Tur aña, tin mas di 600 kaso nobo di kánser serka hende hòmber i hende muhé na Kòrsou

Di 2009 pa 2011, a diagnostiká 1.824 kaso nobo di kánser (un promedio di 608 pa aña): 1.042 serka hende hòmber i 782 serka hende muhé. Hende hòmber ta kore mas riesgo di haña kánser, kompará ku hende muhé. Den e periodo akí, e insidensia (kantidat di kaso nobo) di kánser tabata 349 pa kada 100.000 hende hòmber i 207 pa kada 100.000 hende muhé.

Mayoria di kaso nobo di kánser ta serka hende di edat

Tantu pa hende hòmber komo hende muhé, e riesgo di haña kánser ta oumentá drástikamente ku edat. Despues ku un hende kumpli 70 aña, su chèns di ser diagnostiká ku kánser no ta sigui subi mas.

Den e grupo di edat di 20 te ku 50 aña, kánser ta mas frekuente serka hende muhé

Den e grupo di edat di 20 te ku 50 aña, kánser ta mas frekuente serka hende muhé debí ku kánser na pechu i kánser na e órganonan seksual di hende muhé (kánser na boka di matris i kánser na matris) ta relativamente frekuente serka e grupo di edat akí. Di 50 aña p'ariba, kánser ta hopi mas frekuente serka hende hòmber ku serka hende muhé. Esei ta prinsipalmente debí ku kánser na prostat i kánser na pulmon ta mas frekuente serka hende hòmber di 50 aña p'ariba.

Gráfiko: insidensia anual di kánser pa kada 100.000 persona, pa kada sekso i grupo di edat, 2009–2011

Fuente: IARC Cancer Incidence Database; Registro di Kánser di Analytisch Diagnostisch Centrum N.V., ICD10-code C00-D96bC44, DX, X

Diferente faktor di riesgo pa kánser

Tin diferente faktor ku ta yuda determiná kuantu riesgo un hende tin di haña kánser i kon grave e kánser tin chèns di bira. Faktor genétiko (hereditario) ta hunga un papel serka hopi tipo di kánser. Algun faktor relashoná ku estilo di bida, spesífikamente humamentu, nutrishon insaludabel, uso di alkohòl i falta di moveshon ta influensiá (un mas ku otro) e riesgo ku un hende tin di haña kánser i/òf kon grave e kánser tin chèns di bira. Sobrepeso tambe ta un faktor asina. Kontakto ku asbèst por hiba na kánser na membrana (flishi) di pulmon i na membrana apdominal. Ademas, den kombinashon ku humamentu, e por hiba na kánser na pulmon. Sierto infekshon di bakteria i di vírùs tambe por hiba na kánser. Un ehèmpel konosí ta infekshon di e vírùs di papiloma humano (HPV), loke por hiba na kánser na boka di matris. Por último, tantu radiashon ionisante (por ehèmpel, di e elemento radon) komo radiashon UV (di solo) por hiba na kánser. Un tipo di kánser bon konosí ku por presentá komo konsekuensia di kontakto ku rayo di solo ta kánser na kueru (Volksgezondheidinfo, 2020).

Tabèl: faktor di riesgo pa kánser (Volksgezondheidinfo, 2020)

E tipo di kánser diagnostiká ku mas frekuensia ta varia pa kada grupo di edat

Kánser ta un grupo di enfermedat. Kada tipo ta mas prevalente (frekuente) serka un otro grupo di edat. P'esei, pa kada grupo di edat, e situashon ta diferente.

Kánser na prostat ta e tipo di kánser mas diagnostiká 

Ora bo tuma e sinku tiponan di kánser mas frekuente huntu, nan ta forma 67% di tur kaso nobo di kánser na Kòrsou. Nan ta:

1. Kánser na prostat (163 pa kada 100.000 hende hòmber)
2. Kánser na pechu (81 pa kada 100.000 hende muhé)
3. Kánser na tripa (45 pa kada 100.000 hende hòmber i 26 pa kada 100.000 hende muhé)
4. Kánser na pulmon (24 pa kada 100.000 hende hòmber i 6 pa kada 100.000 hende muhé)
5. Linfoma/kánser linfátiko (Hodgkin i Non-Hodgkin) (14 pa kada 100.000 hende hòmber i 11 pa kada 100.000 hende muhé)

Gráfiko: kantidat di kaso nobo di kánser, pa kada tipo (2009–2011)

Fuente: IARC Cancer Incidence Database; Registro di Kánser di Analytisch Diagnostisch Centrum N.V., ICD10-code C00-D96bC44, DX, X

Mayoria di e tiponan di kánser ta mas frekuente serka hende hòmber ku serka hende muhé

Si laga afó tur e tiponan di kánser ku ta dependé di e persona su sekso, manera kánser na pechu i kánser na prostat, bo ta bin ripará ku kasi tur tipo di kánser ta mas frekuente serka hende hòmber ku serka hende muhé.

Gráfiko: kantidat di kaso anual nobo di kánser pa kada 100.000 persona, pa kada sekso, 2009–2011

Fuente: IARC Cancer Incidence Database; Registro di Kánser di Analytisch Diagnostisch Centrum N.V., ICD10-code C- ALL

Despues di enfermedat kardiobaskular, (si tuma tur e diferente tiponan di kánser huntu) kánser ta e kousa prinsipal di morto na Kòrsou 

Den e periodo di 2005 pa 2007, 853 persona a muri di kánser; esei ta un promedio di 284 kaso pa aña (PAHO Mortality Database, ICD10-code C00-D48). Despues di enfermedat kardiobaskular, (si tuma tur e diferente tiponan di kánser huntu) kánser ta e kousa prinsipal di morto na Kòrsou.

E sifra di morto komo konsekuensia di kánser pa kada 100.000 persona ta oumentá drástikamente ku edat, tantu pa hende hòmber komo hende muhé, ku eksepshon di hende hòmber i muhé den e grupo di 80-84 aña i hende muhé den e grupo di 60-64 aña.

Den tur grupo di edat bou di 45 aña, morto komo konsekuensia di kánser ta mas frekuente serka hende muhé ku serka hende hòmber. (Esei ta ku eksepshon di e gruponan di 1-4 aña i di 15-19 aña. Den e dos gruponan akí, e ta mas frekuente serka mucha hòmber i hende hòmber). For di 45 aña p'ariba, e sifra di morto komo konsekuensia di kánser pa kada 100.000 persona ta mas haltu serka hende hòmber ku serka hende muhé, ku eksepshon di e grupo di 50-54 aña. Den e grupo akí, e ta mas frekuente serka hende hòmber.

Gráfiko: morto komo konsekuensia di kánser pa kada 100.000 persona, 2005-2007

Fuente: PAHO i WHO Mortality Database, ICD10-code C00-D48

Morto komo konsekuensia di kánser: Tendensia 1980–2007

Den e periodo di 1980-2004, e kantidat di persona ku a muri di kánser a subi: di 179,0 pa kada 100.00 persona den e periodo di 1980-1984 te na 150,9 pa kada 100.000 persona den e periodo di 2000-2004.  

Gráfiko: morto komo konsekuensia di kánser, 1980-2007

Fuente: PAHO i WHO Mortality Database, ICD10-code C00-D48