search
close
Na 2017, 6.620 adulto a sufri aksidente di tráfiko: 2.915 hende hòmber i 3.705 hende muhé. Na tur, esei ta 5% di poblashon adulto. E porsentahenan pa hende hòmber i hende muhé ta varia djis un tiki. Aksidente di tráfiko ta mas frekuente serka e gruponan di edat mas yòn. Den e grupo di 18 te ku 24 aña, 9% a haña nan den un aksidente di tráfiko den e 12 lunanan promé ku e entrevista, i den e grupo di 65+ esaki tabata 3%. Na 2013, e porsentahe di adulto ku a sufri un aksidente di tráfiko tabata 4%.
Gráfiko: Porsentahe di adulto ku a sufri un aksidente di tráfiko, pa kada sekso i grupo di edat, na 2017
Fuente: Enkuesta Nashonal di Salú 2017
Na 2017, segun kálkulo, 2.632 adulto tabatin mester di asistensia médiko despues di un aksidente di tráfiko: 962 hende hòmber i 1.670 hende muhé. Na tur, esei ta 2% di poblashon adulto.
Aksidente di tráfiko ta mas frekuente serka adulto ku nivel di enseñansa HAVO, VWO i SBO, i serka adulto ku tin hopi difikultat pa kubri nan gastunan ku e entrada di famia. Den e resultadonan akí, no a tene kuenta ku diferensia di edat i sekso den e gruponan.
Gráfiko: Porsentahe di adulto ku a sufri un aksidente di tráfiko pa kada nivel di enseñansa i kapasidat pa kubri gastu na 2017
Fuente: Enkuesta Nashonal di Salú 2017
Kasi un di kada tres (31%) mucha di skol no ta bisti faha di siguridat (kasi) nunka ora e ta kore den outo komo pasahero. Mas tantu ta mucha hòmber ta keda sin bisti faha di siguridat (kasi) semper, kompará ku mucha muhé (35% vs. 28%). Mucha di skol di 12 aña òf mas yòn ta e grupo ku ménos ta keda sin bisti faha (kasi) semper. Kompará ku otro nivel di enseñansa, na e skolnan AGO ta kaminda ku mas frekuentemente e muchanan no ta usa faha di siguridat (kasi) nunka.
Gráfiko: Porsentahe di mucha di skol ku (kasi) nunka no ta bisti faha di siguridat komo pasahero den outo, na 2015
Fuente: Global School-based Student Health Survey Curaçao, 2015
Den e luna promé ku e entrevista, bintidos porshento (22%) di mucha di skol a kore den outo ku un shofùr ku a bebe alkohòl. Esei tabata mas frekuente serka mucha hòmber (24%) kompará ku serka mucha muhé (19%). E porsentahe akí ta oumentá ku edat. Mucha di skol AGO ta esnan ku mas frekuentemente a bisa ku nan a kore den outo ku un shofùr ku a bebe alkohòl.
Gráfiko: Porsentahe di mucha di skol ku a kore den outo ku un shofùr ku a bebe alkohòl na 2015
Fuente: Global School-based Student Health Survey Curaçao, 2015
Den e periodo di 2001-2015, e sifra apsoluto di morto komo konsekuensia di aksidente di tráfiko a fluktua di 13 (na 2012) pa 30 (na 2003) persona. Esei ta un promedio di 21 persona pa aña. Morto komo konsekuensia di aksidente di tráfiko ta hopi mas haltu pa hende hòmber ku pa hende muhé. E shofùr ta esun ku mas frekuentemente ta bira víktima fatal den tráfiko, siguí pa peaton i pasahero.
Gráfiko: Kantidat di morto den tráfiko pa kada aña, di 2001 – 2013
Fuente: Asosashon Tráfiko Sigur Kòrsou (ATSK)
Bou di aksidente di tráfiko nos ta konta tur aksidente den kua un vehíkulo tabata enbolbí i e víktima a sufri leshon komo konsekuensia di un situashon di tráfiko (inkluso tráfiko di baiskel, boto, trein i tráfiko aéreo, pero ekskluyendo vehíkulo stashoná), sea ku el a sosodé riba kaminda públiko òf nò. Segun VZinfo.nl, aksidente di baiskel i bròmfits den kua no tabatin niun kontrapartido enbolbí tambe ta kai bou di aksidente di tráfiko (Volksgezondheidinfo, 2017).
ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.
GSHS Curaçao 2015: Global School-based Student Health Survey (GSHS) ta un enkuesta di salú bou di mucha di skol di 12 te ku 17 aña. E ta forma parti di e investigashon GSHS internashonal, di Organisashon Internashonal di Salú (WHO). Meta di GSHS ta di haña un bista aktualisá di komportashon di mucha di skol na Kòrsou ku por afektá nan salú, i tambe tokante nan bienestar. Na Kòrsou, a tene e enkuesta pa di promé bes na 2015.
Asosashon Tráfiko Sigur Kòrsou (ATSK). Konsultá via http://www.vvvcur.com/index.html
Verstraeten S. (2016). The Curacao Global School-based Student Health survey (GSHS) Study 2015. Volksgezondheid Instituut Curaçao, Willemstad.
Verstraeten S., Griffith- Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.
Volksgezondheidenzorg.info (2017). Konsultá via https://www.volksgezondheidenzorg.info/onderwerp/letsels/cijfers-context/letsels-algemeen#definitie--node-verkeersongevallen, RIVM: Bilthoven, 7 januari 2018.