Shete porshento di e yunan ku a nase na 2017 tabata di un mama di 19 aña òf ménos

Na 2017, 115 yu a nase na Kòrsou di un mama ku na e momento ei tabatin 19 aña òf ménos (mama tiner). Esei ta shete porshento (7%) di e 1.548 yunan ku a nase na 2017. E porsentahe di mama tiner ta mas haltu den e grupo di 19 aña di edat.

Gráfiko: Kantidat di yu ku a nase di mama tiner di kada edat na 2017

 Fuente: Ofisina Sentral di Statistik, 2017

E kantidat di mama tiner a bin ta baha di 1998 pa awor

E kantidat di mama tiner pa kada mil mucha muhé a bin ta baha di 1998 pa awor. E sifra di nasementu mas haltu tabata na 1998. Na e aña ei, 52 di kada 1.000 mucha muhé di 15 te ku 19 aña a bira mama. A trata akí di 283 mucha muhé. Di 1998 pa 1999, por mira un bahada drástiko den e índise di nasementu, i den e siguiente añanan e kantidat di yu ku a nase pa kada mil mucha muhé a sigui baha poko poko. Despues di 2005, pa basta tempu e índise di nasementu a keda kasi pareu. Den e temporada ei, tur aña 175 pa 200 mucha muhé di 15 te ku 19 aña tabata haña yu. Na 2016 tabatin un otro bahada, i na 2017, 115 yu a nase ora nan mama tabatin 19 aña òf ménos.

Gráfiko: Kantidat di yu ku a nase di mama tiner na Kòrsou, 1998-2017

Fuente: Ofisina Sentral di Statistik, 2017

E kantidat di mama tiner ‘di mas edat’ ta oumentá

Na 2017, 47% di e mamanan tiner tabatin 19 aña, siendo ku rònt di aña 2000, ainda e porsentahe tabata 30%. Aunke e sifra akí ta fluktua basta di un aña pa otro, por opservá un oumento den e porsentahe di mama tiner ‘di mas edat’ den e último diessinku añanan. Di otro banda, e porsentahe di mama tiner den e grupo di edat di mas yòn ta bahando. Rònt di aña 2000, un di kada kuater (24%) mama tiner tabatin 16 aña òf ménos, pero na 2017 esaki a baha te na un di kada seis (15%).

Gráfiko: Kantidat di nasementu pa kada edat di e mama, 1998-2017

Fuente: Ofisina Sentral di Statistik, 2017

Kiko ta konosí tokante e kousa- i konsekuensianan di e kantidat relativamente haltu di mama tiner na Kòrsou?

Di novèmber 2008 te novèmber 2009, Boersma et al. a investigá kon ta pará ku e kantidat di aborto na Kòrsou (Boersma et al., 2012). Den e aña ei, a registrá 1.126 aborto, i den 666 di e kasonan ei, e hende muhé a yena un kuestionario. Den nan tabatin 129 mucha muhé di 14 te ku 19 aña; mas o ménos un di kada sinku di e 666 abortonan ei. Ta kalkulá ku e kantidat di aborto den e kategoria di edat akí ta mas haltu, pasobra tabatin 460 aborto registrá sin un kuestionario yená.

Na 2009, 192 mucha muhé di 15 te ku 19 aña a bira mama (CBS, 2013). Nos por konkluí ku mínimo 321 mucha muhé tiner a sali na estado i ku 40% di e embarasonan akí a terminá den un aborto. Si asumí ku den e 460 kasonan di aborto ku no tin informashon di dje, edat di e hende muhénan ta distribuí meskos ku serka esunnan ku sí tin informashon di dje, esei ke men ku a trata akí di 413 tiner na estado i 221 aborto. Si ta asina, esei lo nifiká ku 54% di tur embaraso hubenil a terminá den aborto.

Tambe Boersma a studia e kousanan di embaraso indeseá. E kousa mas frekuente ku el a opservá ta ku no a usa un medida antikonseptivo konfiabel. Mitar di e hende muhénan ku sí a usa antikonseptivo a bisa ku nan no tabata usa esaki na un manera regular.