Sobrepeso

Dos di kada tres adulto na Kòrsou tin peso di mas

Na 2017, dos di kada tres (65%) hende na Kòrsou di 18 aña p’ariba tabatin sobrepeso. Esei ke men ku ta un minoria di poblashon so tin un peso normal (un BMI di 18.5 pa 25 kg/m2). Sobrepeso ta mas frekuente serka hende muhé ku serka hende hòmber. Ademas, mas tantu hende muhé tin obesidat (sobrepeso grave), kompará ku hende hòmber. Na tur, 29% di hende na Kòrsou di 18 aña p’ariba tin obesidat. Sobrepeso i obesidat ta mas frekuente serka hende di 25 te ku 65 aña. E sifranan akí ta basá riba e peso i haltura ku e partisipantenan na e enkuesta mes a duna.

Gráfiko: Porsentahe di adulto ku sobrepeso i obesidat pa kada sekso i grupo di edat na 2017

Fuente: Enkuesta Nashonal di Salú 2017

Mas tantu sobrepeso i obesidat serka esnan ku nivel mas haltu di enseñansa

Sobrepeso ta mas frekuente serka hende ku tin e nivel di enseñansa mas haltu, i ménos serka esnan ku e nivel di enseñansa mas abou. E diferensia entre e dos gruponan akí ta di 6 punto porsentual; esnan ku e nivel di mas haltu ta 68% i esnan ku e nivel mas abou, 62%. Obesidat ta mas frekuente serka hende ku nivel di enseñansa MAVO/LBO i esnan ku tin un tiki difikultat pa kubri nan gastunan. Den e resultadonan akí, no a tene kuenta ku diferensia di edat i sekso den e gruponan di nivel di enseñansa.

Gráfiko: Porsentahe di adulto ku sobrepeso òf obesidat pa kada nivel di enseñansa i kapasidat pa kubri gastu na 2017

Fuente: Enkuesta Nashonal di Salú 2017

Porsentahe di obesidat ta keda haltu atraves di aña

Na 1993, un di kada kuater adulto na Kòrsou (27%) tabatin obesidat, a base di loke e mes a bisa. Entretantu, e porsentahe di hende ku obesidat na Kòrsou a oumentá te 32% na 2013. Na 2017, e porsentahe di hende na Kòrsou ku, a base di loke nan mes a bisa, tabatin obesidat, tabata 29%.

Gráfiko: Tendensia di obesidat (BMI >=30 kg/m2) adulto na Kòrsou, 1993-2017

Fuente: Enkuesta Nashonal di Salú 2013 & 2017; Senso 2011; Curaçao Health Study 1993/1994

Mucha muhé ta bisa ku nan tin sobrepeso mas frekuentemente kompará ku mucha hòmber

Mas ku mitar di mucha di skol ta bisa ku nan peso ta ‘bon’ (56,5%). Sinembargo, kompará ku mucha hòmber, mas tantu mucha muhé ta deskribí e imágen ku nan tin di nan propio kurpa bisando ku nan tin ‘un tiki òf hopi sobrepeso’.

Tabèl: porsentahe di mucha di skol pa kada deskripshon di e imágen di nan mes kurpa na 2015


Total
Mucha hòmber
Mucha muhé
Un tiki òf hopi bou di peso
14,9%
16,4%
13,3%
Un bon peso
56,5%
59,7%
53,7%
Un tiki òf hopi sobrepeso
28,6%
23,0%
33,0%

Fuente: Global School-based Student Health Survey Curaçao, 2015

Mas nan edat subi, mas e mucha hòmbernan ta bisa ku nan peso ta ‘bon’: 51,2% di mucha hòmber di 12 aña òf ménos, 59,8% di e muchanan di 13 pa 17 aña i 61,9% di esnan di 18 aña òf mas. Sinembargo, serka mucha muhé, e porsentahe akí ta baha segun ku nan edat subi: 55,4% di mucha muhé di 12 aña òf ménos, 54,3% di e muchanan di 13 pa 17 aña i 51,1% di mucha muhé di 18 aña òf mas a bisa ku nan peso ta ‘bon’. Ora kompará e diferente nivelnan di skol, no tin diferensia den e porsentahenan di mucha di skol ku a deskribí nan peso komo ‘ku un tiki òf hopi sobrepeso’.

