Leshon

Kasi 13.000 adulto a sufri un aksidente na 2017

Ta kalkulá ku na 2017, 12.799 adulto (11%) a sufri un aksidente den tráfiko, na kas, den nan tempu liber òf na trabou den e 12 lunanan promé ku e entrevista. E diferensia entre hende hòmber i hende muhé ta chikitu. Aksidente ta mas frekuente serka e gruponan di edat mas yòn. Den Enkuesta Nashonal di Salú di 2013, e pregunta akí tabata formulá otro manera i esei ta pone ku no por kompará e sifranan di e aña ei ku 2017.

Aksidente ta un kousa importante di problema króniko di salú i morto trempan. Aksidente por okashoná leshon físiko i desabilidat, pero tambe trouma sikológiko (Peden et al., 2002).

Gráfiko: porsentahe di adulto ku a sufri un aksidente den tráfiko, na trabou, na kas i/òf den nan tempu liber den e 12 lunanan promé ku e entrevista, pa kada sekso i grupo di edat, 2017

Fuente: Enkuesta Nashonal di Salú 2017

Adulto ku tin hopi difikultat pa kubri nan gastunan ta sufri aksidente ku mas frekuensia

Aksidente ta mas frekuente serka adulto ku a risibí enseñansa na nivel di HAVO, VWO i SBO i esnan ku tin hopi difikultat pa kubri nan gastunan.

Gráfiko: porsentahe di adulto ku a sufri un aksidente den tráfiko, na trabou, na kas i/òf den nan tempu liber den e 12 lunanan promé ku e entrevista, pa kada státus sosioekonómiko, 2017

Fuente: Enkuesta Nashonal di Salú 2017

Aksidente di tráfiko ta e tipo mas frekuente

Di e kuater tiponan di aksidente menshoná den e pregunta, aksidente di tráfiko ta esun mas frekuente (5% di adulto), siguí pa aksidente na kas (3%).

Tabèl: porsentahe di adulto ku a sufri un aksidente den e 12 lunanan promé ku e entrevista, pa kada tipo di aksidente, 2017 (e partisipantenan por a menshoná mas ku 1 tipo di aksidente)


Aksidente (%)

Total di aksidente

11%

  Aksidente di tráfiko

5%

  Aksidente na kas

3%

  Aksidente den tempu liber

2%

  Aksidente na trabou

2%

Fuente: Enkuesta Nashonal di Salú 2017

Kasi 5.500 hende na Kòrsou tabatin mester di kuido médiko komo resultado di un aksidente

Den e 12 lunanan promé ku e entrevista, sinku porshento (5%) di hende na Kòrsou tabatin mester di kuido médiko komo resultado di un aksidente. Esei ta aproksimadamente 5.452 persona. Di nan, 1% mester a bai hospital òf un otro instituto di kuido médiko debí na e aksidente. Esei ta aproksimadamente 1.157 persona.

Un di kada tres mucha di skol a bisa ku nan a yega sufri leshon grave na un òf mas okashon

Na tur, 33% di mucha di skol a bisa ku nan a yega sufri leshon grave na un òf mas okashon den e 12 lunanan promé ku e entrevista. Den tur grupo di edat, mucha hòmber ta sufri leshon grave mas frekuentemente kompará ku mucha muhé.

Gráfiko: Porsentahe di mucha di skol ku a sufri leshon grave na un òf mas okashon den e 12 lunanan promé ku e entrevista, pa kada sekso i grupo di edat (GSHS, 2015)

Fuente: Global School-Based Student Health Survey Curaçao 2015

Mucha di skol AGO a bisa ku mas frekuensia ku nan a sufri leshon grave na un òf mas okashon den e 12 lunanan promé ku e entrevista, kompará ku mucha di otro nivel eskolar (44% di mucha di skol AGO, 33% di mucha di skol VSBO, 30% di mucha di skol HAVO/VWO i 26% di mucha di skol SBO).

