Kontakto sosial

Hende di edat ta sinti ménos apoyo sosial

Na 2017, seis porshento (6%) di adulto no tabatin niun hende ku nan tin un relashon asina bon kuné pa por konta kuné den kaso di un problema personal grave. Tres porshento (3%) a bisa ku hende tin poko interes òf no tin interes mes den loke nan ta hasi. Tur e dos tiponan akí di falta di apoyo sosial tabata mas frekuente serka e grupo di 65+ i serka hende divorsiá. Tin tiki diferensia entre hende hòmber i hende muhé.

Na 2017, 16% di adulto a bisa ku ta (hopi) difísil pa nan pidi yudansa práktiko serka bisiña ora nan tin mester di esei. Esei ta un tiki mas frekuente serka hende muhé (17%) kompará ku serka hende hòmber (15%). E grupo kaminda esaki ta mas frekuente ta hende ku ta biudo òf biuda.

Na 2013, 3% di adulto no tabatin niun hende ku nan tin un relashon asina bon kuné pa por konta kuné den kaso di problema personal grave. Na 2013, no a inkluí e preguntanan tokante interes i yudansa práktiko.

Adulto ku státus sosioekonómiko abou ta sinti ménos ku nan tin apoyo sosial

Adulto ku státus sosioekonómiko mas abou ta sinti ménos ku nan tin apoyo sosial. Ademas nan ta sinti ku nan relashon ku hende rònt di nan ta di ménos kalidat i ku ta mas difísil pa nan haña yudansa práktiko serka nan bisiñanan ora nan tin mester di esei. Ku otro palabra, na Kòrsou, hende ku un nivel di enseñansa abou i ku tin hopi difikultat pa kubri gastu ta esnan ku ménos ta sinti ku nan ta risibí yudansa for di hende rònt di nan.

Gráfiko: Porsentahe di adulto ku a sinti poko apoyo sosial pa kada nivel di enseñansa i kapasidat pa kubri gastu, na 2017

Fuente: Enkuesta Nashonal di Salú 2017

Dies porshento di mucha di skol no tin bon amigu 

Un di kada dies (10,0%) mucha di skol ta bisa ku e no tin niun bon amigu. Serka mucha di edat mas haltu esei ta mas frekuente ku serka mucha mas yòn. No tin diferensia entre mucha hòmber i mucha muhé. Na e skolnan AGO, ta mas frekuente pa e muchanan no tin bon amigu, kompará ku skol VSBO, SBO i HAVO/VWO.

Gráfiko: Porsentahe di mucha di skol sin bon amigu pa kada nivel di enseñansa

Fuente: Curaçao Global School-based Student Health Survey (GSHS) Study, 2015

Amistat ta hunga un papel krusial den desaroyo di adolesente, prinsipalmente pa yuda definí nan identidat propio. Si nan krea un ambiente den kua nan ta sinti nan sigur, esei ta permití nan formulá idea i opinion nobo. Interakshon ku amigu den e etapa akí di bida ta yuda e hóben desaroyá abilidat sosial i siña trata ku situashon ku ta produsí strès. Ademas, den adolesensia, relashon sosial ta influensiá kon e hóben ta siña ekspresá su mes, ta dun’é struktura i siñ’é rekonosé límite, i por evitá ku e hóben ta kuminsá tene relashon seksual na edat yòn òf kai den depreshon i kuminsá usa remedi (WHO, 2002). Adolesente ku no ta ser apresiá òf ku no ta ser aseptá dor di otro hóben tin mas problema di salú físiko i mental. Ora un adolesente ta aislá for di otro hóben di su edat, esei por hiba na sintimentu di soledat i síntoma mental (Curry et al., 2002).

Mitar di mucha di skol ta haña ku nan kompañeronan di skol ta amabel 

Kasi mitar di mucha di skol (48%) ta haña ku nan kompañeronan di skol ta amabel i kla pa yuda. No a opservá diferensia entre mucha hòmber i mucha muhé ni entre e diferente gruponan di edat. Mucha di skol HAVO/VWO ta bisa mas frekuentemente ku nan kompañeronan di skol ta amabel i kla pa yuda, kompará ku mucha di e otro nivelnan eskolar.