Gráfiko: Porsentahe di mucha di skol ku ta deskribí nan peso komo ‘un bon peso’, pa kada sekso i grupo di edat, na 2015

Fuente: Global School-based Student Health Survey Curaçao, 2015

Mucha muhé ta purba baha peso ku mas frekuensia kompará ku mucha hòmber (42% vs. 30%) 

Un terser parti di mucha di skol ta purba baha peso (36%). Mucha muhé ta bisa ku mas frekuensia ku nan ta purba baha peso, kompará ku mucha hòmber (42% vs. 30%). Kompará ku e gruponan di edat mas haltu, mucha di skol den e gruponan di edat mas yòn ta bisa ku mas frekuensia ku nan ta purba baha peso: 44% di e muchanan di 12 aña òf ménos, 36% di e muchanan di 13 pa 17 aña i 35% di e mucha muhénan di 18 aña òf mas. No a topa diferensia a base di nivel di skol, den e porsentahenan di mucha di skol ku ta purba baha peso.

Gráfiko: Porsentahe di mucha di skol ku ta purba baha peso, pa kada grupo di edat, na 2015

Fuente: Global School-based Student Health Survey Curaçao, 2015

Data disponibel


Hustifikashon

Sobrepeso i sobrepeso grave (obesidat) ta akumulashon apnormal òf eksesivo di vèt ku por afektá hende su salú. BMI (Body Mass Index) ta indiká e proporshon entre un hende su haltura i peso, i hopi bes ta usa esei pa determiná si e persona tin sobrepeso i, si ta asina, kuantu (RIVM 2017).

  • Peso di ménos (BMI <18.5 kg/m2)
  • Normal (BMI >/ 18.5 & < 25 kg/m2)
  • Sobrepeso (BMI >/ 25 & < 30 kg/m2)
  • Obesidat (BMI >/30 kg/m2) 

Un BMI di 25 kg/m2 òf mas ta indiká sobrepeso, i un BMI di 30 kg/m2 òf mas ta indiká obesidat. Algun estudio epidemiológiko ta indiká ku ora un persona su BMI ta 25 kg/m2 òf mas, e peliger di enfermedat òf morto ta oumentá (WHO, 2017b).

CHS: Curaçao Health Study (CHS) ta un enkuesta di poblashon ku a tuma lugá na 1993 – 1994 bou di poblashon adulto di 18 aña p’ariba na Kòrsou. E enkuesta akí a suministrá un gran kantidat di dato konfiabel tokante salú, i komportashon relashoná ku salú, di poblashon di Kòrsou.

GSHS Curaçao 2015: Global School-based Student Health Survey (GSHS) ta un enkuesta di salú bou di mucha di skol di 12 te ku 17 aña. E ta forma parti di e investigashon GSHS internashonal, di Organisashon Internashonal di Salú (WHO). Meta di GSHS ta di haña un bista aktualisá di komportashon di mucha di skol na Kòrsou ku por afektá nan salú, i tambe tokante nan bienestar. Na Kòrsou, a tene e enkuesta pa di promé bes na 2015.

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

Alberts, J. F., Gerstenbluth, I., Halabi, Y. T. & O'Neil, J. (1996). The Curaçao Health study. Northern Centre for Healthcare Research.

Centraal Bureau voor de Statistiek (2011). Gezondheid en beperkingen in Curaçao. Willemstad, Centraal Bureau voor de Statistiek.

Gezondheidsmonitor (2012). Konsultá via https://www.cbs.nl/nl-nl/maatwerk/2013/37/uitkomsten-gezondheidsmonitor-2012

Pan American Health Organisation (2017). Konsultá via http://www.paho.org/data/index.php/en/indicators.html

Verstraeten S. (2016). The Curacao Global School-based Student Health survey (GSHS) Study 2015. Volksgezondheid Instituut Curaçao, Willemstad.

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith - Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

RIVM (2017). Overgewicht en Obesitas. Konsultá via http://www.rivm.nl/Onderwerpen/K/Kosteneffectiviteit_van_preventie/Economische_evaluaties/Endocriene_ziekten_en_immuniteitsstoornissen/Overgewicht_en_Obesitas

World Health Organization (2017b). Factsheet Obesity and Overweight. Konsultá via http://www.who.int/mediacentre/factsheets/fs311/en/

World Health Organization (2017a). Konsultá via http://www.who.int/gho/en/