.W., Berry, J.T., Mokdad, A.H. (2008). The PHQ-8 as a measure of current depression in the general population. Journal of Affective Disorders, doi:10.1016/j.jad.2008.06.026
Murray CJL, Vos T, Lozano R, Naghavi M, Flaxman AD, Michaud C, et al (2012). Disability-adjusted life years (DALYs) for 291 diseases and injuries in 21 regions, 1990-2010: a systematic analysis for the Global Burden of Disease Study 2010. Lancet, 380(9859), 2197-223.
Rugulies, R. (2001). Depression as a predictor for coronary heart disease: A review and meta-analysis. American Journal of Preventive Medicine, 23, 51-61.
Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.
Verstraeten S., Griffith, M., & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.
Volksgezondheidenzorg.info (2020). Geraadpleegd via https://www.volksgezondheidenzorg.info/onderwerp/stemmingsstoornissen/cijfers-context/huidige-situatie#definitie--node-definitie-van-de-depressieve-stoornis
RIVM: Bilthoven, 19 mei 2020