 Gráfiko: Porsentahe di mucha di skol ku mayor parti di tempu òf semper ta haña ku nan kompañeronan di skol ta amabel i kla pa yuda 

Fuente: Curacao Global School-based Student Health Survey (GSHS) Study, 2015

Un di kada seis mucha di skol ta sinti soledat

Diesseis (16%) porshento di mucha di skol a sinti soledat mayor parti di tempu (den e 12 lunanan promé ku e entrevista). Mucha muhé ta sinti soledat ku mas frekuensia kompará ku mucha hòmber (21% vs. 10%). E grupo di edat mas yòn (12 aña òf ménos) ta sinti ménos soledat kompará ku e otro gruponan di edat. Mucha di skol VSBO ta sinti soledat ku mas frekuensia kompará ku mucha di e otro nivelnan di skol.
Gráfiko: Porsentahe di mucha di skol ku a sinti soledat mayor parti di tempu òf semper na 2015

Fuente: Curacao Global School-based Student Health Survey (GSHS) Study, 2015

Downloads


Refrences

Relashon sosial ta importante pa un hende su bida emoshonal. Nan ta yuda determiná si e ta sinti ku hende ta komprond’é, stim’é i apresi’é. Hende ku no ta sinti esei generalmente ta sòru ménos bon pa nan mes. Ora un hende ta sinti ku e tin apoyo sosial, esei tin un influensia positivo riba su salú físiko i mental. P’esei mes hende ku ta risibí hopi apoyo sosial tin mas chèns di biba largu tambe. Ademas, apoyo sosial ta protehá hende kontra enfermedat kardiobaskular i problema mental (RIVM 2017).

ENS Kòrsou: Enkuesta Nashonal di Salú (ENS) ta un enkuesta representativo di e poblashon adulto di 18 aña p’ariba ku ta biba riba nan mes. Meta di ENS ta di duna un bista aktualisá di situashon di salú i estilo di bida di poblashon adulto na Kòrsou, i tokante kon nan ta usa e servisionan di kuido. For di 2013, Volksgezondheid Instituut Curaçao (VIC) ta tene un ENS kada kuater aña.

GSHS Curaçao 2015: Global School-based Student Health Survey (GSHS) ta un enkuesta di salú bou di mucha di skol di 12 te ku 17 aña. E ta forma parti di e investigashon GSHS internashonal, di Organisashon Internashonal di Salú (WHO). Meta di GSHS ta di haña un bista aktualisá di komportashon di mucha di skol na Kòrsou ku por afektá nan salú, i tambe tokante nan bienestar. Na Kòrsou, a tene e enkuesta pa di promé bes na 2015.

Currie C, Roberts C, Morgan A, Smith R, Settertobulte W, Samdal O. (2002). Young people’s health in context Health behavior in School-aged Children (HBSC) study: international report from the 2001/2002 survey [Internet]. Konsultá via

http://www.who.int/immunization/hpv/target/young_peoples_health_in_context_who_2011_2012.pdf

RIVM (2017). Sociale omgeving. Konsultá via http://www.eengezondernederland.nl/Heden_en_verleden/Determinanten/Sociale_omgeving

Verstraeten S. (2016). The Curacao Global School-based Student Health survey (GSHS) Study 2015. Volksgezondheid Instituut Curaçao, Willemstad.

Verstraeten S., Jansen I., Pin R. & Brouwer W. (2013). De nationale gezondheidsenquête Curaçao 2013: methodologie en belangrijkste resultaten. Volksgezondheid Instituut Curaçao, Willemstad.

Verstraeten S., Griffith - Lendering, M.F.H, & Pin R. (2017). De nationale gezondheidsenquête Curaçao 2017: de belangrijkste resultaten, methode en tabellen, Volksgezondheid Instituut Curaçao, Willemstad.

World Health Organization (2002). Broadening the horizon: Balancing protection and risk for adolescents. Geneva, Switzerland. Konsultá via

http://apps.who.int/iris/bitstream/10665/67242/1/WHO_FCH_CAH_01.20.pdf