Un di kada sinku hende muhé den e grupo di 18 pa 50 aña di edat ta usa un antikonseptivo hormonal

Den e grupo di 18 pa 50 aña di edat, 21% di hende muhé ta bisa ku nan a usa pel òf otro tipo di antikonseptivo hormonal den e dos simannan promé ku e entrevista. No a topa diferensia den uso di antikonseptivo entre hende muhé kasá i esnan ku no ta kasá. Uso di antikonseptivo ta mas frekuente serka hende muhé di 25 pa 34 aña (32%). E porsentahe di hende muhé ku ta usa antikonseptivo hormonal ta mas haltu serka esnan ku estudio na nivel di HAVO, VWO òf SBO (26%).

E método antikonseptivo mas usá ta pel

Na 2013, pel tabata e método antikonseptivo mas usá serka hende muhé (50% di hende muhé), siguí pa uso di kondon (24%) i spiral (13%).

Gráfiko: porsentahe di hende muhé (den e grupo ku ta usa antikonseptivo) ku ta usa kada tipo di antikonseptivo

Fuente: Enkuesta Nashonal di Salú 2013

Kasi 40% di mucha di skol a yega di tene relashon seksual

Trintinuebe porshento (39%) di mucha di skol sekundario (edat mediano, 15 aña) a yega di tene relashon seksual. Serka mucha hòmber, e porsentahe akí ta mas haltu (42%) ku serka mucha muhé (36%). E porsentahe di mucha di skol ku a yega di tene relashon seksual ta subi ku edat; (9% di mucha te ku 12 aña, 21% den e grupo di 13 pa 15 aña, 47% den e grupo di 16 i 17 aña i 73% di esnan di 18 aña òf mas).

Gráfiko: porsentahe di mucha di skol ku a yega di tene relashon seksual, pa kada sekso i grupo di edat

Fuente: Global School-Based Student Health Survey Curaçao 2015

E promé relashon romántiko ta un aspekto importante di desaroyo di adolesente. Hopi hende tin nan promé eksperensia seksual den nan adolesensia. P'esei mes, nan ta kore riesgo di embaraso no planiá i enfermedat transmití seksualmente (SOA, na hulandes). Por prevení esakinan si tuma e medidanan nesesario, entre otro, antikonseptivo manera kondon. Sin embargo, hopi adolesente na Kòrsou no tin sufisiente informashon tokante e konsekuensianan negativo di komportashon seksual riesgoso ni tokante kon por prevení e konsekuensianan menshoná (Cijntje, 2014; Hellings, 2010; Boersma et al., 2012).

Mas tantu mucha hòmber tin nan promé eksperensia seksual promé ku nan kumpli 14 aña, kompará ku mucha muhé

Serka e muchanan di skol ku a yega di tene relashon seksual, 27% tabatin nan promé eksperensia seksual promé ku nan a kumpli 14 aña. Mas tantu mucha hòmber tin nan promé eksperensia seksual promé ku nan kumpli 14 aña, kompará ku mucha muhé (35% vs. 19%).

Gráfiko: porsentahe di e muchanan di skol (ku a yega di tene relashon seksual i) ku a tene relashon seksual promé ku nan a kumpli 14 aña, pa kada sekso i grupo di edat, 2015

Fuente: Global School-Based Student Health Survey Curaçao, 2015

Uso di kondon ta mas haltu serka mucha hòmber ku serka mucha muhé

Mas ku mitar (55%) di e muchanan di skol ku a yega di tene relashon seksual a usa un kondon e último biaha. Serka mucha muhé, e porsentahe tabata mas abou (44%) ku serka mucha hòmber (65%). E porsentahe ku a usa kondon e último biaha ku nan a tene relashon seksual tabata mas haltu serka e grupo di 13 pa 15 aña (63%), kompará ku e kategorianan di edat mas haltu.

Gráfiko: porsentahe (di esnan ku a yega di tene relashon) ku a usa kondon e último biaha ku nan a tene relashon, 2015

Fuente: Global School-Based Student Health Survey Curaçao 2015

* No tin sifra di mucha di 12 aña debí ku e porsentahe ku a yega di tene relashon seksual ta basá riba ménos ku 100 opservashon. P'esei, no a inkluí e grupo di edat ei.

Kasi 1 di kada 10 mucha muhé ta usa ‘morning-after pil’ komo antikonseptivo pa prevení embaraso

Serka e muchanan di skol ku a yega di tene relashon seksual, 62% ta usa un método antikonseptivo konfiabel pa prevení embaraso, manera kondon, pel òf spiral. Kasi 1 di kada 10 (9,1%) mucha muhé ku a yega di tene relashon seksual ta usa ‘morning-after pil’ komo antikonseptivo pa prevení embaraso.

Gráfiko: e métodonan raportá pa prevení embaraso (serka mucha di skol ku a yega di tene relashon seksual), 2015

* Ta usa otro método antikonseptivo ménos konfiabel, manera sali promé ku bin kla i temperatura

Fuente: Global School-Based Student Health Survey Curaçao 2015

Mucha muhé tin mas eksperensia ku embaraso, kompará ku mucha hòmber

Sinku porshento di tur mucha di skol a yega di sali na estado (1 òf mas biaha) òf saka un hende na estado (1 òf mas biaha). Serka e muchanan di skol ku a yega di tene relashon seksual, 12% a yega di sali na estado (1 òf mas biaha) òf a yega di saka un hende na estado (1 òf mas biaha). Eksperensia ku embaraso ta mas frekuente serka mucha muhé ku serka mucha hòmber ku a yega di tene relashon seksual (16% vs. 9%).

Gráfiko: porsentahe di mucha di skol (ku a yega di tene relashon seksual i) ku a yega di sali na estado òf saka un hende na estado (1 òf mas biaha), 2015

Fuente: Global School-Based Student Health Survey Curaçao 2015