search
close
Di 2005 pa 2007, 18 persona a muri komo konsekuensia di suisidio (3,8 pa kada 100.000 persona). Esei ta un promedio di 4,5 persona pa aña. Morto komo konsekuensia di suisidio ta mas frekuente serka hende hòmber (5,5 pa kada 100.000 hende hòmber) ku serka hende muhé (2,5 pa kada 100.000 hende muhé).
Ta eksistí e posibilidat ku no ta tur kaso di suisidio ta keda raportá, ya ku algun víktima ta keda registrá den e datonan statístiko komo hende ku a muri un morto natural.
Den e periodo di 1980–2007, e sifra di mortalidat komo konsekuensia di suisidio a keda práktikamente igual: di 3,8 pa kada 100.000 persona den e periodo di 1980-1984 pa 6,8 den e periodo di 2000-2004, siguí pa un redukshon atrobe te na 3,8 pa kada 100.000 persona den e periodo di 2005-2007.
Gráfiko: morto komo konsekuensia di suisidio na Kòrsou i Antia Hulandes, standarisá pa edat, 1980–2007
Fuente: PAHO mortality database, ICD10-code X60-84
Den e 12 lunanan promé ku e entrevista, diesun porshento (11%) di mucha di skol a yega di pensa seriamente di suisidá. Mucha muhé ta bisa mas frekuentemente ku nan a yega di pensa riba suisidio, na komparashon ku mucha hòmber (16% vs. 7%). Serka mucha di skol di 13 aña p’ariba, pensamentu serio tokante suisidio ta sosodé ku mas frekuensia na komparashon ku mucha di skol di edat mas yòn. Pa loke ta trata pensamentu di suisidio den e 12 lunanan promé ku e entrevista, no tin diferensia signifikativo entre e diferente nivelnan di enseñansa.
Gráfiko: porsentahe di mucha di skol ku a pensa seriamente riba suisidio den e 12 lunanan promé ku e entrevista, pa kada grupo di edat, sekso i nivel di enseñansa, 2015
Fuente: Global School-based Student Health Survey Curaçao 2015
Unu di kada seis mucha muhé di 13 pa 17 aña a yega di pensa seriamente riba suisidio den e 12 lunanan promé ku e entrevista. Esei ta dos biaha mas tantu ku mucha muhé di 12 aña òf ménos i kuater biaha mas tantu ku mucha muhé di 18 aña p’ariba. Serka mucha hòmber, apénas tin diferensia entre e diferente gruponan di edat.
Un posibel motibu ku mucha muhé (mas grandi) tin mas pensamentu suisida kompará ku mucha hòmber ta ku mucha muhé sa tin mas problema ku miedu komo konsekuensia di abusu seksual. Esei ta pone ku nan ta mas vulnerabel pa pensamentu suisida i intento di suisidio na komparashon ku mucha hòmber (Wunderlich et al., 2001).
Gráfiko: porsentahe di mucha di skol ku a pensa seriamente riba suisidio den e 12 lunanan promé ku e entrevista, pa kada sekso i grupo di edat, 2015
Fuente: Global School-based Student Health Survey Curaçao 2015
Mitar di e muchanan di skol (51%) ku pensamentu serio di suisidio a yega di hasi un òf mas intento di suisidio. Mas mucha muhé a yega di hasi un intento asina na komparashon ku mucha hòmber (55% vs. 39%).
Tabèl: kantidat di intento di suisidio serka mucha di skol ku a yega di pensa seriamente riba suisidio den e 12 lunanan promé ku e entrevista, 2015
|
|
Total
|
Mucha hòmber
|
Mucha muhé
|
| 0 biaha
|
49% |
61% |
45% |
| 1 biaha
|
22% |
18% |
25% |
| 2 biaha òf mas
|
28% |
21% |
31% |
Fuente: Global School-based Student Health Survey Curaçao 2015
Suisidio (zelf toegebracht letsel): Generalmente ta usa e ekspreshon hulandes ‘zelf toegebracht letsel’ kolektivamente pa tur tipo di leshon ku ta resultado di komportashon suisida (suisidio). Esei ta inkluí:
Hopi bes, suisidio ta konsekuensia di un trastorno mental
Den mayoria di kaso, komportashon ku ta hiba na suisidio no ta algu aislá. Hopi bes e tin di aber ku un trastorno mental (manera depreshon òf un trastorno di personalidat di e tipo ‘borderline’). (Volksgezondheidenzorg.info, 2020)
GSHS Curaçao 2015: Global School-based Student Health Survey (GSHS) ta un enkuesta di salú bou di mucha di skol di 12 te ku 17 aña. E ta forma parti di e investigashon GSHS internashonal, di Organisashon Internashonal di Salú (WHO). Meta di GSHS ta di haña un bista aktualisá di komportashon di mucha di skol na Kòrsou ku por afektá nan salú, i tambe tokante nan bienestar. Na Kòrsou, a tene e enkuesta pa di promé bes na 2015.
Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).
PAHO (2020). Sterftecijfers. Dataset verkrijgbaar via PAHO mortality database: https://hiss.paho.org/pahosys/grp.php.
Verstraeten S. (2016). The Curaçao Global School-based Student Health Survey (GSHS) Study 2015. Volksgezondheid Instituut Curaçao, Willemstad.
Volksgezondheidenzorg.info (2020). Geraadpleegd via https://www.volksgezondheidenzorg.info/onderwerp/letsels/cijfers-context/seh-bezoeken#definitie--node-zelftoegebracht-letsel
RIVM: Bilthoven, 2 december 2020.
Wunderlich, U., Bronisch, T., Wittchen, H.U., Carter, R. (2001). Gender differences in adolescents and young adults with suicidal behaviour. Acta Psychiatric Scand, 104, 332 – 339.
WHO. Fact sheets for the global school-based student health survey. Geraadpleegd via https://www.who.int/ncds/surveillance/gshs/factsheets/en/. Curaçao, 10 januari 2020.