search
close
Nuebe porshento di poblashon riba 18 aña di edat ta eksperensiá un òf mas limitashon den nan funshonamentu, spesífikamente pa loke ta trata bista, oido i/òf mobilidat. Limitashon di funshonamentu ta dos biaha mas frekuente serka hende muhé, kompará ku hende hòmber (12% vs. 6%). E limitashonnan ta oumentá drástikamente ku edat: Riba 65 aña, un kuart (26%) tin un òf mas limitashon.
Gráfiko: porsentahe di adulto ku limitashon di funshonamentu pa kada grupo di edat i sekso na 2017
Fuente: Enkuesta Nashonal di Salú 2017
Adulto ku tin un òf mas limitashon di funshonamentu den nan aktividatnan, spesífikamente relashoná ku bista, oido i/òf mobilidat, ta mas frekuente den e grupo ku tin un státus sosioekonómiko mas abou. Den e grupo ku e nivel di enseñansa mas abou i esnan ku tin hopi difikultat pa kubri nan gastunan, e porsentahe di adulto ku limitashon di funshonamentu ta mas haltu. Den e resultadonan akí, no a tene kuenta ku diferensia di edat i sekso den e gruponan.
Gráfiko: porsentahe di adulto ku limitashon di funshonamentu pa kada nivel di enseñansa i kapasidat pa kubri gastu, 2017
Fuente: Enkuesta Nashonal di Salú 2017
Sinkuentisinku (55%) porshento di adulto ta òf sa bisti brel òf lèns di kontakto, i 3% ta usa un aparato di oido. Asta ku brel, lèns òf aparato di oido, 2% di adulto tin difikultat pa mira i 1% tin difikultat pa tende. Limitashon di mobilidat ta muchu mas frekuente ku limitashon di bista i oido: 8% di e adultonan enkuestá a bisa ku nan no por kana bon òf ku nan ta inbálido. Partikularmente esnan riba 65 aña (24%) i esnan ku un nivel di enseñansa abou (20%) tin limitashon di mobilidat. Na 2013, 4% di e adultonan na Kòrsou tabatin limitashon di bista, 1% tabatin limitashon pa tende i 7% tabatin limitashon di mobilidat.
Gráfiko: Porsentahe di adulto ku limitashon di bista, oido i mobilidat na 2017
Fuente: Enkuesta Nashonal di Salú 2017
Mei porshento di poblashon di 18 aña òf mas tin un limitashon di oido (0,5%). Pa e poblashon total, esei lo nifiká ku tabatin mas o ménos 603 adulto ku un limitashon di oido na 2017. Den e grupo di 65+, 1% tabatin un limitashon di oido.
Dos porshento (2%) di e poblashon di 18 aña òf mas tin limitashon di bista (ku òf sin uso di brel òf lèns di kontakto). Pa e poblashon total, esei lo nifiká ku tabatin mas o ménos 2.118 adulto ku un limitashon di bista na 2017. Limitashon di bista ta un tiki mas frekuente serka hende muhé ku serka hende hòmber (2% vs. 1%). Na Kòrsou, limitashon di bista ta mas frekuente den e grupo di 65+, esnan ku un nivel di enseñansa mas abou i e adultonan ku tin hopi difikultat pa kubri nan gastunan.
Ocho porshento (8%) di poblashon adulto ta sinti ku nan tin un òf mas limitashon di mobilidat. Esei ta representá mas o ménos 9.669 persona. Limitashon di mobilidat ta frekuente spesialmente serka adulto den e grupo di 65 aña òf mas (24%) i esnan ku un nivel di enseñansa mas abou (20%). Hende muhé ta sinti ku nan tin limitashon di mobilidat ku mas frekuensia, kompará ku hende hòmber (10% di hende muhé i 5% di hende hòmber). Na Kòrsou, limitashon di mobilidat ta mas frekuente serka adulto ku tin hopi difikultat pa kubri nan gastunan a base di e entrada di famia (14%).
Gráfiko: porsentahe di adulto ku un limitashon di bista, oido òf mobilidat, pa grupo di edat na 2017
Fuente: Enkuesta Nashonal di Salú 2017
Na 2013, e porsentahe di adulto ku limitashon di funshonamentu (limitashon di bista, oido i/òf mobilidat) tabata 10%. Esei ta kasi meskos ku na 2017 (9%). Entre 1993 i 2017, e porsentahe di adulto ku limitashon di bista i oido a baha.
Tabèl: Tendensia den limitashon di funshonamentu serka adulto na Kòrsou, 1993-2017
|
|
1993 |
2013 |
2017 |
| Limitashon di bista
|
4,7% |
3,6% |
1,7% |
| Limitashon di oido
|
1,4% |
1,0% |
0,5% |
Fuente: Enkuesta Nashonal di Salú 2013 & 2017; CHS 1993/1994
Indikashon di funshonamentu físiko: VIC ta parti limitashon den aktividat den e siguiente tiponan: limitashon den aktividat ku tin di aber ku tende, mira, move, i aktividat di tur dia (na hulandes, ADL). Por tuma aktividat di tende, mira i move komo un solo tipo tambe (limitashon físiko) (volksgezondheid, 2017).
Limitashon den aktividat ku tin di aber ku tende: Hopi difikultat òf inkapasidat pa tende loke un otro hende ta bisa den un kòmbersashon ku un solo persona, òf den un grupo di 3 òf mas persona (si ta nesesario, ku un aparato di oido).
Limitashon den aktividat ku tin di aber ku mira: Hopi difikultat òf inkapasidat pa lesa lèter chikitu den korant; òf pa rekonosé un hende su kara na un distansia di 4 meter (si ta nesesario, ku brel òf lèns di kontakto bistí).
Limitashon pa move: Hopi difikultat òf inkapasidat pa karga un opheto di 5 kg, por ehèmpel un tas di kompra, i kana 10 meter kuné; bùk i piki algu for di suela; òf kana 400 meter sin para (ku un garoti si ta nesesario).
Problema di funshonamentu: Hopi difikultat ku un òf mas di e limitashonnan menshoná akiriba.
Limitashon físiko ta hunga un papel importante den kon bon un adulto por yuda su kurpa. Ora un adulto haña limitashon físiko, esei ta strob’é di hasi sierto kos riba su mes. Si ta trata di un limitashon grave, e persona lo tin mester di mas yudansa den su aktividatnan, i inkluso e por tin mester di kuido na kas.
CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú, i komportashon relashoná ku salú, di poblashon di Kòrsou.
ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.
Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.
Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.
Verstraeten S., Griffith – Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.
Volksgezondheidenzorg.info (2017). Konsultá via https://www.volksgezondheidenzorg.info/onderwerp/functioneringsproblemen/cijfers-context/huidige-situatie#definities RIVM: Bilthoven, 7 april 2018.