Kasi 13% di adulto ta huma (de bes en kuando)

Na 2017, 13% di hende di 18 aña òf mas tabata huma (de bes en kuando): 20% di hende hòmber i 9% di hende muhé. Den mayoria di kaso, a trata aki di sigaria òf shag. Ménos ku 1% di poblashon adulto ta kai den e kategoria di ‘humadó pisá’ (0,4%). Un humadó pisá ta un hende ku ta huma 21 òf mas sigaria i/òf shag pa dia.

Kasi 18% di adulto ta humadó pasivo

Na 2017, 18% di hende di 18 aña òf mas a bin den kontakto ku huma di tabako den kas, aunke nan mes no tabata huma (humamentu pasivo): 19% di hende hòmber i 17% di hende muhé. Humamentu pasivo ta mas frekuente serka adulto hóben di 18 te ku 24 aña. Gezondheidsraad ta deskonsehá hende di huma i ta atvertí tokante humamentu pasivo tambe. E konseho akí ta pa prevení COPD, enfermedat kardiovaskular i kanser (na pulmon) (Gezondheidsraad, 2015).

Gráfiko: porsentahe di adulto ku ta huma (tur dia òf nò, tur tipo di produkto pa huma), 2017

Fuente: Enkuesta Nashonal di Salú 2017

Mas hende hòmber ta huma, kompará ku hende muhé

Adulto den e grupo di edat di 25-44 aña ta esnan ku mas frekuentemente ta huma (17%). Den kasi tur e gruponan di edat, e porsentahe di hende hòmber ku ta huma ta mas grandi ku e porsentahe di hende muhé. Hende hòmber i muhé di 25 te ku 44 aña ta esnan ku mas ta huma.

Gráfiko: porsentahe di adulto ku ta huma, pa kada sekso i grupo di edat, na 2017

Fuente: Enkuesta Nashonal di Salú 2017

Ta prinsipalmente hóben adulto ta humadó pasivo

Humamentu pasivo ta un poko mas frekuente serka hende hòmber ku serka hende muhé (19% vs. 17%). Humamentu pasivo ta mas frekuente serka e grupo di 18 te ku 24 aña.

Gráfiko: porsentahe di adulto ku ta humadó pasivo, pa kada sekso i grupo di edat, na 2017

Fuente: Enkuesta Nashonal di Salú 2017

Ménos humadó pasivo serka esnan ku tin un nivel di enseñansa haltu

Humamentu ta mas frekuente serka hende ku tin nivel di enseñansa MAVO/LBO i ménos frekuente serka hende ku tin nivel di enseñansa HAVO/VWO i MBO. Humamentu pasivo (e persona mes no ta huma, pero e ta bin den kontakto ku huma di tabako den kas) ta mas frekuente serka hende ku tin nivel di enseñansa abou i ménos frekuente serka hende ku tin nivel di enseñansa haltu. Den e resultadonan akí, no a tene kuenta ku diferensia di edat i sekso den e nivelnan di enseñansa.

Gráfiko: porsentahe di adulto ku ta humadó i humadó pisá, pa kada nivel di enseñansa, na 2017

Fuente: Enkuesta Nashonal di Salú 2017

Mas tantu humadó i humadó pasivo den e grupo ku tin difikultat pa kubri nan gastunan 

Humamentu ta mas frekuente serka e grupo ku tin hopi difikultat pa kubri nan gastunan ku nan entrada di famia. Humamentu pasivo ta mas frekuente serka e grupo ku tin un poko difikultat pa kubri nan gastunan.

Humamentu serka adulto ta bahando

E kantidat di adulto di 18 aña òf mas ku a huma den e último 12 lunanan promé ku a entrevistá nan a baha entre 1993 i 2017, di 17 pa 14%. Den tur e añanan di enkuesta, e porsentahe di hende hòmber ku ta huma tabata mas haltu ku e porsentahe di hende muhé (2017: 20% vs. 9%, 2013: 21% vs. 12%, 2011: 28% vs. 11%, 2011: 21% vs. 8% i 1993: 28% vs. 9%. (ENS 2013, 2017, Alberts et al., 1996).

Gráfiko: tendensia di humamentu serka adulto 1993 - 2017

Fuente: Enkuesta Nashonal di Salú 2017 i 2013; Curaçao Health Study 1993/1994

Kasi mes tantu mucha hòmber ku mucha muhé ta humadó (pasivo)

Nuebe porshento (9%) di mucha di skol di 12 te ku 17 aña a huma sigaria den e luna promé ku e enkuesta. No tin masha diferensia den e porsentahe di mucha hòmber i mucha muhé ku a huma den e luna promé (8% i 10%). Mas ku mitar di mucha di skol (58%) tabata den kontakto ku huma di tabako den kas e siman promé ku e enkuesta, aunke nan mes no ta huma (humamentu pasivo); mas o ménos mes tantu mucha hòmber (58%) ku mucha muhé (59%).

Gráfiko: humamentu i humamentu pasivo serka mucha di skol na 2015

Fuente: Global School-based Student Health Survey Curaçao 2015

Humamentu (pasivo) ta oumentá ku edat

Nuebe porshento (9%) di mucha di skol di 12 te ku 17 aña a huma sigaria e luna promé ku e entrevista. Manera ta di spera, humamentu ta oumentá ku edat. Humamentu pasivo (e persona mes no ta huma, pero e ta bin den kontakto ku huma di tabako den kas) tambe ta oumentá ku edat.

Gráfiko: humamentu i humamentu pasivo serka mucha di skol pa kada grupo di edat, na 2015

Fuente: Global School-based Student Health Survey Curaçao 2015

Mucha di skol AGO ta huma ku mas frekuensia

Un di kada sinku (22%) mucha di skol AGO a huma sigaria den e luna promé ku e entrevista, kompará ku 1 di kada 20 (6%) mucha di skol HAVO/VWO. Na e skolnan VSBO i SBO, esei ta e kaso serka 1 di kada 11 (9%). Mas mucha ku ta siguiendo un estudio SBO tabata humadó pasivo e siman promé, kompará ku e muchanan di HAVO/VWO (68% i 52% respektivamente). E mayornan di e muchanan di skol AGO ta huma ku ménos frekuensia (16%), kompará ku mayor di mucha na SBO (20%), HAVO/VWO (21%) i VSBO (22%).

Gráfiko: humamentu serka mucha di skol, pa kada nivel di enseñansa, na 2015

Fuente: Global School-based Student Health Survey Curaçao 2015