E leshon ku e muchanan di skol a raportá mas tantu ta wesu kibrá òf ku a sali di lugá

E leshon mas frekuente serka e muchanan di skol ku a sufri leshon grave den e 12 lunanan promé ku e entrevista tabata wesu kibrá òf ku a sali di lugá. Esei ta tantu serka mucha hòmber komo mucha muhé (20% di mucha hòmber i 11% di mucha muhé ku a yega sufri leshon grave na un òf mas okashon). Tantu serka mucha hòmber komo serka mucha muhé, e di dos tipo di leshon mas frekuente ta kòrtá na kurpa (20% di e mucha hòmbernan i 9% di e mucha muhénan ku a yega sufri leshon grave na un òf mas okashon). Mayoria di mucha di skol (51% di mucha hòmber i 67% di mucha muhé) a raportá ku ta otro kos a sosodé. Esei por indiká ku e leshon en kuestion tabata ménos grave ku e leshonnan menshoná aki.

Gráfiko: porsentahe di e leshonnan raportá ku mas frekuensia pa mucha di skol ku a sufri leshon grave den e último 12 lunanan (GSHS, 2015)

Fuente: Global School-Based Student Health Survey Curaçao 2015

Kaida ta e kousa di leshon ku mucha di skol ta menshoná ku mas frekuensia

Kaida ta e kousa di leshon menshoná ku mas frekuensia serka mucha hòmber i mucha muhé ku a sufri leshon grave (28% di mucha hòmber; 19% di mucha muhé). Aksidente ku vehíkulo di motor ta un di e kousanan di morto prinsipal serka mucha di skol: 9% di mucha muhé i 6% di mucha hòmber ku a sufri leshon grave a menshoná e tipo di aksidente akí komo e kousa prinsipal di leshon. Mayoria di mucha di skol (49% di mucha hòmber i 61% di mucha muhé) a raportá ku ta otro kos a sosodé. Esei ta duna di komprondé ku loke a pasa no ta kai bou di un di e kousanan spesífiko menshoná aki.

Gráfiko: kousa di leshon grave raportá serka mucha di skol ku a sufri leshon grave den e último 12 lunanan

Fuente: Global School-Based Student Health Survey Curaçao 2015


Bou di 75 aña di edat, morto komo konsekuensia di leshon ta mas frekuente serka hende hòmber ku serka hende muhé

 Den e periodo di 2005 pa 2007, 203 persona a muri komo konsekuensia di leshon; esei ta un promedio di 68 kaso pa aña (PAHO Mortality Database, ICD10-code V01-Y89). Morto komo konsekuensia di leshon ta mas frekuente serka hende hòmber di 15 pa 29 aña i hende muhé den e kategoria di edat di 50-54 aña.

Den tur grupo di edat bou di 75 aña, morto komo konsekuensia di leshon ta mas frekuente serka hende hòmber ku serka hende muhé. (Esei ta ku eksepshon di e grupo di edat di 1-4 aña. Den e grupo akí, e ta mes frekuente serka mucha hòmber ku serka mucha muhé.) For di 75 aña p’ariba, morto komo konsekuensia di leshon pa kada 100.000 persona ta mas frekuente serka hende muhé ku serka hende hòmber.

Gráfiko: morto komo konsekuensia di leshon pa kada 100.000 persona, standarisá pa edat, periodo 2005-2007

Fuente: Statistik di Kousa di Morto di PAHO, ICD10-code V01-Y89

Violensia entre hende hòmber ta e tipo mas frekuente di aksidente ku ta hiba na morto

Den e periodo 2005–2007, entre aksidente di tráfiko, hogamentu i violensia, e kousa prinsipal di morto serka hende hòmber, tumá pa kada 100.000 persona, tabata violensia (36,5 pa kada 100.000 persona), siguí pa aksidente di tráfiko (23,8 pa kada 100.000 persona) i hogamentu (6.4 pa kada 100.000 persona).

