Problema di nèk

Riba 7.000 hende ku problema di nèk

Na 2017, segun kálkulo, tabatin 7.270 adulto ku un enfermedat òf otro tipo di problema króniko di nèk: 2.229 hende hòmber i 5.041 hende muhé. Na tur, esei ta 6% di poblashon adulto. Problema di nèk ta mas frekuente serka hende muhé (7%) kompará ku serka hende hòmber (4%). E porsentahe di hende ku problema di nèk ta oumentá ku edat i ta mas haltu den e grupo di 65+.

Gráfiko: Porsentahe di adulto ku problema di nèk, pa kada sekso i grupo di edat


Fuente: Enkuesta Nashonal di Salú 2017

Problema di nèk ta mas frekuente serka adulto ku státus sosioekonómiko abou

Na 2017, 6% di adulto na Kòrsou a bisa ku nan tin un enfermedat òf otro problema króniko di nèk. Na Kòrsou, problema di nèk ta mas frekuente serka adulto ku un nivel di enseñansa abou i esnan ku tin hopi difikultat pa kubri nan gastunan ku e entrada di famia.

Gráfiko: Porsentahe di adulto ku problema di nèk, pa kada nivel di enseñansa i kapasidat pa kubri gastu na 2017

Fuente: Enkuesta Nashonal di Salú 2017

Data disponibel

Hustifikashon

Definishon

Huntu ku problema di lomba (dorsopatia), problema di nèk ta e kategoria di enfermedat mas komun ku ta afektá hende su órganonan di moveshon. Problema di nèk por tin un variedat di diferente kousa, i tin biaha e kousa no ta konosí.  (Volksgezondheidenzorg.info, 2017).

Método

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Fuente

Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Konsultá via https://www.volksgezondheidenzorg.info/onderwerp/nek-en-rugklachten/regionaal-internationaal/regionaal#definitie--node-nek-en-rugklachten RIVM: Bilthoven, 7 januari 2018.