Atake di kurason

Atake di kurason ta mas frekuente serka adulto ku státus sosioekonómiko abou 

Na 2017, 0,9% di adulto na Kòrsou a bisa ku nan a haña un atake di kurason òf tin konsekuensia króniko di un atake di kurason. Na Kòrsou, e gruponan ku a raportá atake di kurason ku mas frekuensia ta e habitantenan ku un nivel di enseñansa mas abou i esnan ku tin hopi difikultat pa kubri nan gastunan ku e entrada di famia.

Tabèl: porsentahe di adulto ku atake di kurason pa kada nivel di enseñansa i kapasidat pa kubri gastu, na 2017


 Porsentahe (%)
Nivel di enseñansa

   Abou (Ningun, LO)
1,4%
   Sekundario 1 (MAVO, LBO)
1,0%
   Sekundario 2 (HAVO, VWO, MBO)
0,4%
   Haltu (HBO, WO)
0,4%
Entrada di famia

 Niun difikultat pa kubri gastu
0,8%
 Niun difikultat, pero tin ku vigilá gastu sí
0,4%
 Un tiki difikultat pa kubri gastu
1,3%
  Hopi difikultat pa kubri gastu
1,5%

 Fuente: Enkuesta Nashonal di Salú 2017

Mas ku 1.000 hende ta haña atake di kurason

Na 2017, segun kálkulo, tabatin 1.041 adulto ku a bisa ku nan a haña un atake di kurason òf tin konsekuensia króniko di un atake di kurason: 448 hende hòmber i 593 hende muhé. Na tur, esei ta 0,9% di poblashon adulto. E kálkulo akí ta basá riba resultado di Enkuesta Nashonal di Salú. Hende ku tabata kedando den un institushon di kuido no ta kontá den e kálkulo akí. E porsentahe di hende muhé (0,9%) i hende hòmber (0,8%) ku a bisa ku nan a haña un atake di kurason ta práktikamente igual i ta subi ku edat. E grupo ku e porsentahe di mas haltu ta di 65+ (2%).

Tabèl: porsentahe di adulto ku atake di kurason pa kada sekso i grupo di edat na 2017


 Porsentahe (%)
Total
0,9%
Sekso

   Hòmber
0,8%
   Muhé
0,9%
Edat

   18-24 aña
0,0%
   25-44 aña
0,4%
   45-64 aña
0,6%
   65 aña òf mas
2,4%

Fuente: Enkuesta Nashonal di Salú 2017

E porsentahe di adulto ku atake di kurason a subi un poko entre 2011 i 2017

E porsentahe di adulto ku ta bisa ku nan a haña un atake di kurason òf ta sufri di konsekuensia króniko di atake di kurason a subi di 0,7% na 2011 (CBS 2011) pa 0,9% na 2013 i 2017 (ENS 2013 i ENS 2017). Sinembargo, mester tene kuenta ku e kantidat di partisipante na e enkuesta ku a indiká esaki ta relativamente chikitu, i edat di poblashon di Kòrsou a subi konsiderablemente den e periodo en kuestion. 

Komo promedio, 100 persona a muri pa aña komo konsekuensia di atake di kurason 

Den e periodo di 2005 te ku 2007, 299 persona a muri komo konsekuensia di atake di kurason. Esaki ta representá 73,2 persona pa kada 100.000. Morto komo konsekuensia di atake di kurason ta oumentá konsiderablemente ku edat i ta un di e kousanan prinsipal di morto riba 60 aña di edat.

Gráfiko: morto komo konsekuensia di atake di kurason pa kada 100.000 persona, 2005 - 2007

Fuente: Statistik di Kousa di Morto, ICD10-code I21-I22



Data disponibel

Hustifikashon

Definishon

Atake di kurason òf enfermedat iskémiko di kurason, ta enfermedat di kurason ku ta presentá debí ku arteria ta bira smal (aterosklerósis) òf debí na defekto den arteria koronario. Ora un arteria bira smal òf ferstòp, esei ta okashoná un falta di oksígeno (iskemia) den e múskulo di kurason (Volksgezondheidenzorg.info, 2017).

Método

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Senso: Un senso ta duna un bista di e sirkunstansianan di bida di poblashon na un momento spesífiko. Bo por kompará e resultadonan ku resultado di otro konteo anterior pa haña un bista kon sierto asuntu a desaroyá den pasado, i pa asina por antisipá desaroyo den futuro. A yega di tene sinku senso na Kòrsou: na 1972, 1992, 2001 i 2011. 

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

Fuente

Centraal Bureau voor de Statistiek (2011). Gezondheid en beperkingen in Curaçao. Willemstad, Centraal Bureau voor de Statistiek.

PAHO (2018). Sterftecijfers Curaçao 2001-2007. Dataset verkrijgbaar via PAHO mortality database: https://hiss.paho.org/pahosys/grp.php

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith-Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg.info (2017). Geraadpleegd via   https://www.volksgezondheidenzorg.info/onderwerp/coronaire-hartziekten/cijfers-context/huidige-situatie#definities   RIVM: Bilthoven, 19 oktober 2019.