Serka hende muhé, di e tres tiponan di aksidente menshoná, esun mas frekuente ta aksidente di tráfiko (6,9 pa kada 100.000 persona), siguí pa violensia (4,1 pa kada 100.000 persona). Den e periodo di 2005–2007, no a registrá niun hende muhé ku a muri komo konsekuensia di hogamentu.

Gráfiko: morto komo konsekuensia di aksidente di tráfiko, hogamentu i violensia pa kada 100.000 persona, standarisá pa edat, periodo 2005-2007

Fuente: Statistik di Kousa di Morto di PAHO

ICD10-code aksidente di tráfiko (V01–V99)

ICD10-code hogamentu (W65-W74)

ICD10-code violensia (X85-Y09)

Sifra di mortalidat komo konsekuensia di leshon a subi di 31 pa 54, pa kada 100.000 persona, entre e periodonan di 1980-1984 i 2005-2007

Di 1980 pa 2007, e sifra di mortalidat komo konsekuensia di leshon a subi di 31,3 pa kada 100.000 persona den e periodo di 1980-1984 te na 53,9 pa kada 100.000 persona den e periodo di 2005-2007. E tendensia di morto komo konsekuensia di leshon na Antia Hulandes i na Kòrsou den e periodo di 2000-2004 no ta kuadra ku otro. Esei por indiká ku na Kòrsou, morto komo konsekuensia di leshon tabata hopi mas haltu ku na e otro islanan di èks Antia Hulandes.

Gráfiko: morto komo konsekuensia di leshon pa kada 100.000 persona, standarisá pa edat, 1980-2007

Fuente: Statistik di Kousa di Morto di PAHO, ICD10-code V01-Y89

Data disponibel


Hustifikashon

Bou di leshon ta komprondé leshon komo konsekuensia di aksidente òf violensia i leshon ku un persona mes a kousa na su kurpa. Huntu, nan ta forma un problema di salú sumamente variá ku ta hiba na diferente tipo di daño na salú, (manera daño serebral, fraktura i venenamentu) ku un gran variedat di kousa diferente (manera aksidente di tráfiko, aksidente den ambiente privá i aksidente na trabou) (Volksgezondheidenzorg, 2020)

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

GSHS Curaçao 2015: Global School-based Student Health Survey (GSHS) ta un enkuesta di salú bou di mucha di skol di 12 te ku 17 aña. E ta forma parti di e investigashon GSHS internashonal, di Organisashon Internashonal di Salú (WHO). Meta di GSHS ta di haña un bista aktualisá di komportashon di mucha di skol na Kòrsou ku por afektá nan salú, i tambe tokante nan bienestar. Na Kòrsou, a tene e enkuesta pa di promé bes na 2015.

Statistik di kousa di morto: E datonan di kousa di morto na Kòrsou ta basá riba deklarashon di kousa di morto ku dòkter, médiko forense òf spesialista ta saka. Ta kodifiká e kousanan di morto a base di un lista di kódigo ku ta ser usá internashonalmente, e asina yamá International Statistical Classification of Diseases and Related Health Problems (ICD) di Organisashon Internashonal di Salú (WHO). For di 1996, a bin ta traha ku e di 10 revishon di ICD (ICD-10, WHO).

PAHO (2020). Sterftecijfers Curaçao 2001-2007. Dataset verkrijgbaar via PAHO mortality database:  https://hiss.paho.org/pahosys/grp.php.

Peden M, McGee K, Krug E. (2002). Injury: a leading cause of the global burden of disease, 2000. Geneva: World Health Organization.

Verstraeten S. (2016). The Curaçao Global School-based Student Health survey (GSHS) Study 2015. Volksgezondheid Instituut Curaçao, Willemstad.

Verstraeten S., Griffith-Lendering, M.F.H, & Pin R.R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

Volksgezondheidenzorg(2020). Geraadpleegd via https://www.volksgezondheidenzorg.info/onderwerp/letsels/cijfers-context/seh-bezoeken#definities RIVM: Bilthoven, 25 januari 2020.